போட்டித் தேர்வர்களுக்கான அப்டேட்! தமிழ்நாடு அரசின் 5 ஆண்டு வயது தளர்வு யாருக்கு கிடையாது? Explained
government job age relaxation Tamil Nadu : தமிழ்நாடு அரசு போட்டித் தேர்வுகளுக்கான வயது வரம்பை உயர்த்தியுள்ள நிலையில், யாருக்கெல்லாம் இந்த வயது வரம்பு தளர்வு கிடைக்காது? என்பது குறித்து இங்கே விரிவாக பார்க்கலாம்
government job age relaxation Tamil Nadu : தமிழகத்தில் நேரடி நியமனம் மூலம் நிரப்பப்படும் அரசுப் பணியிடங்களுக்கான வயது உச்ச வரம்பை 5 ஆண்டுகள் உயர்த்தி தமிழ்நாடு அரசு அரசாணை வெளியிட்டுள்ளது. இச்சலுகை அரசுப் பணிகளுக்கான சிறப்பு விதிகள் மற்றும் தற்காலிக விதிகளில் உள்ள வயது வரம்பிற்குப் பொருந்தும் வகையில் நடைமுறைப்படுத்தப்பட்டுள்ளது. போட்டித் தேர்வர்கள் மத்தியில் பெரும் வரவேற்பைப் பெற்றுள்ள இந்த அறிவிப்பில், எந்தெந்த தேர்வுகளுக்கு வயது தளர்வு உண்டு, யாருக்கெல்லாம் பொருந்தாது என்பது குறித்த முழுமையான வழிகாட்டுதல்கள் இடம்பெற்றுள்ளன.
5 ஆண்டுகள் வயது தளர்வு யாருக்கெல்லாம் கிடைக்கும்?
மனித வள மேலாண்மைத் துறையின் அதிகாரப்பூர்வ உத்தரவின்படி, பல்வேறு தேர்வு முகமைகள் மூலம் நடத்தப்படும் நேரடி நியமனப் பணிகளுக்கு இந்த 5 ஆண்டு கால வயது நீட்டிப்பு முழுமையாகப் பொருந்தும்.
பொருந்தும் தேர்வு முகமைகள் மற்றும் பதவிகள்:
TNPSC தேர்வுகள்: தமிழ்நாடு அரசுப் பணியாளர் தேர்வாணையம் நடத்தும் குரூப் 1, குரூப் 2, குரூப் 2A, குரூப் 4 உள்ளிட்ட அனைத்து நேரடி நியமனப் பதவிகள்.
TRB தேர்வுகள்: ஆசிரியர் தேர்வு வாரியம் வாயிலாக நிரப்பப்படும் பட்டதாரி ஆசிரியர், முதுகலை ஆசிரியர் மற்றும் விரிவுரையாளர் பணியிடங்கள்.
MRB தேர்வுகள்: மருத்துவப் பணியாளர் தேர்வு வாரியம் நடத்தும் மருத்துவர், செவிலியர் மற்றும் அனைத்துத் துணை மருத்துவப் பணியிடங்கள்.
நீதிமன்றம் மற்றும் வனத்துறை: வன சீருடைப் பணியாளர் தேர்வுக் குழுமம் மற்றும் சென்னை உயர் நீதிமன்றத்தின் கீழ் வரும் பணியிடங்கள்.
பயன்பெறும் சமூகப் பிரிவினர்:
- பொதுப் பிரிவு, பிற்படுத்தப்பட்ட வகுப்பினர் மற்றும் பிற்படுத்தப்பட்ட வகுப்பினர் முஸ்லிம்
- மிகவும் பிற்படுத்தப்பட்ட வகுப்பினர் (MBC) மற்றும் சீர்மரபினர் (DNC).
- பட்டியலினத்தவர் (SC), பட்டியலின அருந்ததியர் (SCA) மற்றும் பழங்குடியினர் (ST).
- அனைத்து சமூகப் பிரிவுகளையும் சார்ந்த ஆதரவற்ற விதவைகள்.
மாற்றுத்திறனாளிகளுக்கு கூடுதல் பலன்: மாற்றுத்திறனாளி தேர்வர்களைப் பொறுத்தவரை, 2016 ஆம் ஆண்டு தமிழ்நாடு அரசுப் பணியாளர் சட்டத்தின் கீழ் ஏற்கெனவே அனுமதிக்கப்பட்டுள்ள வயது உச்ச வரம்புச் சலுகையுடன் கூடுதலாக இந்த 5 ஆண்டு சலுகையும் சேர்ந்து கிடைக்கும்.
2. யாருக்கெல்லாம் வயது தளர்வு பொருந்தாது?
தமிழ்நாடு அரசின் புதிய அரசாணையின்படி, குறிப்பிட்ட சில பிரிவினருக்கு இந்த 5 ஆண்டு கூடுதல் சலுகை தனியாகப் பொருந்தாது எனத் தெளிவுபடுத்தப்பட்டுள்ளது.
முன்னாள் படைவீரர்கள்: முன்னாள் படைவீரர்களுக்கு சட்டப்படி ஏற்கெனவே நிர்ணயிக்கப்பட்ட நடைமுறையே தொடரும்; அவர்களுக்கு இந்த 5 ஆண்டு உயர்வு தனியாகப் பொருந்தாது.
கருணை அடிப்படையிலான பணிநியமனங்கள்: பணியின் போது உயிரிழந்த அரசு ஊழியர்களின் வாரிசுகளுக்கு வழங்கப்படும் கருணை நியமன விதிகளில் மாற்றம் ஏதுமின்றி பழைய நடைமுறையே தொடரும்.
உச்ச வரம்பற்ற பிரிவினர்: TNPSC தேர்வுகளில் குறிப்பிட்ட கல்வித் தகுதியுடன் விண்ணப்பிக்கும் இடஒதுக்கீட்டுப் பிரிவினருக்கு (BC, BCM, MBC, SC, ST) ஏற்கனவே பல பதவிகளுக்கு அதிகபட்ச வயது வரம்பு இல்லை என்பதால், அவர்களுக்கு இந்த நீட்டிப்பு தனியாகப் பொருந்த வேண்டிய தேவை இல்லை.
3. எந்தெந்த பணிகளுக்கு இந்த சலுகை கிடைக்காது?
போலீஸ், சிறை மற்றும் தீயணைப்புத் துறை (சீருடைப் பணிகள்): தமிழ்நாடு சீருடைப் பணியாளர் தேர்வு வாரியம் (TNUSRB) நடத்தும் இரண்டாம் நிலை காவலர், உதவி ஆய்வாளர் (SI), சிறைக் காவலர் மற்றும் தீயணைப்பாளர் பணிகளுக்கு உடல் தகுதி முதன்மையானது. எனவே, இப்பணிகளுக்கு வழக்கமான பிரத்யேக விதிகளே தொடரும்; இந்த 5 ஆண்டு வயது தளர்வு சீருடைப் பணிகளுக்கு நேரடியாகப் பொருந்தாது. அரசுப் பணியில் 5 ஆண்டுகள் நிறைவு செய்தவர்கள்: மாநில அல்லது மத்திய அரசுப் பணிகளில் ஏற்கனவே 5 ஆண்டுகள் மற்றும் அதற்கு மேல் தொடர்ந்து பணியாற்றி வருபவர்களுக்குப் பொதுப் பிரிவுக்கான வயது தளர்வுச் சலுகைகள் சில பதவிகளுக்குப் பொருந்தாது.
அரசாணையின் கால வரம்பு
இந்த 5 ஆண்டு வயது தளர்வு ஒரு தற்காலிக சலுகையாகும். அரசாணை வெளியான நாளான 30.10.2026 முதல் அடுத்த 5 ஆண்டுகளுக்கு (29.10.2031 வரை) மட்டுமே இது நடைமுறையில் இருக்கும். இதன் அடிப்படையில், TNPSC, TRB, MRB உள்ளிட்ட தேர்வு முகமைகள் அடுத்தடுத்து வெளியிட உள்ள புதிய தேர்வு அறிவிக்கைகளில் வயது உச்ச வரம்பினைத் திருத்தி வெளியிடுமாறு துறைத் தலைவர்களுக்கு உத்தரவிடப்பட்டுள்ளது. அரசுப் பணிக்காகத் தயாராகும் தேர்வர்கள் இந்த வாய்ப்பைப் பயன்படுத்தி உரிய முறையில் விண்ணப்பிக்குமாறு அறிவுறுத்தப்படுகிறார்கள்.
யார் யார் எந்த வயது வரை தேர்வு எழுதலாம்?
1. TNPSC குரூப் 1 தேர்வுகள் (துணை ஆட்சியர், டிஎஸ்பி உள்ளிட்ட உயர்பதவிகள்)
குரூப் 1 நேரடி நியமனப் பணிகளுக்கு விண்ணப்பிக்கும் பொதுப் பிரிவினருக்கான (General / OC) அதிகபட்ச வயது வரம்பு 37 வயது ஆகும். பிற்படுத்தப்பட்ட வகுப்பினர் (BC, BCM), மிகவும் பிற்படுத்தப்பட்ட வகுப்பினர் (MBC, DNC), பட்டியலினத்தவர் (SC, SCA), பழங்குடியினர் (ST) மற்றும் அனைத்து சமூகங்களைச் சார்ந்த ஆதரவற்ற விதவைகள் 42 வயது வரை இத்தேர்வுக்கு விண்ணப்பிக்க முடியும். மாற்றுத்திறனாளி தேர்வர்களைப் பொறுத்தவரை, பொதுப் பிரிவினர் 47 வயது வரையிலும், இடஒதுக்கீட்டுப் பிரிவினர் (BC, BCM, MBC, SC, ST) 52 வயது வரையிலும் விண்ணப்பிக்க அனுமதி உண்டு.
2. TNPSC குரூப் 2 மற்றும் குரூப் 2A தேர்வுகள் (நேர்முக மற்றும் நேர்முகமற்ற பதவிகள்)
பட்டப்படிப்பு தகுதியுடன் நடத்தப்படும் குரூப் 2 மற்றும் 2A தேர்வுகளுக்குப் பொதுப் பிரிவினர் (OC) 37 வயது வரை மட்டுமே விண்ணப்பிக்க முடியும். ஆனால், இடஒதுக்கீட்டுப் பிரிவைச் சேர்ந்த பிற்படுத்தப்பட்டோர் (BC, BCM), மிகவும் பிற்படுத்தப்பட்டோர் (MBC, DNC), பட்டியலினத்தவர் (SC, SCA), பழங்குடியினர் (ST) மற்றும் ஆதரவற்ற விதவைகளுக்குத் தமிழ்நாடு அரசுப் பணியாளர் சட்டப்படி அதிகபட்ச வயது வரம்பு கிடையாது (No Upper Age Limit); இவர்கள் ஓய்வு பெறும் வயதான 60 வயது வரை தொடர்ந்து விண்ணப்பிக்கலாம். பொதுப் பிரிவைச் சார்ந்த மாற்றுத்திறனாளிகள் 47 வயது வரை விண்ணப்பிக்கலாம்.
3. TNPSC குரூப் 4 தேர்வுகள் (இளநிலை உதவியாளர், தட்டச்சர் மற்றும் VAO)
பத்தாம் வகுப்பு அடிப்படைத் தகுதியுடன் மட்டுமே விண்ணப்பிக்கும் நபர்களுக்குப் புதிய உச்ச வயது வரம்புகள் பின்வருமாறு அமையும்:
இளநிலை உதவியாளர் மற்றும் தட்டச்சர் பணிகளுக்கு: பொதுப் பிரிவினர் (OC) 37 வயது வரையிலும், BC, BCM, MBC, DNC பிரிவினர் 39 வயது வரையிலும், SC, SCA, ST பிரிவினர் மற்றும் ஆதரவற்ற விதவைகள் 42 வயது வரையிலும் விண்ணப்பிக்கலாம். மாற்றுத்திறனாளிகளுக்கு அவர்கள் சார்ந்த பிரிவைப் பொறுத்து 47 முதல் 52 வயது வரை சலுகை கிடைக்கும்.
கிராம நிர்வாக அலுவலர் பணிக்கு: பொதுப் பிரிவினர் 37 வயது வரையிலும், BC, BCM, MBC, DNC பிரிவினர் 42 வயது வரையிலும், SC, SCA, ST பிரிவினர் மற்றும் ஆதரவற்ற விதவைகள் 47 வயது வரையிலும் விண்ணப்பிக்கலாம். மாற்றுத்திறனாளிகள் அந்தந்தப் பிரிவுகளின் அடிப்படையில் 47 முதல் 57 வயது வரை விண்ணப்பிக்கத் தகுதி பெறுவர்.
கவனத்தில் கொள்ள வேண்டிய முக்கிய தகவல் - பத்தாம் வகுப்பைத் தாண்டி மேல்நிலைக் கல்வி, பட்டயப் படிப்பு அல்லது ஏதேனும் ஒரு பட்டப்படிப்பு முடித்த BC, BCM, MBC, SC, ST வகுப்பைச் சேர்ந்தவர்கள் மற்றும் ஆதரவற்ற விதவைகளுக்குக் குரூப் 4 தேர்வுகளில் உச்ச வயது வரம்பு கிடையாது. 60 வயது வரை எழுதலாம்.
4. ஆசிரியர் தேர்வு வாரியம் - TRB தேர்வுகள் (பட்டதாரி, முதுகலை ஆசிரியர்கள்)
பள்ளிக் கல்வித்துறை மற்றும் கல்லூரித் துறைகளில் ஆசிரியர், பேராசிரியர் பணிகளுக்கு விண்ணப்பிக்கும் பொதுப் பிரிவினருக்கான (OC) அதிகபட்ச வயது வரம்பு 50 வயது ஆகும். BC, BCM, MBC, DNC, SC, SCA, ST ஆகிய இடஒதுக்கீட்டுப் பிரிவினர் மற்றும் ஆதரவற்ற விதவைகள் 55 வயது வரை விண்ணப்பிக்கலாம். மாற்றுத்திறனாளி ஆசிரியர்கள் அரசு விதிகளின்படி 55 முதல் 60 வயது வரை விண்ணப்பிக்க அனுமதிக்கப்படுவர்.
5. மருத்துவப் பணியாளர் தேர்வு வாரியம் - MRB தேர்வுகள் (மருத்துவர்கள், செவிலியர்கள்)
மருத்துவத் துறையில் நேரடி நியமனம் மூலம் நிரப்பப்படும் பணியிடங்களுக்குப் பொதுப் பிரிவினர் 37 வயது வரை விண்ணப்பிக்க முடியும். மாற்றுத்திறனாளிப் பொதுப் பிரிவினர் 47 வயது வரை பங்கேற்கலாம். அதே சமயம் BC, BCM, MBC, DNC, SC, ST மற்றும் ஆதரவற்ற விதவைகளுக்கு பெரும்பாலான நேரடி மருத்துவப் பணிகளில் உச்ச வயது வரம்பு இன்றி பணி ஓய்வு பெறும் 60 வயது வரை விண்ணப்பிக்கும் வாய்ப்பு தொடர்ந்து நீடிக்கும்.
