மதுரை மக்களுக்கு குட் நியூஸ்! செப்டம்பர் 17 உள்ளூர் விடுமுறை

Madurai News : உலகப் புகழ்பெற்ற மதுரை அருள்மிகு மீனாட்சி சுந்தரேசுவரர் திருக்கோவில் மகா கும்பாபிஷேக விழாவை முன்னிட்டு, வரும் செப்டம்பர் 17 வியாழக்கிழமை அன்று மதுரை மாவட்டம் முழுவதும் உள்ளூர் விடுமுறை அறிவித்து தமிழ்நாடு அரசு அரசாணை வெளியிட்டுள்ளது.

மீனாட்சி அம்மன் திருக்கோவில்

மீனாட்சி அம்மன் திருக்கோவிலில் 12 ஆண்டுகளுக்கு ஒருமுறை நடைபெறும் இந்த மகா கும்பாபிஷேகப் பெருவிழாவைக் காணவும், சுவாமி தரிசனம் செய்யவும் தமிழகத்தின் பல்வேறு மாவட்டங்கள் மற்றும் வெளி மாநிலங்களில் இருந்து லட்சக்கணக்கான பக்தர்கள் மதுரைக்கு வருகை தருவார்கள் என எதிர்பார்க்கப்படுகிறது. கூட்ட நெரிசலைக் கட்டுப்படுத்தவும், பக்தர்களின் வசதிக்காகவும் அன்றைய தினம் உள்ளூர் விடுமுறை அளிக்க வேண்டும் என்று மதுரை மாவட்ட ஆட்சித் தலைவர் தமிழக அரசுக்குக் கடிதம் மூலம் கோரிக்கை விடுத்திருந்தார்.

உள்ளூர் விடுமுறை

மாவட்ட ஆட்சியரின் கோரிக்கையினை ஏற்று, கும்பாபிஷேகம் நடைபெறும் செப்டம்பர் 17 அன்று மதுரை மாவட்டத்திலுள்ள அனைத்து மாநில அரசு அலுவலகங்கள் மற்றும் கல்வி நிறுவனங்களுக்கு உள்ளூர் விடுமுறை அளிக்க அனுமதி வழங்கி அரசுச் செயலாளர் எ. சுந்தரவல்லி அரசாணை பிறப்பித்துள்ளார். பள்ளி, கல்லூரிகளில் நடைபெறும் தேர்வுகளுக்கு எவ்வித இடையூறும் ஏற்படாத வகையில் இந்த விடுமுறை பொருந்தும் எனவும் தெரிவிக்கப்பட்டுள்ளது. மேலும், இந்த விடுமுறையை ஈடுசெய்யும் பொருட்டு வரும் செப்டம்பர் 26, 2026 (சனிக்கிழமை) அன்று முழு வேலைநாளாகச் செயல்படும் என அறிவிக்கப்பட்டுள்ளது.

மாவட்ட ஆட்சித்தலைவர் அறிவிப்பு

இந்த உள்ளூர் விடுமுறையானது செலவாணி முறிச் சட்டம், 1881-ன் (Negotiable Instruments Act, 1881) கீழ் அறிவிக்கப்படவில்லை என்பதால், அவசரப் பணிகளைக் கவனிக்கும் பொருட்டு மதுரை மாவட்டத்தில் உள்ள மாவட்டக் கருவூலம் மற்றும் சார்நிலைக் கருவூலங்கள் குறிப்பிட்ட பணியாளர்களுடன் வழக்கம் போல் செயல்படத் தகுந்த ஏற்பாடுகளைச் செய்யுமாறு மாவட்ட ஆட்சித் தலைவருக்கு அறிவுறுத்தப்பட்டுள்ளது.