Explained: இரட்டை கோபுர தாக்குதல் போல்... உலகை பதறவைத்த முகமது அப்ரோஸ்... யார் இவர்?

இதே செப்டம்பர் 11ஆம் தேதி, 25 ஆண்டுகளுக்கு முன், 2001ஆம் ஆண்டில் அமெரிக்காவின் நியூயார்க் நகரில் உள்ள உலக வர்த்தக மையம் மற்றும் பென்டகன் மீது அல்-கொய்தா பயங்கிரவாதிகள் பயணிகள் விமானங்களை கடத்தி, அவற்றை வைத்து வான்வழியாக தாக்குதல் நடத்தினர்.

இந்த பயங்கரவாத தாக்குதல் என்பது அமெரிக்காவை மட்டுமின்றி உலகையே உலுக்கியது எனலாம். இந்த பயங்கரவாத சம்பவம் நடந்து சுமார் ஒரு மாதத்திற்கு பிறகு, மும்பை காவல்துறையினர் இளைஞர் ஒருவரை கைது செய்தனர்.

கைதான இளைஞரால் இந்தியா மட்டுமின்றி பிரிட்டன், ஆஸ்திரேலியா என உலக நாடுகளின் புலனாய்வு அமைப்புகளே நிலைகுலைந்து போனது. அவர் யார்...? அவர் கைதின் பின்னணி என்ன? உள்ளிட்ட முழு விவரங்களையும் இங்கு விரிவாக காணலாம்.

மேலும் படிக்க | Explained | நாம் பார்க்கும் உலக வரைபடம் தவறா? ஆப்பிரிக்காவின் உண்மையான அளவு இதுதான்!

முகமது அப்ரோஸ்: பைலட் பயிற்சியும்... போலீசாரின் சந்தேகமும்...

• மும்பையின் டிராம்பே பகுதியில் அருகில் இருக்கும் 'சீட்டா கேம்ப்' என்ற எளிய குடிசைப் பகுதியைச் சேர்ந்தவரே முகமது அப்ரோஸ். இவரது தந்தை சாதாரண தையல் தொழிலாளி ஆவார்.
• எளிய குடும்பப் பின்னணியைக் கொண்ட அப்ரோஸ், 2001ஆம் ஆண்டின் அக்டோபர் மாதத்தில் வெளிநாடுகளுக்குச் சென்று விமான பைலட் பயிற்சியை பெற்று நாடு திரும்பியிருப்பதாக மும்பை காவல்துறைக்கு உளவு தகவல் கிடைத்திருக்கிறது.
• பைலட் பயிற்சி எடுக்க அதிக செலவாகும் என்ற நிலையில், தையல்காரரின் மகனால் எப்படி பயிற்சியில் இணைய முடியும் என்ற சந்தேகம் போலீசாருக்கு எழுந்தது. இதன் பின்னணியில் ஏதேனும் பயங்கரவாத அமைப்பின் நிதியுதவி இருக்கலாம் என்றும் சந்தேகம் எழுந்தது.
• போலீசார் விசாரணையை தீவிரப்படுத்தினர். முகமது அப்ரோஸ் மும்பை திரும்பி நவி மும்பையில் உள்ள 'ஹோட்டல் அபோட்' (Hotel Abbott) எனும் விடுதியில் தங்கியிருந்ததை கண்டுபிடித்து போலீசார் அவரை கைது செய்து காவலில் எடுத்தனர்.

உலகையே அதிரவைத்த வாக்குமூலம்

மும்பை போலீசார் அளித்த தகவலின்படி, முகமது அப்ரோஸின் வாக்குமூலம்தான் உலகையே மிரளவைத்தது. அவர் வாக்குமூலம் அளித்ததாக வெளியான தகவல்களை இங்கு காணலாம்.

பிரிட்டன் நாடாளுமன்றத் தாக்கும் திட்டம்

• 2001 செப்டம்பர் 11இல் அமெரிக்காவில் நடந்ததை போன்றே, லண்டன் ஹீத்ரோ விமான நிலையத்தில் இருந்து மான்செஸ்டர் செல்ல இருந்த விமானத்தைக் கடத்தி, இங்கிலாந்து நாடாளுமன்றக் கட்டடத்தின் மீது மோதச் செய்யும் குழுவில் தான் இருந்ததாக அப்ரோஸ் தெரிவித்ததாக மும்பை போலீசார் தெரிவித்தது.
• ஆனால், அமெரிக்கத் தாக்குதலுக்குப் பிறகு உலகத்தின் முன்னணி விமான நிலையங்களில் பாதுகாப்பு பலப்படுத்தப்பட்டதால் தங்களால் அந்தத் திட்டத்தை செயல்படுத்த முடியவில்லை என்றும் அப்ரோஸ் தெரிவித்ததாக கூறப்படுகிறது.

ஆஸ்திரேலியாவும் டார்கெட்

• இங்கிலாந்தில் போட்ட திட்டத்தை போல் ஆஸ்திரேலியாவிலும் திட்டமிட்டுள்ளனர்.
• ஆஸ்திரேலியாவின் மெல்போர்ன் நகரில் உள்ள புகழ்பெற்ற ரியால்டோ டவர்ஸ் கட்டடத்தை தகர்க்கவும் மற்றொரு பயங்கரவாத குழு தயாராக இருந்ததாக அப்ரோஸ் தெரிவித்ததாகவும் போலீசார் தகவல் அளிக்கின்றனர்.

மேலும் படிக்க | Explainer: பிரிக்ஸ் உச்சி மாநாடு: சீனா, ரஷ்யா, அமெரிக்கா, மேற்கத்திய நாடுகளைக் கையாள தயாராகும் இந்தியா

பைலட் பயிற்சியும்... அதற்கான நிதியுதவியும்...

முபாரக் முசல்மான் என்ற ஆங்கிலேய தொழிலதிபர் தனக்கு பயிற்சிக்கு நிதி அளித்ததாக வாக்குமூலம் பதிவு செய்யப்பட்டிருக்கிறது.

அதேபோல், முகமது அப்ரோஸை பயங்கரவாத பாதைக்கு  ஆஸ்திரேலியாவைச் சேர்ந்த மௌலானா மன்சூர் இலியாஸ் என்பவரே தூண்டினார் என்றும் வாக்குமூலத்தில் குறிப்பிடப்பட்டுள்ளது.

அதேநேரத்தில், ஆஸ்திரேலியா, இங்கிலாந்து மற்றும் அமெரிக்கா ஆகிய மூன்று நாடுகளிலும் தனக்கு விமான பைலட் பயிற்சி அளிக்கப்பட்டதாகவும் அவர் தெரிவித்ததாகவும் வாக்குமூலத்தில் குறிப்பிடப்பட்டுள்ளது.

சர்வதேச அளவிலான விசாரணை

• மும்பை போலீசார் பதிவு செய்த வாக்குமூலத்தை தொடர்ந்து, அதன் தீவிரத்தை உணர்ந்த அப்போதைய மும்பை காவல் ஆணையர் எம்.என். சிங் நேரில் இங்கிலாந்துக்குச் சென்றார்.
• இதைத் தொடர்ந்து மும்பை காவல்துறையின் தனிப்படை அதிகாரிகள் அமெரிக்கா, இங்கிலாந்து, ஆஸ்திரேலியாவிற்குச் சென்று தீவிர விசாரணையில் இறங்கினர்.
• இதைத் தொடர்ந்து முகமது அப்ரோஸ் மீது பயங்கரவாதத் தடுப்புச் சட்டம் (POTA) பாய்ந்தது. இந்தச் சட்டத்திற்கு மாற்றாகவே, பயங்கரவாத மற்றும் சீர்குலைவு நடவடிக்கைகள் தடுப்புச் சட்டம் (TADA) என கொண்டுவரப்பட்டது.

இங்கிலாந்தின் விசாரணை

• இங்கிலாந்து பிரிட்டன் நாடாளுமன்றக் கட்டடத்தின் மீது விமான தாக்குதல் நடத்த திட்டமிட்டதாக அப்ரோஸ் கூறிய குற்றச்சாட்டை பிரிட்டனின் ஸ்காட்லாந்து யார்டு மற்றும் உளவு அமைப்புகளால் எந்தவொரு நடைமுறைத் தடயத்தையோ, ஆவணத்தையோ கண்டறிய முடியவில்லை.
• அப்ரோஸ் பிரிட்டனில் உள்ள விமானப் பயிற்சிப் பள்ளியில் சேர்ந்திருந்தார் என்பதை தவிர, முபாரக் முசல்மான் என்ற தொழிலதிபர் பயங்கரவாத நோக்கத்திற்காக அவருக்கு நிதி வழங்கினார் என்பதற்கோ, அவர் அல்-கொய்தா தொடர்புகளுடன் அங்கு இயங்கினார் என்பதற்கோ உறுதியான புலனாய்வு ஆதாரங்கள் கிடைக்கவில்லை.

ஆஸ்திரேலியாவின் விசாரணை

• மெல்போர்னில் உள்ள ரியால்டோ டவர்ஸை தாக்க மற்றொரு பயங்கரவாத குழு திட்டமிட்டதாக அப்ரோஸ் கூறியதை ஆஸ்திரேலிய பாதுகாப்பு உளவு அமைப்பு (ASIO) மற்றும் ஆஸ்திரேலிய கூட்டாட்சி காவல்துறை (AFP) ஆய்வு செய்தன.
• எனினும், அந்நாட்டு மண்ணில் அத்தகைய தாக்குதலுக்கான தயாரிப்போ அல்லது குழுக்களோ செயல்பட்டதற்கான எந்த ஆதாரமும் இல்லை எனத் தெரிவிக்கப்பட்டது.
• விக்டோரியாவைச் சேர்ந்த மௌலானா மன்சூர் இலியாஸ் என்பவர் அவரை பயங்கரவாத பாதைக்கு தூண்டியதாக கூறப்பட்ட குற்றச்சாட்டும் போதிய நம்பகமான புலனாய்வுத் தரவுகளுடன் ஒத்துப்போகவில்லை.

ஆதாரம் கிடைக்கவில்லை...

மும்பை காவல்துறையினர் பல மாதங்கள் தீவிர விசாரணை நடத்தியும்; பல நாடுகளுக்கு நேரில் சென்றும்; இங்கிலாந்து மற்றும் ஆஸ்திரேலிய அதிகாரிகளிடம் Letters Rogatory மூலம் தகவல் கோரியும், நீதிமன்றத்தில் ஏற்றுக்கொள்ளக்கூடிய முகமது அப்ரோஸ் மீதான குற்றச்சாட்டுகளுக்குத் தேவையான எந்தவொரு உறுதியான ஆணவங்களோ அல்லது ஆதாரங்களோ வெளிநாடுகளில் இருந்து கிடைக்கவில்லை.

வழக்கு என்ன ஆனது...?

• நீதிமன்றத்தில் ஆதாரங்களைச் சமர்பிக்க முடியாததால் அரசு வழக்கறிஞர்கள் முகமது அப்ரோஸ் மீதான POTA சட்டப்பிரிவுகள் திரும்பப் பெறப்பட்டன. இதனால் அவர் சிறையில் இருந்து விடுவிக்கப்பட்டார்.
• விடுதலையான பிறகு முகமது அப்ரோஸ் மும்பையின் அனுசக்தி நகர் சட்டப்பேரவைத் தொகுதியில் போட்டியிட்டு தோல்வியடைந்தார்.
• தன் மீது சுமத்தப்பட்ட அனைத்து குற்றச்சாட்டுகளும் காவல்துறையினரால் ஜோடிக்கப்பட்டவை என்றும்; தான் அநியாயமாக அந்த வழக்கில் சிக்கவைக்கப்பட்டதாகவும் முகமது அப்ரோஸ் தொடர்ச்சியாக கூறி வந்தார்.
• அமெரிக்காவின் 9/11 தாக்குதலின் போது, இந்தியாவிலும் பதற்றத்தை ஏற்படுத்திய இந்த முகமது அப்ரோஸ் விவகாரம், குற்றவியல் வரலாற்றில் ஒரு விசித்திரமான மர்ம அத்தியாயமாகவே நிலைத்து நிற்கிறது.

மேலும் படிக்க | Explainer: சீன அதிபரின் இந்திய வருகை.... BRICS உச்சிமாநாட்டையும் தாண்டி 4 காரணங்கள்