ரேஷன் கார்டுதாரர்களுக்கு குட் நியூஸ்: e-KYC செய்யாவிட்டாலும் பொருட்கள் உண்டு!

ரேஷன் கார்டுதாரர்களுக்கு குட் நியூஸ்! e-KYC செய்யாவிட்டாலும் பொருட்கள் நிறுத்தப்படாது

தமிழ்நாட்டில் e-KYC சரிபார்ப்பை இன்னும் முடிக்காத தகுதியான குடும்ப அட்டைதாரர்களுக்கும் நியாய விலை கடைகளில் அத்தியாவசிய பொருட்கள் தொடர்ந்து வழங்கப்படும் என தமிழக அரசு தெரிவித்துள்ளது.

அக்டோபர் 1 முதல் பொருட்கள் நிறுத்த மத்திய அரசு உத்தரவு!

6 மாதங்களுக்கும் மேலாக நியாய விலைக் கடைகளில் பொருட்கள் வாங்காத PHH மற்றும் AAY குடும்ப அட்டைதாரர்களுக்கு அக்டோபர் 1 முதல் பொருட்கள் வழங்குவதை தற்காலிகமாக நிறுத்துமாறு ஒன்றிய அரசு உத்தரவிட்டிருந்தது.

தமிழகத்தில் 96.69% பேருக்கு e-KYC நிறைவு

தமிழகத்தில் நடத்தப்பட்ட தொடர் சிறப்பு முகாம்களின் மூலம் PHH மற்றும் AAY குடும்ப அட்டைதாரர்களின் e-KYC நிறைவு சதவீதம் 96.69% ஆக உயர்ந்துள்ளது. ஜூலை மாதத்தில் 95.44% ஆக இருந்த e-KYC, செப்டம்பர் 30 நிவரப்படி அதிகரித்துள்ளது. இதன் மூலம் 4,49,663 பயனாளிகள் பயனடைந்துள்ளனர்.

e-KYC செய்யாதவர்கள் என்ன செய்ய வேண்டும்.

e-KYC இன்னும் முடியாத குடும்ப அட்டைதாரர்கள் அத்தியாவசிய பொருட்களை வாங்க நியாய விலை கடைக்கு செல்லும்போது கைவிரல் ரேகை அல்லது கண்கருவிழி சரிபார்ப்பு மூலம் தங்களது விவரங்களை பதிவேற்றம் செய்து கொள்ளலாம். தகுதியான குடும்ப அட்டைதாரர்களுக்கு எந்த காரணத்திற்காகவும் ரேஷன் பொருட்கள் வழங்குவதை நிறுத்தவோ தடுக்கவோ கூடாது என அதிகாரிகளுக்கு தமிழக அரசு அறிவுறுத்தி உள்ளது.

ரேஷன் கிடைக்கும்.. ஆனாலும் e-KYC முடிப்பது அவசியம்

தமிழகத்தில் குடும்ப அட்டைதாரர்களுக்கு ரேஷன் பொருட்கள் தடையின்றி வழங்கப்படும் என அரசு தெரிவித்துள்ளது. இருப்பினும் குடும்ப அட்டையில் e-KYC சரிபார்ப்பை விரைவில் முடித்துக்கொள்வது முக்கியம். ரேஷன் திட்டத்தில் முறைகேடுகளை தடுப்பதுடன், தகுதியான பயனாளிகளுக்கு மட்டுமே அரசின் உதவிகள் சென்றடைவதை உறுதி செய்வதற்காக e-KYC நடைமுறை கொண்டுவரப்பட்டுள்ளது.