மதுராந்தகத்தில் இன்று முதல்வர் விஜய் பிரச்சாரம்: தொண்டர்கள், பொதுமக்களுக்கு சிறப்பு ஏற்பாடுகள்

சென்னை: தமிழகத்தில் மதுராந்தகம் மற்றும் தாராபுரம் சட்டமன்றத் தொகுதிகளுக்கான இடைத்தேர்தல்கள் அக்டோபர் 6-ஆம் தேதி நடக்கவுள்ளன. இதற்கான பிரச்சாரங்கள் சூடுபிடிக்கத் தொடங்கியுள்ளன. இந்த இடைத்தேர்தல்கள் அனைத்து கட்சிகளுக்கும் மிக முக்கியமானவையாக பார்க்கப்படுகின்றன. பலத்தை நிரூபிப்பது, மீண்டும் கட்சித் தொண்டர்களிடம் நம்பிக்கையை ஏற்படுத்துவது, வெற்றிப் பயணத்தை தொடர்வது என வெவ்வேறு கட்சிகள் வெவ்வேறு காரணங்களுக்காக இந்த தேர்தல்களை நம்பியுள்ளன.

முதல்வர் விஜய் பிரச்சாரம்

இந்த நிலையில், செங்கல்பட்டு மாவட்டம் மதுராந்தகம் சட்டமன்றத் தொகுதி இடைத்தேர்தலில் தமிழக வெற்றிக் கழகம் சார்பில் போட்டியிடும் வேட்பாளர் மரகதம் குமரவேலை ஆதரித்து பிரச்சாரம் செய்ய, தவெக தலைவரும், தமிழக முதல்வருமான விஜய் இன்று தொழுப்பேடு பகுதியில் பிரச்சாரம் மேற்கொள்ளவுள்ளார்.

மதுராந்தகம் சட்டமன்றத் தொகுதி

அக்டோபர் 6-ஆம் தேதி நடைபெறவுள்ள இடைத்தேர்தலுக்கான பிரச்சாரத்தை தவெக தீவிரப்படுத்தி வரும் நிலையில், மதுராந்தகம் சட்டமன்றத் தொகுதியில் உள்ள வாக்குச்சாவடி நிர்வாகிகளுடனும் முதல்வர் விஜய் கலந்துரையாடுவார் என்று அமைச்சர் என். ஆனந்த் தெரிவித்தார்.

2026-ஆம் ஆண்டு நடைபெற்ற சட்டமன்றத் தேர்தலில் அதிமுக சார்பில் போட்டியிட்டு வெற்றி பெற்ற பின்னர், எம்எல்ஏ பதவியை ராஜினாமா செய்துவிட்டு தவெக -வில் இணைந்த மரகதம் குமரவேலை தவெக இத்தேர்தலில் வேட்பாளராகக் களமிறக்கியுள்ளது.

தவெக தொண்டர்களுக்காக சிறப்பு ஏற்பாடு

• முதல்வர் விஜய்யின் பிரச்சாரத்தைக் காண அதிக அளவிலான தொண்டர்களும், பொதுமக்களும் வருவார்கள் என எதிர்பார்க்கப்படுவதால், பிரச்சாரம் நடக்கவுள்ள இடத்தில் அனைத்து வித ஏற்பாடுகளும் செய்யப்பட்டு வருகின்றன.
• அசம்பாவிதங்கள் ஏற்படாமல் இருக்கவும், போகுவரத்து நெரிசல்களை கட்டுப்படுத்தவும் அந்த பகுதியில் பலத்த காலவ்துறை பாதுகாப்பு போடப்பட்டுள்ளது.
• பிரச்சாரத்திற்கு வருபவர்களுக்கு குடிநீர் பாட்டில்களுடம் பிஸ்கட், மிக்சர் போன்ற தின்பண்டங்களை வழங்கவும் ஏற்பாடு செய்யப்பட்டுள்ளது.

மேலும் படிக்க | Tamil News LIVE: CM விஜய் பரப்புரை; சூடுபிடிக்கும் ஜெம் வீரமணி வழக்கு; பதக்கங்களை குவிக்கும் இந்தியா

QR குறியீடு மூலம் அனுமதி

இதற்கிடையில், வெள்ளிக்கிழமை (செப்டம்பர் 25) முதல்வர் விஜய் கலந்துகொள்ளவிருக்கும் பிரச்சாரக் கூட்டத்தில் பங்கேற்க 5,000 பேருக்கு மட்டுமே அனுமதி அளிக்கப்பட்டுள்ளதாக கட்சி நிர்வாகம் சார்பில் தெரிவிக்கப்பட்டுள்ளது. இவர்களுக்கு கியூஆர் (QR) குறியீடு கொண்ட அனுமதிச் சீட்டுகள் வழங்கப்பட்டுள்ளன.

செங்கல்பட்டு மாவட்டம், ஆத்தூர் சுங்கச்சாவடிக்கு அருகே பிற்பகல் 3 மணியளவில் விஜயின் பிரச்சாரக் கூட்டம் நடைபெறும் என்று கட்சியின் பொதுச் செயலாளரும் (தலைமையகம்) ஊரக வளர்ச்சி மற்றும் நீர்வளத்துறை அமைச்சருமான என். ஆனந்த் தெரிவித்துள்ளார். காவல்துறை விதிமுறைகளின்படி அனுமதி பெற்றவர்களுக்கு மட்டுமே இந்தக் கூட்டம் ஏற்பாடு செய்யப்பட்டுள்ளதாகக் கட்சியின் அதிகாரப்பூர்வ சமூக ஊடகப் பக்கத்தில் அவர் குறிப்பிட்டுள்ளார்.

பாதுகாப்பு முன்னெச்சரிக்கை நடவடிக்கையாக கர்ப்பிணிப் பெண்கள், குழந்தைகள், பள்ளி மாணவர்கள், முதியவர்கள், மாற்றுத்திறனாளிகள் மற்றும் உடல்நலக்குறைவு உள்ளவர்களுக்கு கியூஆர் அனுமதிச் சீட்டுகள் வழங்கப்படவில்லை என்று கட்சி தெரிவித்துள்ளது. கூட்டத்தில் பங்கேற்பவர்களுக்குக் குடிநீர் மற்றும் மருத்துவ வசதிகள் ஏற்பாடு செய்யப்பட்டுள்ளதாகவும் அது கூறியுள்ளது.

அமைச்சர் ஆதவ் அர்ஜுனாவுடன் இணைந்து வாக்குச்சாவடி முகவர்களிடம் பேசிய ஆனந்த், மக்களின் குறைகளை விரைவாகத் தீர்ப்பதில் அரசு கொண்டுள்ள உறுதிப்பாட்டை விளக்கினார். சாலை வசதி மற்றும் குடிநீர் விநியோகம் உள்ளிட்ட அத்தியாவசியத் தேவைகள் மூன்று முதல் நான்கு மாதங்களுக்குள் நிறைவேற்றப்படும் என்று வாக்காளர்களிடம் உறுதியளித்து, அச்சமின்றி வீடு வீடாகச் சென்று பிரச்சாரம் செய்யுமாறு கட்சித் தொண்டர்களை அவர் கேட்டுக்கொண்டார்.

மேலும் படிக்க | ஜெம் வீரமணி வழக்கு: யாரையும் காப்பாற்ற உத்தரவிடவில்லை... ஸ்டாலின் சொன்ன விளக்கம்

"முதல்வர் விஜய் பிற்பகல் 3 மணிக்கு வாக்குச்சாவடி முகவர்களை சந்திப்பார்" என்று கூறிய அமைச்சர் ஆனந்த், மேலும் கூறியதாவது:

"முதலமைச்சர் பொறுப்பு வழங்கும் ஒவ்வொரு தொகுதியிலும், அந்தந்த தொகுதி சட்டமன்ற உறுப்பினருடன் இணைந்து அமைச்சர்கள் இரண்டு அல்லது மூன்று நாட்கள் தங்கி, மக்களின் தேவைகள் மற்றும் பிரச்சினைகளைக் கண்டறிவார்கள்; இதற்கெனக் குறைகேட்பு நாட்களை ஒதுக்கி, ஒவ்வொரு பிரச்சினையையும் விரைவாகத் தீர்த்து வைப்பார்கள்."

ஒரு லட்சம் வாக்குகள் வித்தியாசத்தில் வெற்றி பெற வேண்டும்: அமைச்சர் ஆதவ் அர்ஜுனா

இதற்கிடையில், மதுராந்தகத்தில் நடைபெற்ற தேர்தல் பொறுப்பாளர்கள் மற்றும் வாக்குச்சாவடி முகவர்கள் கூட்டத்தில் பேசிய டிவிகே பொதுச் செயலாளர் (தேர்தல் பிரச்சார மேலாண்மை) மற்றும் பொதுப்பணித்துறை அமைச்சர் ஆதவ் அர்ஜுனா, சமூக நீதி விவகாரத்தில் திமுகவின் செயல்பாட்டைக் கேள்விக்குள்ளாக்கினார்; தனது ஐந்தாண்டு ஆட்சிக் காலத்தில் ஏன் சாதிவாரி கணக்கெடுப்பை நடத்தவில்லை என்று அவர் வினவினார். மதுராந்தகம் மற்றும் தாராபுரம் இடைத்தேர்தல்களில் கட்சி ஒரு லட்சம் வாக்குகள் வித்தியாசத்தில் வெற்றி பெற வேண்டும் என்றும் ஆதவ் அர்ஜுனா வலியுறுத்தினார்.

மேலும் படிக்க | 2 ஐபிஎஸ் அதிகாரிகள் காத்திருப்போர் பட்டியலுக்கு மாற்றம்... ஜெம் வீரமணி வழக்கு காரணமா?