டிஎன்பிஎஸ்சி குரூப் 4 தேர்வு அப்டேட்! அதிக காலிப்பணியிடங்களுடன் வெளியாகும் அறிவிப்பு

தமிழ்நாட்டில் உள்ள மாநகராட்சிகள், நகராட்சிகள் மற்றும் பேரூராட்சிகள் உள்ளிட்ட நகர்ப்புற உள்ளாட்சி அமைப்புகளில் காலியாக உள்ள பணியிடங்களை இனி தமிழ்நாடு அரசுப் பணியாளர் தேர்வாணையம் (TNPSC) மூலமாகவே நிரப்புவதற்கான சட்டத்திருத்தம் அரசிதழில் வெளியிடப்பட்டு உடனடியாக அமலுக்கு வந்துள்ளது. இதைத் தொடர்ந்து, அரசுத் துறைகளில் காலிப்பணியிடங்களை கணக்கிடும் பணி முழுவீச்சில் நடைபெற்று வருவதால், இந்த ஆண்டுக்கான டிஎன்பிஎஸ்சி குரூப் 4 தேர்வில் கூடுதல் இடங்கள் சேர்க்கப்படும் என்ற எதிர்பார்ப்பு எழுந்துள்ளது.  

உள்ளாட்சிப் பணியிடங்கள் TNPSC-க்கு மாற்றம்

சமீபத்தில் நிறைவேற்றப்பட்ட Tamil Nadu Public Service Commission (Additional Functions) Amendment Act, 2026-க்கு ஆளுநர் ஒப்புதல் அளித்ததையடுத்து அது தமிழ்நாடு அரசிதழில் வெளியிடப்பட்டுள்ளது. இதன் மூலம் நகர்ப்புற உள்ளாட்சிகளில் நிலவி வந்த நேரடி மற்றும் தற்காலிக பணி நியமன முறைகளுக்கு முற்றுப்புள்ளி வைக்கப்பட்டு, முழுமையான வெளிப்படைத்தன்மையுடன் TNPSC வாயிலாகப் பணியாளர்கள் தேர்ந்தெடுக்கப்பட உள்ளனர்.  

காலிப்பணியிடங்கள் விவரங்கள் சேகரிப்பு தீவிரம்:

சட்டம் உடனடியாக அமலுக்கு வந்துள்ளதால், தமிழ்நாடு முழுவதும் உள்ள பல்வேறு அரசுத் துறைகள் மட்டுமின்றி, தற்போது நகர்ப்புற உள்ளாட்சி அமைப்புகளிலும் காலியாக இருக்கும் பணியிடங்களின் பட்டியலைத் துல்லியமாகத் திரட்டுமாறு அதிகாரிகளுக்கு உத்தரவிடப்பட்டுள்ளது.

இளநிலை உதவியாளர்

தட்டச்சர்

சுருக்கெழுத்து தட்டச்சர்

வரி வசூலிப்பாளர்

உள்ளிட்ட அடிப்படைப் பணியிடங்களின் எண்ணிக்கை அந்தந்த நகராட்சி, மாநகராட்சி நிர்வாகங்களிடம் இருந்து விரைவாகப் பெறப்பட்டு வருகின்றன.

குரூப் 4 அறிவிப்பு: அக்டோபர் இறுதி அல்லது நவம்பரில் வெளியீடு?

சேகரிக்கப்படும் காலிப்பணியிடங்களின் விவரங்களை ஒருங்கிணைக்கும் பணிகள் விறுவிறுப்பாக நடைபெற்று வருகின்றன. எனவே, இந்த ஆண்டிற்கான குரூப் 4 தேர்வு அறிவிப்பை அக்டோபர் இறுதி அல்லது நவம்பர் இறுதிக்குள் முறைப்படி வெளியிட அரசு மற்றும் தேர்வாணையம் தீவிர திட்டமிடலில் ஈடுபட்டுள்ளன.

ஏற்கனவே அறிவிக்கப்பட வேண்டிய வழக்கமான பணியிடங்களுடன், புதிதாக நகர்ப்புற உள்ளாட்சி பணியிடங்களும் இதில் பெருமளவில் சேர்க்கப்பட உள்ளதால், காலிப்பணியிடங்களின் எண்ணிக்கை எதிர்பாராத அளவிற்கு உயரும் என்று கோட்டை வட்டாரங்கள் தெரிவிக்கின்றன.

தேர்வர்கள் எதிர்பார்ப்பு:

பொதுவாக டிஎன்பிஎஸ்சி குரூப் 4 தேர்வை 15 லட்சத்திற்கும் மேற்பட்ட தேர்வர்கள் எழுதுவது வழக்கம். இம்முறை பத்தாம் வகுப்பு கல்வித் தகுதி கொண்ட இத்தேர்வில் நகர்ப்புற உள்ளாட்சிப் பணியிடங்களும் உள்வாங்கப்படுவதால், ஆயிரக்கணக்கான கூடுதல் இடங்கள் ஒரே அறிவிக்கையில் கிடைக்க வாய்ப்பு ஏற்பட்டுள்ளது. கடுமையான போட்டிக்கு நடுவே தேர்ச்சி பெறுபவர்களுக்கான வேலைவாய்ப்பு உத்தரவாதம் கணிசமாக அதிகரித்துள்ளது. நகர்ப்புற பகுதியிலேயே பணிபுரியும் நல்ல வாய்ப்பு கிராமப்புற மற்றும் நகர்ப்புற இளைஞர்களுக்கு எளிதில் கிட்டும்.

நீண்ட நாட்களாக அரசுப் பணிக்காகக் கடுமையாக உழைத்து படித்து வரும் லட்சக்கணக்கான இளைஞர்களுக்கு இந்த நடவடிக்கை மகிழ்ச்சியையும், உற்சாகத்தையும் கொடுத்துள்ளது.