டிஎன்பிஎஸ்சி குட்நியூஸ்: மாநகராட்சி, நகராட்சி பணிகள் குரூப் தேர்வுகளில் சேர்ப்பு!

TNPSC Recruitment : தமிழ்நாட்டில் உள்ள மாநகராட்சிகள், நகராட்சிகள் மற்றும் பேரூராட்சிகள் உள்ளிட்ட நகர்ப்புற உள்ளாட்சி அமைப்புகளில் உள்ள அனைத்துக் காலிப்பணியிடங்களையும் தமிழ்நாடு அரசுப் பணியாளர் தேர்வாணையம் (TNPSC) மூலமாக மட்டுமே நேரடியாக நிரப்புவதற்கான சட்டத்திருத்த மசோதாவுக்கு ஆளுநர் ஒப்புதல் அளித்துள்ளார். தமிழ்நாடு சட்டப்பேரவையில் நிறைவேற்றப்பட்ட இச்சட்டத்திருத்த மசோதாவுக்கு (Act No. 21 of 2026) ஆளுநர் ஒப்புதல் அளித்ததைத் தொடர்ந்து, சட்டத்துறை இதனைத் தமிழ்நாடு அரசிதழில் அதிகாரப்பூர்வமாக வெளியிட்டுள்ளது.

நேரடி நியமன முறைக்கு முற்றுப்புள்ளி

இதுநாள் வரை நகராட்சி நிர்வாகம் மற்றும் குடிநீர் வழங்கல் துறைக்கு உட்பட்ட மாநகராட்சிகள், நகராட்சிகள் மற்றும் பேரூராட்சிகளில் உள்ள காலிப்பணியிடங்கள் அனைத்தும் அந்தந்த உள்ளாட்சி அமைப்புகளின் மூலமாகவே நேரடியாக ஆட்கள் தேர்வு செய்யப்பட்டு நிரப்பப்பட்டு வந்தன. இதனால் மாநில அளவில் ஒருங்கிணைந்த தேர்வு முறை இல்லாமல் இருந்தது. தற்போது தமிழ்நாடு அரசு பணியாளர் தேர்வாணைய (கூடுதல் பணிகள்) திருத்தச் சட்டம் 2026 (The Tamil Nadu Public Service Commission (Additional Functions) Amendment Act, 2026) நடைமுறைக்கு வந்துள்ளதால், அனைத்து நியமனங்களும் இனி மாநில அளவிலான டிஎன்பிஎஸ்சி பொதுத் தேர்வுகள் மூலம் மட்டுமே மேற்கொள்ளப்படும்.  

எந்தெந்தப் பணிகள் டிஎன்பிஎஸ்சி வரம்பிற்குள் வரும்?

இந்த புதிய சட்ட நடைமுறையின் மூலம், சென்னை உள்ளிட்ட தமிழகத்தின் 25 மாநகராட்சிகள், 142 நகராட்சிகள் மற்றும் 528 பேரூராட்சிகளில் உள்ள அனைத்துப் பணியிடங்களும் டிஎன்பிஎஸ்சி தேர்வுகளின் கீழ் கொண்டுவரப்பட்டுள்ளன. இளநிலை உதவியாளர், உதவியாளர், தட்டச்சர், சுருக்கெழுத்து தட்டச்சர், பணி மேற்பார்வையாளர், தொழில்நுட்ப உதவியாளர், இளநிலை பொறியாளர், உதவி பொறியாளர் உள்ளிட்ட பல்வேறு தொழில்நுட்ப மற்றும் நிர்வாகப் பணியிடங்கள் அனைத்தும் இனி டிஎன்பிஎஸ்சி நடத்தும் போட்டித் தேர்வுகள் மூலமாகவே நிரப்பப்படும்.

காலிப்பணியிடங்களின் எண்ணிக்கை உயரும்

நகர்ப்புற உள்ளாட்சி அமைப்புகளின் பதவி நிலைகளுக்கு ஏற்ப, இந்தப் பணியிடங்கள் அனைத்தும் டிஎன்பிஎஸ்சி குரூப் 4, குரூப் 2, குரூப் 2 ஏ மற்றும் ஒருங்கிணைந்த தொழில்நுட்பப் பணிகள் போன்ற தேர்வுகளுடன் இணைக்கப்படும். இதன் காரணமாக, ஒவ்வொரு ஆண்டும் டிஎன்பிஎஸ்சி மூலம் அறிவிக்கப்படும் குரூப் 4 மற்றும் குரூப் 2 காலிப்பணியிடங்களின் எண்ணிக்கை பல்லாயிரக்கணக்கில் கணிசமாக உயரும். இது அரசுப் பணிக்குத் தயாராகும் லட்சக்கணக்கான கிராமப்புற மற்றும் நகர்ப்புற இளைஞர்களுக்குப் பெரும் வாய்ப்பாக அமையும்.

முன்னுரிமை

இச்சட்டத்திருத்தத்தின் மூலம், உள்ளாட்சி அமைப்புகளின் பணி நியமனங்களில் இடைத்தரகர்களின் தலையீடுகள் தவிர்க்கப்பட்டு முழுமையான வெளிப்படைத்தன்மை உறுதி செய்யப்படும். ஒரே மாதிரியான மாநில அளவிலான பாடத்திட்டம் மற்றும் பொதுவான போட்டித் தேர்வுகள் வழியாக தகுதி மற்றும் திறமையின் அடிப்படையில் மட்டுமே விண்ணப்பதாரர்கள் தேர்வு செய்யப்படுவர் என்பதால், உள்ளாட்சி அமைப்புகளின் நிர்வாகத் திறனும் சேவைகளும் கணிசமாக மேம்படும் என எதிர்பார்க்கப்படுகிறது.