’காங்கிரஸூடன் இணைய வாய்ப்பே இல்லை’ திமுக கறார்

திமுக - காங்கிரஸ் உறவு

தமிழக அரசியல் வரலாற்றில் நீண்ட காலமாக நீடித்து வந்த திமுக - காங்கிரஸ் உறவு இனி மீண்டும் இணையா வாய்ப்பே இல்லை என்று திமுக தரப்பில் திட்டவட்டமாகத் தெரிவிக்கப்பட்டுள்ளது. "முடிந்தது முடிந்ததுதான்.. இனி காங்கிரசுடன் எந்தவித சமரசமும் அல்லது ஒட்டுப்போடும் பேச்சுவார்த்தையும் கிடையாது" என்று திமுக தரப்பு டெல்லியில் வெளிப்படையாகக் கூறிவிட்டதாம்.

திமுகவின் ஆதரவு அவசியம்

தமிழகத்தில் விஜய் தலைமையிலான தமிழக வெற்றிக் கழகத்துடன் (தவெக) காங்கிரஸ் கைகோர்த்த போதே இரு கட்சிகளுக்கும் இடையேயான உறவு முற்றிலும் முறிந்தது. எனினும், தேசிய அளவில் பாஜகவிற்கு எதிராக பவரை நிரூபிக்க திமுகவின் ஆதரவு அவசியம் என்பதால், காங்கிரசின் மூத்த தலைவர்கள் தொடர்ந்து சமாதானத் தூது அனுப்பி வந்தனர்.

திமுக மூத்த தலைவர்கள் பதிலடி

இதற்கு திமுக மூத்த தலைவர்கள் திட்டவட்டமாகப் பதிலடி கொடுத்துள்ளனர். சமரசத்திற்கு வழியே இல்லை: "கடந்த காலம் முடிந்துவிட்டது. இனி மீண்டும் காங்கிரசுடன் ஒட்டிக்கொள்ளும் பேச்சுக்கே இடமில்லை. மாநில அளவில் தவெகவுக்குப் பின்னால் சென்றுவிட்டு, டெல்லியில் எங்களுக்கு ஆதரவு கேட்பதை எங்களால் ஏற்க முடியாது.

திமுக ஒருபோதும் அங்கீகரிக்காது

"அதிகாரப் பகிர்வுக்காகத் தமிழகத்தில் ஒரு கட்சியுடனும், தேசிய அளவில் எங்களுடனும் உறவு பாராட்ட நினைப்பது சந்தர்ப்பவாத அரசியல். அதை திமுக ஒருபோதும் அங்கீகரிக்காது." அதே நேரத்தில் மக்கள் நலன் சார்ந்த மற்றும் ஜனநாயகப் போராட்டங்களில் காங்கிரஸ் கட்சிக்கு வெளியிலிருந்து கள ஆதரவு தரப்படும்.

திமுகவின் ஒரே திட்டம்

ஆனால், தேர்தல் கூட்டணி, தொகுதிப் பங்கீடு, அல்லது 'இந்தியா' கூட்டணியின் அதிகாரப்பூர்வ கூட்டங்களில் பங்கெடுப்பது போன்ற எதற்கும் இடமில்லை" என்று திமுக தெளிவுபடுத்தி உள்ளதாம். திமுகவின் இந்த முடிவின் மூலம், காங்கிரசுடனான கதவுகள் நிரந்தரமாக அடைக்கப்பட்டுவிட்டதும், எதிர்காலத்தில் மாநிலக் கட்சிகளைத் திரட்டி மாற்று சக்தியாக களம் காண்பதே திமுகவின் ஒரே திட்டம் என்பதும் உறுதியாகியுள்ளது.