ராஜராஜ சோழன் கெட்டப்பில் அமைச்சர் நமச்சிவாயம்: புதுவையில் போஸ்டர் மோதலால் பரபரப்பு!

புதுச்சேரியில் முதலமைச்சர் ரங்கசாமியின் பிறந்தநாளைத் தொடர்ந்து, வரும் செப்டம்பர் 8-ஆம் தேதி நடைபெறவுள்ள அமைச்சர் நமச்சிவாயத்தின் பிறந்தநாளுக்காக ஒட்டப்பட்டுள்ள போஸ்டர்கள் நகர மக்களிடையே பெரும் கவனத்தை ஈர்த்து வருகின்றன.

புதுவை முதலமைச்சர் ரங்கசாமி பிறந்தநாளின் போது, அவரைச் சினிமா நடிகர்கள், விளையாட்டு வீரர்கள் போன்ற பலவித கெட்டப்புகளில் சித்தரித்துப் போஸ்டர்கள் வைப்பது என்.ஆர்.காங்கிரசாரின் வழக்கமாக இருந்து வருகிறது. இந்நிலையில், அமைச்சர் நமச்சிவாயத்தின் ஆதரவாளர்களும் போட்டி போட்டுக்கொண்டு அவருக்குப் பல்வேறு தோற்றங்களில் பேனர்கள் மற்றும் போஸ்டர்களை வைத்துள்ளனர்.

குறிப்பாக, புதுவை நகரப் பகுதிகளில் அமைச்சர் நமச்சிவாயத்தை 'ராஜராஜ சோழன்' கெட்டப்பில் சித்தரித்து ஒட்டப்பட்டுள்ள போஸ்டர்கள் தற்போது புதுச்சேரி அரசியலிலும் பொதுமக்கள் மத்தியிலும் விவாதப் பொருளாக மாறியுள்ளன.