அரிசி விலை உயர்வை குறைக்க தமிழக அரசு திட்டம்: கிலோ ரூ.50-க்குள் இனி வாங்கலாம்.. எப்படி?

சென்னை: பண்டிகை காலம் தொடங்கியுள்ள நிலையில், தமிழகத்தில் நாளுக்கு நாள் அரிசியின் விலை அதிகரிப்பது மக்களை கடும் அவதிக்கு ஆளாக்கியுள்ளது. இதனால் நடுத்தர மக்களும், ஏழை, எளிய மக்களும் செய்வதறியாமல் தவித்து வருகின்றனர். மக்களின் இந்த பிரச்சனையை சரி செய்ய தமிழக அரசு முழு முனைப்புடன் நடவடிக்கை எடுத்து வருவதாக அரசாங்க வட்டாரங்கள் தெரிவிக்கின்றன.

தமிழகத்தில் கூட்டுறவு அங்காடிகளில் ஒரு கிலோ அரிசியை ரூ.40 முதல் ரூ.50-க்குள் விற்பனை செய்வது தொடர்பாக தமிழக அரசு பரிசீலித்து வருகிறது. அரசின் இந்த பரிசீலனை நடைமுறைக்கு வந்தால் மக்களுக்கு அது பெரிய நிவாரணமாக அமையும். அதிக விலை கொடுத்து அரிசியை வாங்கி வரும் மக்களுக்கு இது பெரும் நிவாரணமாக அமையும்.

தமிழகத்தில் அதிகரிக்கும் அரிசி விலை

தமிழகத்தில் அரிசி தட்டுப்பாடு மற்றும் வரத்து குறைவு காரணமாக, அத்தியாவசிய உணவான அரிசியின் விலை தொடர்ந்து அதிகரித்து வருகிறது. கடந்த ஆகஸ்ட் மாதத்தில் ஒரு கிலோ ரூ.50 முதல் ரூ.60 வரை விற்பனையான சன்ன ரக அரிசி, தற்போது அக்டோபர் மாதத்தில் ரூ.70 முதல் ரூ.80 வரை உயர்ந்துள்ளது.

அதாவது கிலோவுக்கு ரூ.20 வரை விலை அதிகரித்துள்ளது. அரிசியுடன் சேர்த்து பருப்பு வகைகள், சமையல் எண்ணெய் போன்ற பிற அத்தியாவசியப் பொருட்களின் விலைகளும் உயர்ந்துள்ளதால், நடுத்தர மற்றும் எளிய குடும்பங்களின் அன்றாட வாழ்க்கைச் செலவு பெருமளவில் பாதிக்கப்பட்டுள்ளது.

மேலும் படிக்க | காலை உணவுத் திட்ட மெனு பட்டியல் - மாணவ, மாணவிகளின் ரியாக்ஷன்

தமிழகத்தில் பெரும்பாலான குடும்பங்களின் காலை, மதியம் மற்றும் இரவு உணவுகளில் அரிசியே முதன்மையான இடத்தை வகிக்கிறது. இதனால் அரிசி விலையில் ஏற்படும் சிறிய உயர்வு கூட குடும்ப வரவு செலவில் பெரும் தாக்கத்தை ஏற்படுத்துகிறது.

உதாரணமாக, ஆகஸ்ட் மாதத்தில் ரூ.1,000 செலவில் 20 கிலோ அரிசி வாங்கிய ஒரு குடும்பம், தற்போதைய விலையேற்றத்தால் அதே அளவு அரிசியை வாங்க ரூ.1,400 முதல் ரூ.1,600 வரை செலவிட வேண்டியுள்ளது. இதனால் மாதம் 20 கிலோ அரிசி வாங்கும் குடும்பங்களுக்கு ரூ.400 முதல் ரூ.600 வரை கூடுதல் செலவு ஏற்பட்டு, அவர்களின் மாதாந்திர குடும்பப் பட்ஜெட் கடுமையாகப் பாதிக்கப்பட்டுள்ளது.

தமிழக அரசு நடவடிக்கை

அரிசி விலை அதிகரிக்கும் நிலையில், விலை உயர்வைக் கட்டுப்படுத்துவது தொடர்பாக உணவுத்துறை அமைச்சர் வெங்கடரமணன் தலைமையில் விலை கண்காணிப்புக் குழு ஆய்வுக் கூட்டம் சென்னையில் நடைபெற்றது. இந்தக் கூட்டத்தில் உணவுத்துறை செயலாளர் அமுதா, தலைமைச் செயலாளர் சாய்குமார், நிதித்துறை செயலாளர் சித்திக் உள்ளிட்ட பல அதிகாரிகள் கலந்துகொண்டனர்.

மேலும் படிக்க | கோயில்களில் செல்போன் எடுத்து செல்லலாம்.. ஆனா ஒரு கண்டீஷன்.. புதிய விதிகள் என்ன?

இந்தக் கூட்டத்தில் அரிசி உட்பட அத்தியாவசியப் பொருட்களின் விலையை கட்டுப்படுத்துவது குறித்து அதிகாரிகள் ஆலோசனை நடத்தியதாக வட்டாரங்கள் தெரிவிக்கின்றன. அந்த ஆலோசனைகளின் முக்கிய விவரங்கள் பின்வருமாறு:

• இந்திய உணவுக் கழகம் மற்றும் பிற மாநிலங்களிலிருந்து சன்ன ர்டக அரிசியைக் கொள்முதல் செய்து, கூட்டுறவு அங்காடிகள் மூலம் குறைந்த விலையில் விற்பனை செய்வது பற்றி பரிசீலிக்கப்பட்டது.
• சன்ன ரக அரிசியை ரூ.40 முதல் ரூ.50-க்குள் விற்பனை செய்வதற்கான சாத்தியக்கூறுகள் ஆராயப்பட்டு வருகின்றன.
• எந்ததெந்த மாநிலங்களிலிருந்து அரிசியை கொள்முதல் செய்யலாம் என்பது குறித்த ஆய்வுகளை அதிகாரிகள் நடத்தி வருகின்றனர்.
• அரிசி கிடைக்கக்கூடிய அளவு குறித்தும் மதிப்பீடுகள் செய்யப்படுகின்றன.
• அரசியை கொள்முதல் செய்யும் வழிகள் பற்றியும் பரிசீலிக்கப்பட்டு வருகின்றது.

இந்த வழிகளின் மூலம் 1 டன் அரிசி கிடைப்பது உறுதியானால், அதன் மூலம் கூட்டுறவு அங்காடிகளில் குறைந்த விலையில் அரிசியை விற்பனை செய்ய தமிழக அரசு உடனடியாக நடவடிக்கை எடுக்கப்படும் என அதிகாரிகள் தெரிவித்தனர்.

குறைந்த விலையில் அரிசியை எப்படி வாங்குவது?

கூட்டுறவு அங்காடிகளில் அரிசி வாங்க விரும்புவோர், அங்கு விற்பனை தொடங்கப்பட்டுள்ளதா என்பதை உறுதி செய்து, அரிசியின் ரகம், தரம் மற்றும் கிலோ விலையைக் கேட்டறிய வேண்டும். ஒரு குடும்பத்திற்கு வழங்கும் அளவு மற்றும் அடையாள ஆவணங்கள் குறித்த விவரங்களை விற்பனை மையத்தில் விசாரித்து, வாங்கியதற்கான ரசீதைப் பெற்றுக்கொள்ள வேண்டும்.

தமிழக அரசின் அரிசி கொள்முதல் நடவடிக்கை முழுமைபெற்று, மக்களுக்கு குறைந்த விலையில் அரிசி கிடைக்கத் தொடங்கினால், அது, இந்த பண்டிகை காலத்தில் மக்களுக்கு மிகப்பெரிய நிவாரணமாக அமையும்.

மேலும் படிக்க | தீய சக்தி திமுக; கொத்து பரோட்டா.. கக்கூஸ் லீடர்! பேருந்து போர்டில் சர்ச்சைககுரிய வாசகம்.. வைரல் வீடியோ!