உறவினரிடமே கைவரிசை காட்டிய பெண்.. கோவையில் 15 பவுன் திருட்டு! தூக்கிய போலீஸ்

கோவை பெரியநாயக்கன்பாளையம் அருகே வீட்டில் ஆள் இல்லாததை பயன்படுத்தி 15 சவரன் தங்க நகைகளை திருடிய பெண்ணை, புகார் அளிக்கப்பட்ட 12 மணி நேரத்திற்குள் போலீசார் கைது செய்தனர். அவரிடமிருந்து திருடப்பட்ட நகைகளும் மீட்கப்பட்டன.

கோவை ஜோதிபுரம் கார்ப்பூரா நகரை சேர்ந்தவர் தினேஷ் பாபு. தனியார் நிறுவனத்தில் பணியாற்றி வரும் இவர், தனது மனைவி, குழந்தைகள் மற்றும் பெற்றோருடன் வசித்து வருகிறார். தீபாவளி பண்டிகையை முன்னிட்டு, மனைவி மற்றும் குழந்தைகளுடன் அன்னூரில் உள்ள மாமியார் வீட்டிற்கு சென்றுள்ளார்.

மறுநாள் வீட்டிற்கு திரும்பியபோது, பீரோவில் வைத்திருந்த 15 சவரன் தங்க நகைகள் காணாமல் போனதை கண்டு அதிர்ச்சியடைந்தார். வீட்டின் கதவு அல்லது பீரோவில் எந்தவித உடைப்பும் இல்லாததால், மர்மமான முறையில் நகைகள் திருடப்பட்டது தெரியவந்தது. இதுகுறித்து பெரியநாயக்கன்பாளையம் காவல் நிலையத்தில் புகார் அளித்தார்.

புகாரின் அடிப்படையில் போலீசார் விசாரணை நடத்தியபோது, தினேஷ் பாபுவின் பெற்றோர் அருகிலுள்ள நாயக்கனூரில் வசிக்கும் தங்களது உறவினரான சுசீலா என்பவரின் வீட்டிற்குச் சென்றிருந்தது தெரியவந்தது. இதைப் பயன்படுத்திக்கொண்ட சுசீலா, அதிகாலை நேரத்தில் தினேஷ் பாபுவின் வீட்டிற்குச் சென்றுள்ளார். அங்கு வழக்கமாக சாவியை மறைத்து வைக்கும் இடத்திலிருந்து சாவியை எடுத்த அவர், வீட்டை திறந்து உள்ளே சென்றுள்ளார். பின்னர் பீரோவையும் திறந்து அதிலிருந்த 15 சவரன் தங்க நகைகளைத் திருடிச் சென்றதாக கூறப்படுகிறது.

இதையடுத்து போலீசார் மேற்கொண்ட விசாரணையில், புகார் அளிக்கப்பட்ட 12 மணி நேரத்திற்குள் சுசீலாவை கண்டறிந்து கைது செய்தனர். அவரிடமிருந்து திருடப்பட்ட 15 சவரன் தங்க நகைகளும் மீட்கப்பட்டன. தொடர்ந்து நீதிமன்றத்தில் ஆஜர்படுத்தப்பட்ட சுசீலா, கோவை மத்திய சிறையில் நீதிமன்ற காவலில் அடைக்கப்பட்டார்.