Silicon Valley’s Secret ‘Whisper Network’: சிலிக்கான் வேலியில் ஒரு அதிர்ச்சியூட்டும் விவகாரம் வெளிச்சத்திற்கு வந்துள்ளது. பாலியல் அத்துமீறல் குற்றச்சாட்டுகளுக்கு ஆளான நூற்றுக்கும் மேற்பட்ட நபர்களின் பெயர்களைக் கொண்ட ஒரு ஸ்ப்ரெட்ஷீட் கண்டறியப்பட்டுள்ளதாக 'தி நியூயார்க் போஸ்ட்' தகவல் வெளியிட்டுள்ளது.
இந்தப் பட்டியலில் முக்கிய முதலீட்டாளர்கள், தொழிலதிபர்கள் மற்றும் தொழில்நுட்பம் மற்றும் செயற்கை நுண்ணறிவுத் துறைகளில் உள்ள பெரிய நிறுவனங்களுடன் தொடர்புடைய நபர்கள் இடம்பெற்றுள்ளனர்.
பெண்களுக்கு இடையிலான விஸ்பர் நெட்வொர்க்
சிலிக்கான் வேலியில் உள்ள பெண்கள் பாலியல் துன்புறுத்தல் குற்றச்சாட்டுகள் குறித்து ஒருவருக்கொருவர் எச்சரித்துக்கொள்ளப் பயன்படுத்தும் "விஸ்பர் நெட்வொர்க்" (whisper network - ரகசியத் தகவல் பரிமாற்றக் கட்டமைப்பு) எனப்படும் அமைப்பின் ஒரு பகுதியாகவே இந்தத் தனிப்பட்ட ஆவணம் உள்ளதாக இந்தப் பட்டியலைப் பார்த்தவர்கள் கூறுகிறார்கள்.
போதைப்பொருட்களைப் பயன்படுத்தி பாலியல் தாக்குதல் முதல் பாலியல் பலாத்காரம் வரையிலான குற்றச்சாட்டுகள் இந்த ஸ்ப்ரெட்ஷீட்டில் விவரிக்கப்பட்டுள்ளதாகத் தகவல்கள் தெரிவிக்கின்றன.
பட்டியலில் பிரபலங்களின் பெயர்கள்
இருபதுகளிலுள்ள ஒரு தொழில்நுட்பத் துறைப் பெண் இது குறித்து தெரிவித்துள்ளார். பட்டியலில் இருந்த பெயர்களை முதலில் பார்த்தபோது அதிர்ச்சியடைந்ததாக அவர் கூறினார். அந்த அமைப்பில் உள்ள பெண்கள் தன்னைத் தொடர்புகொண்ட பிறகு, பாலியல் அத்துமீறல் தொடர்பான தனது சொந்த அனுபவத்தையும் அதில் இணைத்ததாக அவர் தெரிவித்தார்.
"அவர்களில் சிலர் மிகவும் பிரபலமான பெயர்கள், புகழ்பெற்ற முதலீட்டாளர்கள். இத்துறையில் தீவிரமாகச் செயல்படும் தொழிலதிபர்கள். நான் அவர்களை இதற்கு முன் பல விருந்துகளில் பார்த்திருக்கிறேன்," என்று குறிப்பிட்டார்.
பலரிடம் விசாரித்த பின்னரே அந்த அமைப்பைப் பற்றித் தெரிந்துகொண்டதாக அப்பெண் விளக்கினார்.
"அந்த 'விஸ்பர் நெட்வொர்க்கை' நிர்வகிக்கும் சில பெண்களை நான் சந்தித்தேன். அதில் நூற்றுக்கணக்கான வழக்குகள் உள்ளன. நான் பலரிடம் விசாரிக்கத் தொடங்கியதால்தான் அதைப் பற்றித் தெரிந்துகொண்டேன்," என்று அவர் ‘தி போஸ்ட்’ இதழிடம் கூறினார்.
காவல்துறையை அணுகுவதோ அல்லது சக்திவாய்ந்த நபர்கள் மீது பகிரங்கமாகக் குற்றம் சாட்டுவதோ தங்கள் தொழில் வாழ்க்கையைப் பாதிக்கும் என்று சில பெண்கள் அஞ்சுவதால், இத்தகைய தகவல்கள் தனிப்பட்ட முறையில் பரிமாறப்படுவதாகத் தகவல்கள் தெரிவிக்கின்றன.
அவர் மேலும் கூறுகையில், "எனது வழக்குக்காக நீதி கோரி அதில் தோல்வியடைந்தால், நகரத்தில் உள்ள அனைத்து முதலீட்டாளர்களும் என்னை 'கறுப்புப் பட்டியலில்' (blacklist) சேர்த்துவிடுவார்களோ என்று நான் கவலைப்பட்டேன்," என்றார்.
Hacker Houses: வேலை, நட்பு, விருந்துகள்
- இளம் நிறுவனர்கள், முதலீட்டாளர்கள் மற்றும் தொழில்நுட்பத் துறை ஊழியர்கள் ஒன்றாக வசித்து, பழகி, தொழில்முறைத் தொடர்புகளை வளர்த்துக்கொள்ளும் பகிரப்பட்ட வசிப்பிடங்கள் "ஹேக்கர் ஹவுஸ்கள்" என அழைக்கப்படுகின்றன.
- இந்த ஹேக்கர் ஹவுஸ்களில்தான் இப்படி பல சம்பவங்கள் நடந்ததாகக் கூறப்படுகின்றது.
- ஒரே சமையலறையைப் பகிர்ந்துகொள்பவர்கள் அல்லது ஒன்றாக விருந்துகளில் கலந்துகொள்பவர்கள் பெரும்பாலும் வணிகக் கூட்டாளிகள், முதலீட்டாளர்கள், சக ஊழியர்கள் அல்லது எதிர்கால முதலாளிகளாக மாறக்கூடும்.
முதலில் நட்பு, பின் எல்லை மீறல்
நட்பின் மூலம் நம்பிக்கையை வளர்த்துக்கொண்டு, பின்னர் தனிப்பட்ட எல்லைகள் மீறப்படும் ஒரு போக்கை சிலிக்கான் வேலியைச் சேர்ந்த ஒருவர் விவரித்தார். தனிமைப்படுத்தப்பட்டதாகவோ அல்லது பாதுகாப்பற்ற நிலையிலோ உணரும் நபர்களை,குறிப்பாக இளம் பெண்கள் மற்றும் அமெரிக்கா அல்லது சிலிக்கான் வேலிக்கு புதிதாக வந்தவர்களை, சில ஆண்கள் திட்டமிட்டு குறிவைப்பதாக உள்ளகத் தகவல் அறிந்த ஒருவர் குற்றம் சாட்டுகிறார்.
குற்றம் சாட்டப்பட்டவர்களோ அல்லது பாதிக்கப்பட்டவர்களோ ஒரு குறிப்பிட்ட பாலினத்தைச் சேர்ந்தவர்கள் மட்டுமல்ல என்பதையும் அந்த நபர் வலியுறுத்தினார்.
சான் பிரான்சிஸ்கோவில் உள்ள 'ஜெனிசிஸ்' எனும் ஹேக்கர் இல்லத்தின் முன்னாள் உறுப்பினர் ஒருவர் மீது பாலியல் வன்கொடுமை மற்றும் தாக்குதல் குற்றச்சாட்டுகளை முன்வைத்த பிறகு, 'Zette' செயலியின் நிறுவனர் யேஹோங் ஜூ (Yehong Zhu) தனது அனுபவத்தைப் பகிரங்கமாகப் பகிர்ந்துள்ளார்.
நான் தொடர்ந்து 'வேண்டாம்' என்று மறுத்துக்கொண்டே இருந்தேன்....
ஜூ டிசம்பர் 2021-ல் காவல் நிலையத்தில் தனக்கு நடந்த கொடூரம் பற்றி புகார் அளித்தார். அந்த நபர் தப்பி ஓடிவிட்டதாகவும், பொதுவான சமூக வட்டாரங்களில் உள்ளவர்களுடன் தொடர்பில் இருந்தபோதிலும் அவரைக் கண்டுபிடிக்கவோ அல்லது கைது செய்யவோ முடியவில்லை என்றும் அவர் கூறினார். "நான் தொடர்ந்து 'வேண்டாம்' என்று மறுத்துக்கொண்டே இருந்தேன்," என்று அவர் ‘தி போஸ்ட்’ இதழிடம் தெரிவித்தார்.
பாலியல் வன்கொடுமை நடந்ததாகக் கூறப்படும் சம்பவத்திற்குப் பிறகு, அந்தக் குற்றச்சாட்டு அந்த நபரின் நற்பெயரை எவ்வாறு பாதிக்கும் என்பது குறித்து தனது தோழி ஒருவரே கவலை தெரிவித்ததாக ஜூ கூறினார்.
மேலும், அந்த நபரை வீட்டிலிருந்து வெளியேற்ற முயன்றபோது, வீட்டை நிர்வகிப்பவர் ஒருவர் தன்னை காவல்துறையைத் தொடர்புகொள்வதைத் தடுத்ததாகவும், இவ்விஷயம் குறித்து வாக்கெடுப்பு நடத்த ஒரு குழுவை அமைக்கப் பரிந்துரைத்ததாகவும் அவர் குறிப்பிட்டார். இறுதியில், ஜூ காவல்துறையையும் வழக்கறிஞர்களையும் தொடர்புகொண்டதுடன், அந்த நபரின் இருப்பிடத்தைக் கண்டறிய அவரை அறிந்தவர்களிடமும் பேசினார். ஆனால், சிலர் இதில் தலையிட மறுத்துவிட்டதாக அவர் குறிப்பிட்டார்.
என்னால் நகரக்கூட முடியாத நிலையில் இருந்தேன்....
பெவர்லி ஹில்ஸில் உள்ள நிறுவனர்களுக்கான சமூக அமைப்பான 'லான்ச் ஹவுஸ்' -இன் மற்றொரு முன்னாள் உறுப்பினர் ஒரு மாறுபட்ட அனுபவத்தைப் பகிர்ந்துள்ளார். ஒரு விருந்தின்போது தனக்கு மயக்க மருந்து கொடுக்கப்பட்டிருக்கலாம் என்று அவர் சந்தேகித்தார். பெயர் குறிப்பிட விரும்பாத அந்தப் பெண், அன்று இரவு நடந்த சில நிகழ்வுகள் தனக்கு நினைவில் இல்லை என்றும், பின்னர் ஒரு தோழி தன்னை படுக்கைக்குச் செல்ல உதவியதை அறிந்துகொண்டதாகவும் கூறினார்.
"காய்ச்சல் வந்ததைப் போல நான் நடுங்கிக்கொண்டிருந்தேன், அதே சமயம் வியர்த்துக் கொட்டியது. என்னால் நகரக்கூட முடியாத நிலையில் வெயிலில் முற்றத்தில் கிடந்தேன்," என்று அவர் 'தி போஸ்ட்' இதழிடம் கூறினார். அதே நபர் மற்ற பெண்களையும் தவறான முறையில் தொட்டதாகவோ அல்லது முறையற்ற வகையில் நடந்துகொண்டதாகவோ அவர்கள் பின்னர் தன்னிடம் கூறியதாக அவர் மேலும் தெரிவித்தார்.
பாதிக்கப்பட்ட பெண்கள் ஒன்றிணைந்து அந்த இல்லத்தின் நிறுவனர்களை அணுகினர். "அவர்கள் உடனடியாக அவரை வெளியேற்றினர்; அவர் அந்த வீட்டிலிருந்து விரட்டப்பட்டார்," என்று அந்தப் பெண் கூறினார். இணை நிறுவனர் பிரட் கோல்ட்ஸ்டீன் மற்றும் மற்றொரு நிறுவனர் ஆகியோர் அப்பெண்களிடம் பேசியதாகவும், வீட்டின் பூட்டுகளை மாற்றியதாகவும், காவல்துறையைத் தொடர்புகொள்ள உதவுவதாக உறுதியளித்ததாகவும் அவர் விளக்கினார்.
இறுதியில், அந்தச் சம்பவத்தைப் பற்றிப் புகார் அளிக்க வேண்டாம் என்று அவர்கள் முடிவு செய்தனர். ஏனெனில், என்ன நடந்தது என்பதை அவரால் துல்லியமாக நினைவுகூர முடியவில்லை, மேலும் சாட்சிகள் மூலம் அதை நிரூபிக்க முடியும் என்றும் அவர் நம்பவில்லை. "நான் அங்கேயே தங்கியிருந்தேன், அந்த வீட்டில் பாதுகாப்பாகவும் உணர்ந்தேன்," என்றும் அவர் கூறினார்.
இருப்பினும், அந்த நபர் பின்னர் தனிப்பட்ட செய்திகள் உட்பட இணையம் வழியாகத் தன்னையும் அந்த நிறுவனத்தையும் குறிவைத்துச் செயல்பட்டதாக அந்தப் பெண் கூறினார். மேலும் அவர், "நான் பொதுவெளியில் ஏதேனும் ஒரு வெற்றியை அடைந்தால், அவர் மீண்டும் வந்து என்னை இன்னும் மோசமான நிலைக்குத் தள்ளுவாரோ என்று நான் அஞ்சுகிறேன்," என்றும் குறிப்பிட்டார்.
நீண்ட காலமாக தொடரும் ஆபத்து
அலுவலக வட்டங்களில் பெண்கள் பாலியல் ரீதியாக துன்புறுத்தப்படுவதும், வன்கொடுமைக்கு ஆளாக்கப்படுவதும் புதிதல்ல. இது பல ஆண்டுகளாகத் தொடரும் ஒரு ஆபத்தாகவே உள்ளது.
2022-ல், செயற்கை நுண்ணறிவு (AI) ஆய்வாளர் கீர்த்தனா கோபாலகிருஷ்ணன், 'எஃபெக்டிவ் அல்ட்ரூயிசம்' சமூகத்திற்குள் நிகழும் பாலியல் வற்புறுத்தல் குறித்து எழுதினார். பாலியல் துன்புறுத்தல் புகார்களுக்கு சமூக மத்தியஸ்தத்தைப் பயன்படுத்துவதை அவர் கேள்விக்குட்படுத்தினார், மேலும் வற்புறுத்தலுக்கும் பரஸ்பர சம்மதத்துடன் கூடிய பல்லுறவுக்கும் இடையே ஒரு தெளிவான வேறுபாட்டை ஏற்படுத்த வேண்டும் என்றும் வாதிட்டார்.
பணியிடங்களில் பாலியல் தொல்லைகள் இன்றைய காலகட்டத்தில் அனைத்து இடங்களிலும் நடக்கும் ஒரு விஷயமாக மாறிவிட்டது. எனினும், உலகம் முழுதும் உள்ள தொழில்நுட்ப வல்லுனர்களும் பணிபுரிய வேண்டும் என கனவு காணும் சிலிக்கான் வேலியில், இப்படிப்பட்ட கொடூரங்கள் நடந்துகொண்டிருப்பதும், பாதிக்கப்பட்ட பெண்கள் அதை தைரியமாக வெளியே சொல்லாமல், தங்களுக்குள் ஒரு ரகசிய ஸ்ப்ரெட்ஷீட்டில் அதை ஆவணப்படுத்துவதும் ஒரு விஷயத்தைதான் தெளிவாகக் காட்டுகின்றன.
விண்ணையும் மண்ணையும் தாண்டி மனிதன் பல விந்தைகளை செய்துவிட்டாலும் பெண் பாதுகாப்பில் அவன் இன்னும் தோற்றவனாகவே தலைகுனிந்து நிற்கிறான்!!
 "Explainer: சிலிக்கான் வேலியை அதிர வைத்த ரகசிய ‘Me Too' ஆவணம்! பெண்களுக்கு இடையில் விஸ்பர் நெட்வொர்க்!")
)