‘டாக்ஸிக்’ ட்ரைலரில் கவனிக்க வேண்டிய விஷயங்கள்! Yash vs Yash புதுசா இருக்கே..

Toxic Trailer : மிகுந்த எதிர்பார்ப்பை ஏற்படுத்தியிருந்த ‘டாக்ஸிக்’  ‘Toxic: A Fairy Tale for Grown-Ups’ திரைப்படத்தின் டிரெய்லர் சமீபத்தில் வெளியானது. இந்த ட்ரைலரில் படத்தின் பலவித பிரம்மாண்டமான அம்சங்கள் காட்டப்பட்டிருந்தது. இது குறித்து முழுமையாக இங்கு பார்ப்போம்.

கேங்ஸ்டர் கதை!

யாஷ் கதையின் மையக் கதாபாத்திரமாக நடிக்கும் இப்படத்தின் டிரெய்லர், பிரம்மாண்டமான ஆக்‌ஷன் காட்சிகள் மற்றும் மிகப்பெரிய திரை அனுபவத்துடன், காதல், அதிகாரத்தின் மீதான பேராசை, துரோகம் மற்றும் மீட்சி ஆகியவற்றை மையமாகக் கொண்ட உணர்வுபூர்வமான கதையையும் இணைக்கும் பிரம்மாண்ட படைப்பாக ‘டாக்ஸிக்’ திரைப்படம் காண்பிக்கப்பட்டுள்ளது. பரபரப்பான ஆக்‌ஷன் காட்சிகள், பல அடுக்குகளைக் கொண்ட கதாபாத்திரங்கள் மற்றும் தீவிரமான உறவுகள் என, இந்த டிரெய்லர் உணர்வுபூர்வமான அதே நேரத்தில் பிரம்மாண்டமான கேங்ஸ்டர் கதையை எதிர்பார்க்க வைக்கிறது.

தந்தை-மகனாக யாஷ் 2 வேடம்..

‘டாக்ஸிக்’ திரைப்படத்தின் முக்கிய கருவாக, ராயா மற்றும் அவரது மகன் டிக்கெட் ஆகியோருக்கு இடையிலான சிக்கலான உறவு காண்பிக்கப்பட்டுள்ளது. இது பிரம்மாண்டமான கேங்ஸ்டர் உலகிற்கு ஒரு வலுவான உணர்வுபூர்வமான விஷயத்தை வழங்குவதாக இருக்கிறது. அதேபோல், நயன்தாரா, கியாரா அத்வானி, தாரா சுதாரியா, ருக்மிணி வசந்த் மற்றும் ஹுமா குரேஷி ஆகியோரின் கதாபாத்திரங்களைச் சுற்றியுள்ள உறவுகள் மற்றும் மோதல்களின் வலையையும் டிரெய்லர் அறிமுகப்படுத்துகிறது. ஒவ்வொரு நடிகரும் தங்களது கதாபாத்திரங்களுக்கு தனித்துவமான பரிமாணத்தையும் தீவிரத்தையும் வழங்கியிருப்பது டிரெய்லரில் அழுத்தமாகத் தெரிகிறது. யாஷ் இந்த படத்தில் இரட்டை வேடத்தில் நடிப்பார் என்பதை யாரும் எதிர்பார்க்கவில்லை.

Yash vs Yash:

விருது பெற்ற திரைப்பட இயக்குநர் கீது மோகன்தாஸ், தனது தனித்துவமான கதை சொல்லல் மற்றும் காட்சி அணுகுமுறையின் மூலம் ‘டாக்ஸிக்’ திரைப்படத்தில் ஒரு ஆழமான மற்றும் கணிக்க முடியாத உலகத்தை உருவாக்கியுள்ளார். டிரெய்லரில் ‘Yash vs Yash’ என்ற மோதல் முக்கியமாக இடம்பெறுகிறது. யாஷ், ராயா மற்றும் டிக்கெட் என இரு கதாபாத்திரங்களில் நடிக்கிறார். தந்தை மற்றும் மகன் என இருவரும் எதிரெதிர் அணிகளில் நிற்கும் நிலையில், அவர்களுக்கு இடையிலான வெடிக்கும் மோதலே கதையின் முக்கிய அம்சமாக அமைகிறது. கீது மோகன் தாஸ், தமிழில் இதற்கு முன்னர் நள தமயந்தி படத்தில் நடித்திருக்கிறார். மலையாளத்திலும் பல்வேறு படங்களில் நடித்திருக்கிறார்.

நயன்தாரா தோழியா?

நடிகை நயன்தாரா, டாக்ஸிக் திரைப்படத்தில் முக்கியமான கதாப்பாத்திரத்தில் வருகிறார். இந்த படத்தில் பிற நடிகைகள் யாஷின் காதலிகளாக காண்பிக்கப்பட்டுள்ளனர். ஆனால் நயன்தாரா, யாஷ் கூடவே வரும் ஒரு கேரக்டராக இருக்கிறது. எனவே, இது யாஷின் தோழி கதாப்பாத்திரமாக இருக்குமோ என்கிற கேள்வி அனவருக்கும் உள்ளது.

பல்வேறு மொழிகளில் உருவான படம்..

ஆங்கிலம் மற்றும் கன்னடம் ஆகிய மொழிகளில் ஒரே நேரத்தில் படமாக்கப்பட்டுள்ள ‘டாக்ஸிக்’, இந்தி, தெலுங்கு, தமிழ் மற்றும் மலையாளம் ஆகிய மொழிகளில் டப்பிங் செய்யப்பட்டும் வெளியாகவுள்ளது. இதன் மூலம் ஆக்‌ஷன், பரபரப்பு மற்றும் பிரம்மாண்டமான கதை சொல்லல் நிறைந்த இப்படத்தின் உலகம் பல்வேறு மொழி ரசிகர்களையும் சென்றடைய உள்ளது.

எப்போது ரிலீஸ்?

கீது மோகன்தாஸ் இயக்கியுள்ள “டாக்ஸிக்” ‘Toxic: A Fairy Tale for Grown-Ups’ திரைப்படத்தில் யாஷ், நயன்தாரா, கியாரா அத்வானி, தாரா சுதாரியா, ருக்மிணி வசந்த் மற்றும் ஹுமா குரேஷி ஆகியோர் முக்கிய கதாபாத்திரங்களில் நடித்துள்ளனர். KVN Productions மற்றும் Monster Mind Creations நிறுவனங்கள் இணைந்து தயாரித்துள்ள இப்படம், ஆகஸ்ட் 26, 2026 அன்று உலகம் முழுவதும் திரையரங்குகளில் வெளியாகிறது.