ஜந்தர் மந்தர் போராட்டம்: பெண் பத்திரிகையாளர்களிடம் பாலியல் அத்துமீறல்? – டெல்லி போலீஸ் மீது குற்றச்சாட்டு!

தலைமை தேர்தல் ஆணையர் ஞானேஷ் குமார் பதவி விலக வேண்டும் உள்ளிட்ட கோரிக்கைகளை வலியுறுத்தி டெல்லி ஜந்தர் மந்தரில் நேற்று சனிக்கிழமை போராட்டம் நடைபெற்றது. இந்த போராட்டத்தின்போது போலீசார் தங்களிடம் பாலியல் அத்துமீறலில் ஈடுபட்டதாக 3 பெண் பத்திரிக்கையாளர்கள் குற்றம்சாட்டியுள்ளனர். இது தொடர்பான புகார்கள் பெறப்பட்டுள்ளதாகவும், அவை பாரபட்சமற்ற விசாரணைக்காக குற்றப்பிரிவுக்கு மாற்றப்பட்டுள்ளதாகவும் டெல்லி போலீஸ் தெரிவித்துள்ளது.

பத்திரிகையாளர் பரபரப்பு புகார்

போரட்டத்தை செய்தியாக பதிவு செய்து கொண்டிருந்தபோது, உதவி காவல் ஆணையர் (ACP) ஒருவர் தன்னிடம் தகாத முறையில் நடந்து கொண்டதாக பெண் பத்திரிகையாளர் ஒருவர் குற்றம்சாட்டியுள்ளார். போலீஸாரின் நடவடிக்கைகளை கேமராவில் பதிவு செய்துக்கொண்டிருந்தபோல், அந்த அதிகாரி தன்னை முறையற்ற வகையில் தொட்டதுடன், பின்னர் தள்ளிவிட்டதாகவும் அவர் தெரிவித்துள்ளார்.

இதையடுத்து தானும் மற்றவர்களும் காவல் நிலையத்துக்கு சென்று புகார் அளிக்க முயன்றதாகவும், ஆனால் புகார் உடனடியாக பதிவு செய்யப்படவில்லை என்றும் அவர் குற்றம்சாட்டியுள்ளனர். இந்த விவகாரம் தொடர்பாக 3 பெண் பத்திரிகையாளர்களிடமிருந்தும் புகார்கள் பெறப்பட்டுள்ளதாக டெல்லி போலீஸ் தெரிவித்துள்ளது. புகார்கள் அனைத்தும் நியாயமான மற்றும் பாரபட்சமற்ற விசாரணைக்காக குற்றப்பிரிவுக்கு மாற்றப்பட்டுள்ளதாக போலீஸ் தரப்பில் கூறப்பட்டுள்ளது.

பிரஸ் கவுன்சில் அதிருப்தி

இந்த சம்பத்திற்கு இந்திய பிரஸ் கவுன்சில் அதிருப்தி தெரிவித்துள்ளது. பத்திரிகையாளர்களிடம் போலீஸார் நடந்து கொண்ட விதம் அதிர்ச்சியையும் கவலையையும் ஏற்படுத்துவதாக பேரவை தெரிவித்துள்ளது. ஜனநாயக நாட்டில் இதுபோன்ற நடத்தையை சாதாரணமாக கருத முடியாது என்றும், பல்வேறு பிரச்சினைகளுக்காக போராடும் மக்களின் நடவடிக்கைகளை அச்சமின்றி பதிவு செய்வதற்கான சுதந்திரம் பத்திரிகையாளர்களுக்கு இருக்க வேண்டும் என்றும் பிரஸ் கவுன்சில் கூறியுள்ளது.

மேலும், பெண் பத்திரிகையாளர் அளித்த புகார் மீது டெல்லி போலீஸ் உடனடியாக நடவடிக்கை எடுக்க வேண்டும் என்றும் ஊடகவியலாளர்கள் தங்கள் பணியை செய்வதற்கு தேவையான பாதுகாப்பான சூழலை ஏற்படுத்த வேண்டும் என்றும் வலியுறுத்தி உள்ளது.

அமித் ஷாவிடம் ராகுல் காந்தி கேள்வி

இதனிடையே, இந்த விவகாரம் தொடர்பாக காங்கிரஸ் மூத்த தலைவர் ராகுல் காந்தி மத்திய உள்துறை அமைச்சர் அமித் ஷாவிடம் விளக்கம் கோரியுள்ளார். டெல்லி போலீஸ் மத்திய உள்துறை அமைச்சகத்தின் கட்டுப்பட்டில் செயல்படுவதால், இந்த விவகாரத்தில் அமித் ஷா பதிலளிக்க வேண்டும் என்று அவர் தனது எக்ஸ் பதிவில் தெரிவித்துள்ளார்.

ஜந்தர் மந்தரில் நூற்றுக்கணக்கான பத்திரிகையாளர்கள் பல மணி நேரமாக போராட்டத்தில் ஈடுபட்டுள்ளதாகவும், பெண் பத்திரிகையாளர் அளித்த புகாரின் அடிப்படையில் முதல் தகவல் அறிக்கை பதிவு செய்ய வேண்டும் என்பதே அவர்களின் கோரிக்கையாக இருப்பதாகவும் ராகுல் காந்தி கூறியுள்ளார்.

மேலும், சனிக்கிழமை மட்டும் ஜந்தர் மந்தரில் நூற்றுக்கணக்கானோர் காவலில் எடுக்கப்பட்டதாகவும் பெண் போராட்டக்காரர்களிடம் போலீஸார் தவறாக நடந்து கொண்டதாக குற்றச்சாட்டுகள் எழுந்துள்ளதாகவும் அவர் தெரிவித்துள்ளார். போராட்டத்தை செய்தியாக பதிவு செய்த பத்திரிகையாளர்களின் கேமராக்கள் பறிக்கப்பட்டதாகவும் சிலர் போலீஸாரால் இழுத்து செல்லப்பட்டதாகவும் ராகுல் காந்தி குற்றம்சாட்டி உள்ளார்.

இந்த விவகாரத்தில் பெண் பத்திரிகையாளர்கள் அளித்துள்ள புகார்கள் தொடர்பாக விசாரணை நடைபெற்று வரும் நிலையில், குற்றச்சாட்டுகள் நிரூபிக்கப்பட்டதாக இதுவரை அதிகாரப்பூர்வமாக தெரிவிக்கப்படவில்லை.