நாகப்பட்டினம் : சிறப்பு பாஸ்போர்ட் முகாம்! எப்படி விண்ணப்பிக்கலாம்?

பாஸ்போர்ட் சேவை வாகனம்

பொதுமக்கள் பாஸ்போர்ட் பெறுவதற்காக நீண்ட தூரம் செல்வதைத் தவிர்த்து, உள்ளூரிலேயே எளிதாக விண்ணப்பிக்கும் வகையில் திருச்சி மண்டல பாஸ்போர்ட் அலுவலகம் நடமாடும் பாஸ்போர்ட் சேவை வாகனம் (Mobile Passport Seva Van) திட்டத்தை அறிமுகப்படுத்தியுள்ளது.

3 நாட்களுக்குச் சிறப்பு முகாம்

இதன் மூலம் நாகப்பட்டினம் மாவட்ட ஆட்சியர் அலுவலக வளாகத்தில் அக்டோபர் 14 முதல் அக்டோபர் 16 வரை 3 நாட்களுக்குச் சிறப்பு முகாம் நடைபெறவுள்ளது.

அதிநவீன வசதி

வழக்கமான பாஸ்போர்ட் அலுவலகங்களில் மேற்கொள்ளப்படும் ஆவணச் சரிபார்ப்பு, புகைப்படம் எடுத்தல் மற்றும் கைரேகை பதிவு உள்ளிட்ட அனைத்து நடைமுறைகளும் இந்த நடமாடும் வாகனத்திலேயே அதிநவீன வசதிகளுடன் செய்து தரப்படும்.

கட்டணம் செலுத்த வேண்டும்

இம்முகாமில் நாள் ஒன்றுக்கு 40 பேர் வரை மட்டுமே முன்பதிவு செய்ய அனுமதிக்கப்பட்டுள்ளது. பாஸ்போர்ட் பெற விரும்பும் பொதுமக்கள், அதிகாரப்பூர்வ இணையதளமான https://www.passportindia.gov.in வழியே ‘Normal Scheme’ (சாதாரண முறை) கீழ் விண்ணப்பித்து கட்டணம் செலுத்த வேண்டும். தொடர்ந்து, ‘Schedule Appointment’ பகுதியில் ‘Mobile Van’ என்பதைத் தேர்வு செய்து தங்களது முன்பதிவை உறுதி செய்துகொள்ளலாம்.

மாவட்ட ஆட்சியர் பிரவீன் குமார் அறிவிப்பு

முன்பதிவு செய்த பொதுமக்கள் தங்களுக்கு ஒதுக்கப்பட்ட நேரத்திற்கு 15 நிமிடங்களுக்கு முன்பாகவே நாகப்பட்டினம் மாவட்ட ஆட்சியர் அலுவலகத்திற்கு நேரில் வந்து பாஸ்போர்ட் சேவைகளைப் பெற்றுக்கொள்ளலாம் என்று மாவட்ட ஆட்சியர் பிரவீன் குமார் தெரிவித்துள்ளார்.