6 நாட்களில் ரூ.541 கோடி வசூல்.. ரஜினியின் 'ஜெயிலர் 2' ரூ.1,000 கோடியை எட்டுமா?

6 நாட்களில் ரூ.541 கோடி வசூல் செய்தது ஜெயிலர் 2

ரஜினிகாந்த் நடிப்பில் உருவான ஜெயிலர் 2 திரைப்படம், திரையரங்குகளில் வெளியாகி வசூலில் அதிரடி காட்டி வருகிறது. இயக்குநர் நெல்சன் இயக்கத்தில், சன் பிக்சர்ஸ் தயாரிப்பில் உருவான இப்படத்திற்கு அனிருத் இசையமைத்துள்ளார். வெளியான முதல் வாரத்திலேயே வசூல் வேகமெடுத்துள்ள நிலையில், படம் ரூ.1,000 கோடி வசூலை எட்டுமா என்ற எதிர்பார்ப்பு ரசிகர்களிடையே எழுந்துள்ளது.

ரிலீஸுக்கு முன்பே ஹிட் அடித்த பாடல்கள்!

ஜெயிலர் 2 திரைப்படம் வெளியாவதற்கு முன்பே அதன் பாடல்கள் ரசிகர்களின் கவனத்தை ஈர்த்தன. குறிப்பாக, ‘பிந்தாஸ்’, ‘அல்ல போலேலோ’ ஆகிய பாடல்கள் நல்ல வரவேற்பை பெற்றது. இதனால் படத்தின் மீதான எதிர்பார்ப்பும் அதிகரித்தது. ரஜினிகாந்த் - நெல்சன் கூட்டணி மீண்டும் இணைந்திருப்பதும் படத்திற்கான எதிர்பார்ப்பை அதிகரித்த முக்கிய அம்சங்களில் ஒன்றாக அமைந்தது.

முதல் நாளிலேயே ரூ.100 கோடியை தாண்டிய வசூல்!

ஜெயிலர் 2 வெளியான முதல் நாளிலிருந்தே திரையரங்குகளில் ரசிகர்கள் கூட்டம் அதிகமாக இருந்தது. குடும்ப ரசிகர்களின் வருகையும் படத்தின் வசூலுக்கு உதவியது. இப்படம் முதல் நாளில் மட்டும் உலகம் முழுவதும் ரூ.100 கோடிக்கும் அதிகமாக வசூல் செய்தது. தொடர்ந்து கிடைத்த வரவேற்பும், விடுமுறை நாட்களும் படத்தின் வசூல் உயர்வுக்கு முக்கிய காரணங்கள் ஆகும்.

5 நாட்களில் ரூ.477 கோடி..

வெளியான முதல் ஐந்து நாட்களில் ஜெயிலர் 2 திரைப்படம் சுமார் ரூ.477 கோடி வசூல் செய்துள்ளதாக தகவல்கள் தெரிவிக்கின்றன. வார இறுதி மற்றும் தொடர் விடுமுறைகள் காரணமாக படத்தை பார்க்க வரும் ரசிகர்களின் எண்ணிக்கை அதிகரித்தது. இதனால் படத்தின் வசூல் தொடர்ந்து உயர்ந்துள்ளதாக தெரிகிறது. இந்த வேகம் அடுத்தடுத்த நாட்களிலும் தொடருமா என்பதே தற்போது ரசிகர்களின் எதிர்பார்ப்பாக உள்ளது.

ரூ.1000 கோடி சாத்தியமா?

ஜெயிலர் 2 திரைப்படம் வெளியான ஆறு நாட்களில் சுமார் ரூ.541 கோடி வசூல் செய்துள்ளதாக தகவல் வெளியாகியுள்ளது. இதன் மூலம் ரூ.1,000 கோடி வசூல் என்ற இலக்கை நோக்கிப் படம் பயணிக்குமா என்ற கேள்வி எழுந்துள்ளது. இருப்பினும், இந்த வசூல் எண்ணிக்கை குறித்த அதிகாரப்பூர்வ உறுதிப்படுத்தல் இல்லாத நிலையில், அடுத்தடுத்த நாட்களின் வசூலை பொறுத்தே படத்தின் மொத்த வசூல் நிலவரம் தெரியவரும். ரஜினிகாந்தின் முந்தைய படமான ஜெயிலர் முதல் பாகம் ரூ.605 கோடி வசூல் செய்ததாக கூறப்படும் நிலையில், இரண்டாம் பாகம் அந்த வசூலைக் கடந்து புதிய சாதனை படைக்குமா என்பதைப் பொறுத்திருந்து பார்க்கலாம்.