நாளை சரஸ்வதி பூஜையும் ஆயுத பூஜையும் கொண்டாடப்பட உள்ளன. வீடுகளில் கல்விக்கு முக்கியத்துவம் அளித்து புத்தகங்களை வைத்து வழிபடுவதுடன், தொழில் நிறுவனங்கள், கடைகள் மற்றும் அலுவலகங்களில் தங்களின் வாழ்வாதாரத்துக்கு உதவும் கருவிகள், இயந்திரங்கள் உள்ளிட்டவற்றுக்கு பூஜை செய்து வழிபடுவது வழக்கம். இந்த நிலையில், சரஸ்வதி பூஜை மற்றும் ஆயுத பூஜை செய்ய ஏற்ற நேரங்கள் குறித்து ஆன்மீக சொற்பொழிவாளர் தேசமங்கையர்க்கரசி விளக்கம் அளித்துள்ளார்.
நவராத்திரியின் ஒன்பதாவது நாளில் மகா சரஸ்வதியை வழிபட்டு விழாவை நிறைவு செய்வது மரபாக உள்ளது. இந்த நாளில் அம்பிகைக்கு பரமேஸ்வரி என்ற திருநாமத்துடன் வழிபாடு செய்யலாம். சரஸ்வதி பூஜையின்போது தாமரை வடிவிலான கோலங்கள் போடுவதும், சர்க்கரைப் பொங்கல், கொண்டைக்கடலை சுண்டல் உள்ளிட்டவற்றை நைவேத்தியமாக படைப்பதும் சிறப்பானதாகக் கருதப்படுகிறது. பழங்களில் நாவல் பழத்தையும் படைக்கலாம்.
நவமி திதி காலை 9.04 மணிக்குத் தொடங்குவதாக குறிப்பிடப்பட்டுள்ளது. எனவே, காலையில் பூஜை செய்ய திட்டமிடுபவர்கள் அதற்கேற்ப ஏற்பாடுகளைச் செய்யலாம்.
சரஸ்வதி பூஜையில் குழந்தைகளின் புத்தகங்கள், கல்வி தொடர்பான பொருட்கள் ஆகியவற்றை வைத்து வழிபடுவது வழக்கம். அதேபோல், ஆயுத பூஜையின்போது கடைகள், தொழில் நிறுவனங்கள் மற்றும் அலுவலகங்களில் பயன்படுத்தப்படும் கருவிகள், இயந்திரங்கள் உள்ளிட்டவற்றை வைத்து பூஜை செய்யலாம். வாகனங்களையும் சுத்தம் செய்து, சந்தனம், மஞ்சள், குங்குமம் இட்டு வழிபடலாம்.
பூஜையின்போது அபிராமி அந்தாதி, சகலகலாவல்லி மாலை உள்ளிட்டவற்றைப் பாராயணம் செய்யலாம். சரஸ்வதி பூஜை முடிந்த பிறகு புத்தகத்தை எடுத்து சிறிது நேரம் படிப்பதும் வழக்கமாக கடைப்பிடிக்கப்படுகிறது.
நவராத்திரியின் பத்தாவது நாளான விஜயதசமி அன்று கல்வி கற்க தொடங்கும் வித்யாரம்பம் நிகழ்ச்சியை நடத்துவது சிறப்பானதாகக் கருதப்படுகிறது. குழந்தைகளுக்கு எழுத்து பயிற்சியை தொடங்கவும், புதிய கல்வி முயற்சிகளை ஆரம்பிக்கவும் இந்த நாள் பயன்படுத்தப்படுகிறது.
விஜயதசமி நாளில் வாகனங்களுக்கும் பூஜை செய்து வழிபடலாம். சரஸ்வதி பூஜை, ஆயுத பூஜை மற்றும் விஜயதசமி வழிபாடுகளை அவரவர் குடும்ப வழக்கம் மற்றும் உள்ளூர் பஞ்சாங்க நேரங்களுக்கு ஏற்ப மேற்கொள்ளலாம் என ஆன்மீக சொற்பொழிவாளர் தேசமங்கையர்க்கரசி தெரிவித்துள்ளார்.
 "சரஸ்வதி பூஜை, ஆயுத பூஜை 2026: வழிபட உகந்த நல்ல நேரம் எது?")
)