சேலம் : ஒரு பட்டா நிலத்தை மட்டும் பதிவு செய்த விவசாயிகளுக்கு அரசின் முக்கிய அறிவிப்பு

Salem News : சேலம் மாவட்டத்தில் வேளாண்மை மற்றும் உழவர் நலத்துறை மூலமாக விவசாயிகளுக்குத் தனித்துவமான விவசாய அடையாள எண் பதிவு செய்யும் பணி முழுவீச்சில் நடைபெற்று வருகிறது. இதற்காக வேளாண்மை மற்றும் தோட்டக்கலைத்துறை அலுவலர்கள் நேரடியாகக் களமிறங்கி, பட்டா வைத்துள்ள அனைத்து விவசாயிகளுக்கும் அவர்களின் நில விவரங்களை உரிய பிரத்யேக செயலியில் பதிவு செய்து அடையாள எண்களை வழங்கி வருகின்றனர்.

ஒரு பட்டா மட்டும் பதிவு செய்துள்ளவர்களுக்கான எச்சரிக்கை

ஏற்கனவே இந்த விவசாய அடையாள எண்ணைப் பெற்றுள்ள ஒரு சில விவசாயிகள், தங்களிடம் உள்ள பல பட்டாக்களில் ஏதேனும் ஒரு பட்டா எண்ணை மட்டுமே இணைத்துப் பதிவு செய்துள்ளனர் என்பது தெரியவந்துள்ளது. உதாரணமாக, ஒரு விவசாயிக்கு 3 வெவ்வேறு பட்டா எண்கள் இருக்கும் பட்சத்தில், அவர் ஒரே ஒரு பட்டாவில் உள்ள நிலத்தை மட்டுமே பதிவு செய்துவிட்டு அடையாள எண்ணைப் பெற்றிருக்கலாம். இவ்வாறு விடுபட்ட நிலங்களை அடையாள எண்ணுடன் இணைக்காமல் விட்டால் எதிர்காலத்தில் பல்வேறு நலத்திட்டங்களைப் பெறுவதில் சிக்கல் ஏற்படும்.

விடுபட்ட நிலங்களை எவ்வாறு பதிவு செய்வது?

ஒரு பட்டா எண்ணை மட்டும் பதிவு செய்துள்ள விவசாயிகள், தங்களுக்குச் சொந்தமான மீதமுள்ள அனைத்து நிலங்களின் விவரங்களையும் உடனடியாக வேளாண்மை மற்றும் தோட்டக்கலைத்துறை அலுவலர்கள் மூலம் பதிவு செய்துகொள்ள வேண்டும். பட்டா எண்கள் விடுபட்டுள்ள விவசாயிகள், தங்களது பெயரில் உள்ள அனைத்துப் பட்டா எண்கள் குறித்த ஆவணங்கள் மற்றும் ஆதார் எண்ணுடன் இணைக்கப்பட்ட செல்போன் எண் ஆகியவற்றுடன் சம்பந்தப்பட்ட துறை அதிகாரிகளை நேரில் அணுகி உடனடியாகப் புதுப்பித்துக் கொள்ளலாம்.

அனைத்து நிலங்களையும் இணைப்பது ஏன் கட்டாயம்?

இனிவரும் காலங்களில் மத்திய மற்றும் மாநில அரசுகளின் பல்வேறு விவசாய நலத்திட்ட உதவிகள், இந்த விவசாய அடையாள எண்ணில் இணைக்கப்பட்டுள்ள நிலங்களின் அளவை அடிப்படையாகக் கொண்டே வழங்கப்பட உள்ளன. குறிப்பாக, தொடக்க வேளாண்மை கூட்டுறவு வங்கிகள் மூலம் வழங்கப்படும் பயிர்க்கடன்கள், மானிய விலையிலான உரம் விநியோகம், பிரதம மந்திரியின் நுண்ணீர் பாசனத் திட்டம், பிரதம மந்திரி கிசான் சம்மான் நிதி உதவித்தொகை, பிரதம மந்திரியின் பயிர் காப்பீட்டுத் திட்டம் உள்ளிட்ட அனைத்து அரசு சலுகைகளும் கணினியில் பதிவு செய்யப்பட்டுள்ள நிலப்பரப்பின் அளவுக்கு ஏற்பவே கிடைக்கும். ஒரு விவசாயி தனது அனைத்து நிலங்களையும் பதிவு செய்யாவிட்டால், விடுபட்ட நிலங்களுக்கான மானியங்களையோ அல்லது பயிர்க்கடன்களையோ பெற முடியாத சூழல் உருவாகும்.

கூடுதல் தகவல்களுக்கு யாரை அணுக வேண்டும்?

எனவே, அனைத்து விவசாயிகளும் தங்களுக்குச் சொந்தமான அனைத்து நில விவரங்களையும் எவ்வித விடுபடுதலும் இன்றி விவசாய அடையாள எண்ணுடன் இணைத்திட வேண்டும் என்று கேட்டுக்கொள்ளப்படுகிறார்கள். இதுகுறித்த கூடுதல் தகவல்கள் மற்றும் சந்தேகங்களுக்கு, தங்களது வட்டாரத்தில் உள்ள வேளாண்மை உதவி இயக்குநர்கள் மற்றும் தோட்டக்கலை உதவி இயக்குநர்களை நேரில் அணுகி பயன்பெறலாம் என மாவட்ட ஆட்சித்தலைவர் இளம்பகவத் தெரிவித்துள்ளார்.