Explained: ரூ.25 லட்சம் வரை இலவச மருத்துவ சிகிச்சை - பயனடைவது எப்படி? A to Z இதோ

Tamil Nadu Medial Insurance Scheme : மருத்துவம் என்பது சலுகை அல்ல, குடிமக்களின் உரிமை என்பது ஜனநாயக விழுமியங்களில் முக்கியமானது. அந்த வகையில், ஏழை, எளிய மற்றும் நடுத்தர மக்களுக்கு உயர்தர மருத்துவ சிகிச்சைகளை இலவசமாக வழங்க உருவாக்கப்பட்ட முன்னோடித் திட்டம்தான் "கலைஞர் காப்பீட்டுத் திட்டம்" ஆகும்.

அந்த வகையில், கலைஞர் காப்பீட்டுத் திட்டமாக ஆரம்பிக்கப்பட்டு தற்போது முதலமைச்சரின் விரிவான காப்பீட்டுத் திட்டமாக பரிமாணம் பெற்றுள்ளது. தமிழ்நாடு அரசின் இந்த காப்பீட்டுத் திட்டத்தின் பயணம், சிறப்பு உள்ளிட்டவையோடு, புதிய பயனர்கள் இத்திட்டத்தில் தங்களை இணைத்துக்கொள்வது எப்படி உள்ளிட்ட முழுமையான விவரங்களை இங்கு விரிவாக காணலாம்.

கலைஞர் மருத்துவக் காப்பீட்டுத் திட்டம்

திட்டத்தின் தோற்றம்

• 2009ஆம் ஆண்டில் முன்னாள் முதலமைச்சர் மு. கருணாநிதி ஜூலை மாதம் 23ஆம் தேதி அன்று இந்த திட்டத்தை தொடங்கி வைத்தார்.
• குடும்பத்திற்கு 4 ஆண்டுகளுக்கு அதிகபட்சமாக ரூ. 1 லட்சம் வரை சிகிச்சைத் தொகை வழங்கப்பட்டது.

மருத்துவக் காப்பீட்டுத் திட்டத்தின் நோக்கம்

• இக்காப்பீட்டுத் திட்டம் குறித்து பேசிய கலைஞர் கருணாநிதி, திராவிட இயக்கத்தின் லட்சியமான சமூகச் சமத்துவத்தை மருத்துவத்துறையிலும் நடைமுறைப்படுத்தும் ஒரு மைல்கல்லாக இருக்கும் என குறிப்பிட்டார்.
• பணம் இல்லாத காரணத்தினால் எந்தவொரு ஏழையும் உயிரிழக்க நேரிடக்கூடாது என்பதே இத்திட்டத்தின் அடிப்படை நோக்கம் என்றார்.
• அதேபோல், அரசு மருத்துவமனைகளுடன் புகழ்பெற்ற தனியார் மருத்துவமனைகளிலும் ஏழை மக்கள் இலவசமாக சிகிச்சை பெற வழிசெய்யப்பட்டுள்ளது என்றார்.

மருத்துவக் காப்பீட்டுத் திட்டத்தின் பரிணாம வளர்ச்சி

2012: கலைஞர் காப்பீட்டுத் திட்டம் மறுசீரமைக்கப்பட்டு 'முதலமைச்சரின் விரிவான மருத்துவக் காப்பீட்டுத் திட்டம்' (CMCHIS) என பெயர் மாற்றம் செய்யப்பட்டது. சிகிச்சை தொகை ரூ.4 லட்சமாக உயர்த்தப்பட்டது.

2018: மத்திய அரசின் ஆயுஷ்மான் பாரத் - PMJAY திட்டத்துடன் தமிழ்நாடு அரசின் காப்பீட்டுத் திட்டமும் ஒருங்கிணைக்கப்பட்டது. ஆண்டு ஒன்றுக்கு குடும்பத்திற்கு ரூ.5 லட்சம் வரை கட்டணமில்லா சிகிச்சை வழங்கப்படுகிறது.

2026: முதலமைச்சரின் விரிவான மருத்துவக் காப்பீட்டுத் திட்டத்தின் இலவச மருத்துவ சிகிச்சைக்கான மருத்துவக் காப்பீட்டுத் தொகை ஆண்டு ஒன்றுக்கு 5 லட்சத்தில் இருந்து ரூ.25 லட்சமாக உயர்த்தப்படும் என முதலமைச்சர் விஜய் இன்று அறிவித்தார்.

பெரம்பூரில் ரூபாய் 300 கோடி மதிப்பீட்டில் 400 படுக்கைகள் கொண்ட உலகத் தரத்திலான “பன்னோக்கு உயர் சிறப்பு மருத்துவமனை" அமைக்கப்படும்.

மாண்புமிகு தமிழ்நாடு முதலமைச்சர் திரு.ச.ஜோசப் விஜய் அவர்கள் சட்டப்பேரவையில் விதி 110-இன் கீழ் அறிவிப்பு

— TN DIPR (@TNDIPRNEWS) August 19, 2026

முக்கிய சிகிச்சை தொகுப்புகள்

• முதலமைச்சரின் விரிவான மருத்துவ காப்பீட்டுத் திட்டத்தின் கீழ் 1,090-க்கும் மேற்பட்ட சிகிச்சை முறைகள் அனுமதிக்கப்பட்டுள்ளது.
• புற்றுநோய் சிகிச்சை, அதன் கீமோதெரபி சிகிச்சை, கதிர்வீச்சு சிகிச்சை, அறுவை சிகிச்சை; இதயவியல் மற்றும் இதய அறுவை சிகிச்சைகள்; சிறுநீரகவியல் மற்றும் டயாலிசிஸ்; எலும்பியல் மற்றும் பாலிட்ராமா; மகப்பேறு மற்றும் பிறந்த குழந்தைகளுக்கான தீவிர சிகிச்சை உள்ளிட்டவை பெருஞ்செலவை ஏற்படுத்தும் 5 மருத்துவப் பிரிவுகளாகும். இவற்றுக்கே பெரும்பாலும் காப்பீட்டுத் தொகை பயன்படுத்தப்படுகிறது.
• கடந்த திமுக ஆட்சியில் சாலை விபத்தில் சிக்குவோருக்கு முதல் 48 மணிநேர அவசர சிகிச்சையை ரூ.1 லட்சம் வரை இலவசமாக வழங்கும் 'இன்னுயிர் காப்போம் - நம்மை காக்கும் 48' மற்றும் பாதப் பாதுகாப்பு திட்டங்கள் இதில் இணைக்கப்பட்டன.
• திருநங்கைகளுக்கான மருத்துவம் மற்றும் அறுவை சிகிச்சை சேவைகள் முதலமைச்சரின் விரிவான மருத்துவக் காப்பீட்டுத் திட்டத்தின் கீழ் வழங்கப்படும் என முதலமைச்சர் விஜய் இன்று அறிவித்தார்.

ஒபாமா Care திட்டத்திற்கு முன்...

• அமெரிக்க குடிமக்களுக்கு குறைந்த விலையில் மருத்துவக் காப்பீடு வழங்குவதை நோக்கமாகக் கொண்டு உருவாக்கப்பட்டதுதான், ஒபாமா கேர் திட்டமாகும். இது 2010ஆம் ஆண்டில் தொடங்கியது.
• ஆனால், அதற்கு முன்னரே, 2009ஆம் ஆண்டில் தமிழ்நாடு முதலமைச்சராக இருந்த கருணாநிதி, ஏழை எளிய குடும்பங்கள் பெரிய மருத்துவ சிகிச்சைகளை அரசு மட்டுமின்றி தனியார் மருத்துவமனைகளில் இலவசமாக பெற கலைஞர் காப்பீட்டுத் திட்டம் கொண்டுவந்தார்.
• 2009, ஜூலை 23ஆம் தேதி கலைஞர் காப்பீட்டுத் திட்டம்; 2010, மார்ச் 23ஆம் தேதி அமெரிக்காவில் ஒபாமா கேர் திட்டம் சட்டமாகியது. அதாவது ஐக்கிய அமெரிக்காவில் வருவதற்கு முன்னரே தமிழ்நாட்டில் இத்திட்டம் அமலாகி உள்ளது.

தமிழ்நாடு அரசின் காப்பீட்டுத் திட்டத்திற்கான பாராட்டு

தமிழ்நாடு அரசின் இந்த காப்பீட்டுத் திட்டத்தை பல பொருளாதார அறிஞர்கள் பாராட்டி உள்ளனர். உதாரணமாக நோபல் விருதுபெற்ற அறிஞர் அமர்த்தியா சென் மற்றும் ஜீன் டிரீஸ் தங்களது "An Uncertain Glory: India and its Contradictions (2013)" நூலில், இந்தியாவில் கடுமையான மருத்துவச் செலவுகளால் ஏழை எளிய குடும்பங்கள் மேலும் வறுமைக்குள் தள்ளப்படுவதை தடுப்பதில், தமிழ்நாட்டின் பொதுச் சுகாதார அமைப்பும், மருத்துவக் காப்பீட்டு முறையும் தேசிய அளவில் முன்னோடியாகச் செயல்படுவதை பாராட்டையுள்ளனர்.

இந்தியாவின் சுகாதார பொருளாதார சமத்துவமின்மை குறித்த ஆய்வுக் கட்டுரைகளில், தமிழ்நாடு தனது காப்பீட்டுத் திட்டம் மூலம் தனியார் மருத்துவக் கட்டமைப்பை ஏழை மக்களுக்கான பொதுப் பயன்பாட்டிற்கு மாற்றிய விதத்தை உலகளாவிய மருத்துவ ஆய்விதழான The Lancet பாராட்டியுள்ளது.

காப்பீட்டு திட்ட அட்டை - விண்ணப்பிப்பது எப்படி?

1. தகுதிகள்

• குடும்பத்தின் ஆண்டு வருமானம் அரசின் விதிக்குட்பட்டு ரூ.72 ஆயிரத்திற்குள் இருக்க வேண்டும். 
• தமிழ்நாட்டில் வசிப்பவராக இருக்க வேண்டும். தமிழ்நாடு குடும்ப அட்டை வைத்திருக்க வேண்டும்.

2. தேவையான ஆவணங்கள்

• வாக்காளர் அட்டை, பாஸ்போர்ட்  அல்லது ஆதார் அட்டை ஆகிய அடையாள சான்றுக்கு தேவை.
• குடும்ப அட்டை, மின்தார பில், சொத்து வரி ரசீது, அல்லது பாஸ்போர்ட் உள்ளிட்டவை முகவரி சான்றுக்கு தேவை.
• கிராம நிர்வாக அலுவலர் (VAO) அல்லது வருவாய்த்துறை மூலம் பெறப்பட்ட வருமானச் சான்றிதழ். BPL கார்டு, வேலைவாய்ப்பு சான்றிதழ்.

3. விண்ணப்பிக்கும் நேரடி வழிமுறை

• உங்கள் மாவட்ட ஆட்சியர் அலுவலகத்தில் அல்லது வட்டாட்சியர் அலுவலகத்தில் இயங்கும் CMCHIS Enrollment Centre என்ற மையத்திற்கு குடும்பத்துடன் செல்ல வேண்டும்.
• குடும்ப அட்டை, ஆதார் மற்றும் வருமான சான்றிதழ் ஆகியவற்றை அதிகாரிகளிடம் சமர்பிக்க வேண்டும். குடும்ப உறுப்பினர்களின் கைரேகை மற்றும் புகைப்படம் அங்கேயே பதிவு செய்யப்படும்.
• விவரங்கள் சரிபார்க்கப்பட்டதும், உடனடியாக முதலமைச்சரின் விரிவான மருத்துவக் காப்பீட்டு ஸ்மார்ட் கார்ட் வழங்கப்படும்.
• முதலமைச்சரின் விரிவான மருத்துவக் காப்பீட்டுத் திட்டத்தின் இணையத்தளம், இலவச உதவி எண்கள்: 18004253993 / 9384020974