மாற்றுத்திறனாளிகளுக்கு தமிழக அரசின் அதிரடி பரிசு: இனி 100% இலவச பயணம் – Explained!

Tamil Nadu Free Bus : தமிழ்நாட்டில் உள்ள மாற்றுத்திறனாளிகளின் நலன் மற்றும் பொருளாதாரத் தன்னிறைவை உறுதி செய்யும் வகையில், தமிழ்நாடு அரசு ஒரு முக்கிய வரலாற்றுச் சிறப்புமிக்க அரசாணையை வெளியிட்டுள்ளது. இதுவரை அரசுப் போக்குவரத்துக் கழகங்களால் இயக்கப்படும் சாதாரண கட்டண நகரப் பேருந்துகளில் மட்டுமே மாற்றுத்திறனாளிகளுக்கு இலவச பயணச் சலுகை வழங்கப்பட்டு வந்தது. தற்போது இந்தச் சலுகையை மேலும் விரிவுபடுத்தி, தொலைதூரப் பயணங்களை உள்ளடக்கிய பல்வேறு வகை பேருந்துகளுக்கும் முழுமையாகப் பொருந்தும் வகையில் தமிழ்நாடு அரசு உத்தரவிட்டுள்ளது.  

மேலும் படிக்க | விவசாயிகளுக்கு ரூ.3.60 லட்சம் வரை மானியம்! தட்கல் மின் இணைப்பு பெற தமிழ்நாடு அரசு அழைப்பு!

எந்தெந்த பேருந்துகளில் சலுகை பொருந்தும்?

மாற்றுத்திறனாளிகள் நலத்துறை வெளியிட்டுள்ள அரசாணையின்படி, குளிர்சாதன (AC) பேருந்துகள் நீங்கலாக, தமிழ்நாடு அரசு போக்குவரத்துக் கழகங்களுக்குச் சொந்தமான கீழ்க்கண்ட அனைத்து வகையான சாதாரண கட்டண மற்றும் விரைவுப் பேருந்துகளிலும் இச்சலுகை நடைமுறைக்கு வருகிறது:  

- மாநகர மற்றும் நகரப் பேருந்துகள்
- விரைவுப் பேருந்துகள் 
- எல்.எஸ்.எஸ் மற்றும் டீலக்ஸ் பேருந்துகள்   
- புறநகர் பேருந்துகள் 
- மலைப்பகுதி சாதாரண கட்டணப் பேருந்துகள்  

யாருக்கெல்லாம் இந்த இலவச பயணம் கிடைக்கும்?

மத்திய அரசின் 2016-ஆம் ஆண்டு மாற்றுத்திறனாளிகள் உரிமைகள் சட்டத்தில் குறிப்பிடப்பட்டுள்ள 21 வகையான மாற்றுத்திறன்களில், 40 சதவீதம் மற்றும் அதற்கு மேற்பட்ட பாதிப்புத் தன்மை (Benchmark Disability) கொண்ட அனைத்து மாற்றுத்திறனாளிகளும் இந்த 100% கட்டணமில்லா பயணச் சலுகையைப் பெறத் தகுதியுடையவர்கள் ஆவர். மேலும், தனியாகப் பயணம் செய்ய இயலாத மாற்றுத்திறனாளிகள் ஒரு துணையாளரை (Escort) உடன் அழைத்துச் செல்லவும், அந்தத் துணையாளருக்கும் 100% முழு கட்டண விலக்கு அளிக்கவும் இந்த அரசாணை வழிவகை செய்கிறது.  

பயணத்தின்போது பின்பற்ற வேண்டிய முக்கிய நிபந்தனைகள்:

UDID அட்டை கட்டாயம்: பேருந்தில் ஏறும் போது மத்திய/மாநில அரசால் அங்கீகரிக்கப்பட்டு வழங்கப்பட்ட தனித்துவம் வாய்ந்த அடையாள அட்டையை (Unique Disability ID - UDID) நடத்துனரிடம் அசல் அல்லது முறையான ஆவணமாகக் காண்பிக்க வேண்டும். UDID அட்டை இல்லாத பட்சத்தில் இச்சலுகை வழங்கப்படாது.  

பதினான்கு/பதினாறு இலக்க எண் அங்கீகாரம்: தமிழ்நாடு அரசால் அங்கீகரிக்கப்பட்ட உரிய குறியீட்டுடன் கூடிய (எ.கா: TNxxxxxxxxxxxxxx) அதிகாரப்பூர்வ UDID அட்டைகள் மட்டுமே பரிசீலிக்கப்படும்.

கட்டணமில்லா பயணச்சீட்டு: பயணிகள் அடையாள அட்டையைக் காண்பித்தவுடன், நடத்துனர் உரிய பூஜ்ஜிய மதிப்பிலான இலவச பயணச் சீட்டை வழங்குவார். இதன் மூலம் பயணங்களின் எண்ணிக்கை முறையாகத் தணிக்கை செய்யப்பட்டு கணக்கிடப்படும்.

ஏற்கனவே உள்ள சலுகை: இதுவரை நடைமுறையில் இருந்து வந்த 75 சதவீத கட்டணச் சலுகை விதிகளும் தொடர்ந்து அமலில் இருக்கும்.

கூடுதல் நிதி ஒதுக்கீடு மற்றும் அரசின் நிதி ஒப்புதல்:

இந்த விரிவாக்கப்பட்ட விரிவான பயணத் திட்டத்திற்காக நிதி ஒதுக்கீடும் கணிசமாக உயர்த்தப்பட்டுள்ளது. நடப்பு நிதியாண்டில் (2026-2027) இத்திட்டத்திற்காக ஏற்கனவே ரூ.95 கோடி ஒதுக்கீடு செய்யப்பட்டிருந்த நிலையில், தற்போது கூடுதல் தேவைகளுக்காக நிதி ஒதுக்கீடு ரூ.114 கோடியாக உயர்த்தப்பட்டுள்ளது. மேலும், தற்போதைய இந்த உடனடி விரிவாக்கத்திற்காக அரசு ரூ.7 கோடியே 90 லட்சத்தை கூடுதலாக ஒதுக்கீடு செய்து ஆணை பிறப்பித்துள்ளது.  

இச்செலவினம் "புது துணைப்பணி" (New Instrument of Service) வகைப்பாட்டின் கீழ் வருவதால், சட்டமன்றப் பேரவையில் இதற்கான முறையான ஒப்புதல் பின்னர் பெறப்படும் எனவும், அதுவரை இத்திட்டத்தை உடனடியாகச் செயல்படுத்தும் பொருட்டு எதிர்பாரா செலவின நிதியிலிருந்து (Contingency Fund) முன்பணம் பெறப்பட்டு நிதித்துறையின் உரிய அனுமதியுடன் அரசாணை வெளியிடப்படுவதாகவும் தெரிவிக்கப்பட்டுள்ளது. அரசாணை வெளியிடப்பட்ட தேதியிலிருந்தே இப்புதிய கட்டணச் சலுகை உடனடியாக நடைமுறைக்கு வருகிறது.