Explainer: பிஎம் கிசான் 24வது தவணை நாளை வருகிறது: பயனாளி பட்டியலில் பெயர் உள்ளதா? எப்படி அறிவது?

PM Kisan 24th Installment: இந்தியாவில் உள்ள ஏராளமான விவசாயிகளுக்காக மத்திய அரசு பல வித நலத்திட்டங்களை செயல்படுத்தி வருகின்றது. அவற்றில் பிரதம மந்திரி கிசான் சம்மான் விகாஸ் திட்டம் மிக முக்கியமான மற்றும் பிரபலமான திட்டமாக உள்ளது. பிஎம் கிசான் திட்டத்தின் 24வது தவணைத் தொகை, நாளை (அக்டோபர் 30-ஆம் தேதி) விடுவிக்கப்பட உள்ளது.

பிஎம் கிசான் 24வது தவணை

நாளை குஜராத்தின் பனஸ்கந்தாவில் ஒரு பிரம்மாண்ட நிகழ்வுக்கு ஏற்பாடு செய்யப்பட்டுள்ளது. இந்த நிகழ்வின் போது பிரதமர் நரேந்திர மோடி 9.34 கோடிக்கும் அதிகமான விவசாயக் குடும்பங்களின் வங்கிக் கணக்குகளுக்கு ₹18,680 கோடிக்கும் அதிகமான தொகையை மாற்றவுள்ளார்.

எனினும், இந்த முறை அனைத்து விவசாயிகளுக்கும் பிஎம் கிசான் 24வது தவணையான (PM Kisan 24th Installment) ₹2,000 கணக்கிற்கு வருமா என்பது கேள்விக்குறிதான். பல்வேறு காரணங்களுக்காக சில விவசாயிகளின் பெயர்கள் பயனாளி பட்டியலிலிருந்து நீக்கப்பட்டுள்ளதாக வட்டாரங்கள் தெரிவிக்கின்றன. தவணைத் தொகை தங்கள் கணக்கிற்கு வந்து சேருமா அல்லது பெயர் பயனாளிகள் பட்டியலிலிருந்து நீக்கப்பட்டுள்ளதா என்ப்தை முதலில் விவசாயிகள் தெரிந்துகொள்ள வேண்டும்.

விவசாயிகள் தங்கள் மொபைல் போனைப் பயன்படுத்தி, வீட்டிலிருந்தபடியே, இரண்டே நிமிடங்களில் தங்கள் 'பயனாளியின் நிலையை' (Beneficiary Status) சரிபார்த்துக்கொள்ளலாம். பயனாளி நிலையைச் சரிபார்க்கும் முறை மற்றும் அதில் காட்டப்படும் வாசகங்களின் அர்த்தம் ஆகியவற்றை பற்றி இங்கே தெரிந்துகொள்ளுங்கள்.

பிஎம் கிசான் பயனாளி நிலை

பிஎம் கிசான் பயனாளி நிலையைச் (PM Kisan Beneficiary Status) சரிபார்ப்பது எப்படி?

• இதற்கு முதலில், PM Kisan-ன் அதிகாரப்பூர்வ இணையதளமான pmkisan.gov.in-க்குச் செல்லவும். 
• முகப்புப் பக்கத்தில், 'Farmers Corner' பகுதிக்குச் சென்று, 'Know Your Status' என்ற விருப்பத்தைத் தேர்ந்தெடுக்கவும். 
• உங்கள் பதிவு எண் (Registration Number) மற்றும் கேப்ட்சா (Captcha) குறியீட்டை உள்ளிடவும். 
• அதன் பிறகு, உங்கள் பதிவு செய்யப்பட்ட மொபைல் எண்ணிற்கு ஒரு OTP வரும்.
• அந்த OTP-ஐ உள்ளிட்டு சமர்ப்பிக்கவும்.
• இப்போது உங்கள் முழு விவரங்களும் தற்போதைய நிலையும் திரையில் தோன்றும்.

மேலும் படிக்க | மாற்றுத்திறனாளிகளுக்கு தமிழக அரசின் அதிரடி பரிசு: இனி 100% இலவச பயணம் – Explained!

தவணை நிறுத்தப்பட்டுள்ளதா என எப்படி தெரிந்துகொள்வது?

விவசாயிகள் OTP-ஐ உள்ளிட்ட பிறகு, தங்கள் நிலையைச் சரிபார்க்கும்போது சில குறிப்பிட்ட செய்திகள் தோன்றலாம். அவற்றின் அர்த்தங்கள் இதோ:

Withheld (நிறுத்தி வைக்கப்பட்டது): உங்கள் நிலையில் 'Withheld' என்று காட்டப்பட்டால், உங்கள் 24-வது தவணைத் தொகை நிறுத்தி வைக்கப்படும் என்று அர்த்தம்.

Under Verification / Eligibility Under Review (சரிபார்ப்பில் உள்ளது / தகுதி மறுஆய்வில் உள்ளது): இவ்வாறு காட்டப்பட்டால், உங்கள் தகுதி தற்போது மறுஆய்வு செய்யப்படுகிறது என்றும், தவணைத் தொகை தற்காலிகமாக நிறுத்தி வைக்கப்பட்டுள்ளது என்றும் பொருள். இத்தகைய சூழலில், உடனடியாக உங்கள் அருகிலுள்ள வேளாண் துறை அலுவலகத்தையோ அல்லது பொது சேவை மையத்தையோ (Common Service Centre - CSC) அணுகி, உங்கள் ஆவணங்களைச் சரிபார்க்கவும். இல்லையெனில், அடுத்த தவணைத் தொகையும் உங்களுக்குக் கிடைக்காமல் போக வாய்ப்புள்ளது.

FTO Processed: YES / Land Seeding: YES / e-KYC: YES / Aadhaar Bank Seeding: YES: இந்த அனைத்து விருப்பங்களும் 'ஆம்' (YES) என்று காட்டப்பட்டு, பச்சை நிறக் குறியீடுகள் (green ticks) இருந்தால், கவலைப்பட வேண்டாம். அக்டோபர் 30-ஆம் தேதியன்று உங்கள் வங்கிக் கணக்கில் பணம் நிச்சயமாக வரவு வைக்கப்படும்.

பயனாளிகளின் எண்ணிக்கை ஏன் குறைகிறது?

பிரதம மந்திரி கிசான் (PM Kisan) திட்டத்தில் முறைகேடுகளைத் தடுக்கவும், உண்மையான விவசாயிகளுக்கு மட்டுமே பலன்கள் சென்றடைவதை உறுதி செய்யவும், e-KYC மற்றும் நிலச் சரிபார்ப்பு (land verification) தொடர்பான நிபந்தனைகளை அரசு கடுமையாக்கியுள்ளது. 19வது தவணையின் போது 10.06 கோடியாக இருந்த பயனாளி எண்ணிக்கை 24வது தவணையில் சுமார் 9.34 கோடியாக குறைந்துள்ளதாக தரவுகள் தெரிவிக்கின்றன.

மேலும் படிக்க | EPS Pension: ஊழியர்களின் குறைந்தபட்ச மாத ஓய்வூதியம் அதிகரிக்கிறதா? நவம்பர் 19 முக்கிய கூட்டம்

தவணை வாரியான பயனாளி தரவுகள் இதோ

பிஎம் கிசான் திட்டத்திற்கு யாரெல்லாம் தகுதியற்றவர்கள்?

விதிகளின்படி, ஒரு விவசாயக் குடும்பத்தில் உள்ள நபர்கள் யாரேனும் மருத்துவர், பொறியாளர், பட்டயக் கணக்காளர் (CA), அரசு ஊழியர் அல்லது வருமான வரி செலுத்துபவராக இருந்தாலோ, அல்லது மாதம் ₹10,000-க்கு மேல் ஓய்வூதியம் பெறுபவராக இருந்தாலோ, அவர்கள் இந்தத் திட்டத்திற்குத் தகுதி பெற மாட்டார்கள். மேலும், ஒரு குடும்பத்தில் தகுதியுள்ள ஒரு நபர் மட்டுமே (கணவன் அல்லது மனைவி) இந்தத் திட்டத்தின் பலன்களைப் பெற முடியும்.

பிஎம் கிசான் திட்டம்

பிஎம்-கிசான் திட்டத்தின் கீழ், தகுதியுள்ள விவசாயக் குடும்பங்களுக்கு ஆண்டுதோறும் தலா 2,000 ரூபாய் வீதம், மூன்று சம தவணைகளில் மொத்தம் 6,000 ரூபாய் வழங்கப்படுகிறது. இந்தத் தொகை, நேரடிப் பயன் பரிமாற்ற (DBT) முறை மூலம் பயனாளிகளின் வங்கிக் கணக்குகளுக்கு நேரடியாக அனுப்பப்படுகிறது. திட்டத்தின் நிபந்தனைகளைப் பூர்த்தி செய்து, சரிபார்ப்பு நடைமுறைகளை நிறைவு செய்யும் தகுதியுள்ள விவசாயிகள், 24-வது தவணையாக 2,000 ரூபாயைப் பெறலாம்.

இந்தத் திட்டம் தகுதியுள்ள விவசாயக் குடும்பங்களுக்கு வருமான ஆதரவை வழங்குகிறது. மேலும், நிறுவன ரீதியாக நிலம் வைத்திருப்பவர்கள், அதிக வருமானம் ஈட்டும் குறிப்பிட்ட பிரிவினர் மற்றும் அரசுப் பதவிகளில் இருப்பவர்கள் இந்தத் திட்டத்தின் வழிகாட்டுதல்களின்படி இதில் சேரலாம்.

மேலும் படிக்க | November Bank Holidays : நவம்பர் மாதம் வங்கிகள் எப்போதெல்லாம் லீவ் தெரியுமா? விவரம் இதோ