புதிய மருத்துவக் காப்பீடு அப்டேட் : அரசு ஊழியர்கள், ஆசிரியர்களுக்கு முக்கிய தகவல் - Explained

தமிழக அரசு ஊழியர்கள், ஆசிரியர்கள் மற்றும் ஓய்வூதியர்களுக்கு மருத்துவக் காப்பீடு தொடர்பாக மிக முக்கியமான சட்டப்பூர்வ முன்னுதாரண அரசாணை வெளியாகியுள்ளது. அரசு அங்கீகரிக்காத தனியார் மருத்துவமனையில் சிகிச்சை பெற்ற காரணத்தைக் காட்டி காப்பீட்டுத் தொகை மறுக்கப்பட்ட வழக்கில், சென்னை உயர்நீதிமன்றத் தீர்ப்பின் அடிப்படையில் அரசு கருவூலத்திலிருந்து பணத்தை வட்டியுடன் பட்டுவாடா செய்யத் தமிழக அரசு ஆணை பிறப்பித்துள்ளது. இத்தீர்ப்பு மற்றும் அரசாணை எவ்வாறு அனைத்து அரசு ஊழியர்களுக்கும் ஒரு சட்டப்பூர்வ முன்னுதாரணமாக (Precedent) அமைகிறது? இதன் பின்னணி என்ன? விரிவாகப் பார்ப்போம்.

1. பிரச்னையின் பின்னணி:

தமிழக அரசின் புதிய மருத்துவக் காப்பீட்டுத் திட்டத்தின் கீழ், யுனைடெட் இந்தியா இன்சூரன்ஸ் நிறுவனமும் மாவட்டக் குழுக்களும் பல ஊழியர்களின் விண்ணப்பங்களை "Scenario-IV" என்ற காரணத்தைக் கூறித் தொடர்ந்து நிராகரித்து வந்தன. அதாவது, காப்பீட்டு நிறுவனத்தின் அங்கீகாரப் பட்டியலில் இல்லாத தனியார் மருத்துவமனையில் சிகிச்சை பெற்றிருத்தல், நோயாளி உயிருக்கு உடனடி ஆபத்து இல்லாத சாதாரண முறையில் சேர்க்கப்பட்டிருத்தல், ஆனால், மேற்கொண்ட அறுவை சிகிச்சை அல்லது சிகிச்சை முறை காப்பீட்டுத் திட்டப் பட்டியலில் உள்ளதாக இருத்தல் உள்ளிட்ட காரணங்களைக் கூறி நிராகரித்து வந்தன. மேலும், அங்கீகரிக்கப்படாத மருத்துவமனையில் சிகிச்சை பெற்றதுடன், அவசர சிகிச்சைப் பிரிவிலும் அனுமதிக்கப்படவில்லை எனக் கூறி, முறையான பிரீமியம் செலுத்தி வந்த ஊழியர்களின் கோரிக்கைகள் பல ஆண்டுகளாக நிராகரிக்கப்பட்டு வந்தன.

2. நீதிமன்றத்தில் நடந்த வழக்கு என்ன?

தருமபுரி மாவட்டம், பாலக்கோடு தாலுகா, பேளாரஹள்ளி அரசு மேல்நிலைப் பள்ளியில் முதுகலை ஆசிரியையாக பணிபுரியும் எழிலரசி என்பவர், தனது கணவருக்கு ஏற்பட்ட உடல்நலக் குறைவிற்காக தனியார் மருத்துவமனையில் சிகிச்சை மேற்கொண்டார். அவரது மருத்துவக் காப்பீட்டுக் கோரிக்கை நிராகரிக்கப்பட்டதைத் தொடர்ந்து, சென்னை உயர்நீதிமன்றத்தில் வழக்குத் தொடுத்தார். இந்த வழக்கை விசாரித்த உயர்நீதிமன்றம் 05.02.2026 அன்று வரலாற்று முக்கியத்துவம் வாய்ந்த தீர்ப்பை வழங்கியது.

மருத்துவ அவசரம் அல்லது மருத்துவமனை நெட்வொர்க்கில் இல்லை என்ற காரணத்தை மட்டுமே சுட்டிக்காட்டி ஊழியர்களின் நியாயமான மருத்துவச் செலவுப் பலன்களை மறுக்க முடியாது. எனவே, நிராகரிப்பு உத்தரவுகள் ரத்து செய்யப்படுகின்றன. மனுதாரருக்கு உரிய மருத்துவச் செலவுத் தொகையை ஆண்டுக்கு 6% வட்டியுடன் கணக்கிட்டு வழங்க வேண்டும் என உத்தரவிட்டது.  

3. தமிழக அரசின் புதிய அரசாணை கூறுவது என்ன?

உயர்நீதிமன்றத் தீர்ப்பை ஏற்றுக்கொண்ட தமிழக அரசு புதிய அரசாணையை வெளியிட்டுள்ளது. அதன்படி, சிகிச்சைக்கான மருத்துவச் செலவுத் தொகை ரூ.1,30,000 மற்றும் அதற்கான 6% வட்டித் தொகை ரூ.5,102 சேர்த்து மொத்தம் ரூ.1,35,102 ஒப்பளிப்பு செய்யப்பட்டுள்ளது. இன்சூரன்ஸ் நிறுவனம் மறுத்தாலும், இத்தொகையை அரசே ஏற்றுக்கொண்டு அரசின் நேரடிச் செலவினக் கணக்கின் கீழ் தருமபுரி மாவட்டக் கருவூல அலுவலர் மூலம் மனுதாரரின் வங்கிக் கணக்கில் செலுத்த உத்தரவிடப்பட்டுள்ளது.  

4. அனைத்து அரசு ஊழியர்கள், ஆசிரியர்களுக்கு இது எவ்வாறு பொருந்தும்?

இந்த அரசாணை குறிப்பிட்ட ஒரு தனிநபருக்கான உத்தரவாகப் பிறப்பிக்கப்பட்டிருந்தாலும், சட்ட ரீதியாக இது 'Scenario-IV' பிரிவின் கீழ் பாதிக்கப்பட்ட ஆயிரக்கணக்கான அரசு ஊழியர்களுக்கு ஒரு முன்னுதாரணத் தீர்ப்பாக மாறுகிறது:

நிராகரிக்கப்பட்ட கோரிக்கைகளை மறுபரிசீலனை செய்ய வழி: நெட்வொர்க் அல்லாத மருத்துவமனைகளில் சிகிச்சை பெற்று, அவசர சிகிச்சை அல்ல எனக் கூறி உங்கள் விண்ணப்பம் நிராகரிக்கப்பட்டிருந்தால், இந்த உயர்நீதிமன்ற உத்தரவு மற்றும் அரசாணை எண் 299-ஐச் சுட்டிக்காட்டி மாவட்ட அளவிலான ஆய்வுக் குழு அல்லது நீதிமன்றம் வாயிலாகப் பரிகாரம் கோர முடியும்.  

அரசு நிர்ணயித்த பேக்கேஜ் தொகை கிடைக்கும்: தனியார் மருத்துவமனையின் கூடுதல் கட்டணங்கள் முழுமையாகக் கிடைக்காவிட்டாலும், அந்த சிகிச்சைக்கு அரசு விதிகளின்படி நிர்ணயிக்கப்பட்ட தகுதியான பேக்கேஜ் தொகையை அரசு கருவூலத்தின் மூலம் பெறுவதற்கான உரிமை நிலைநாட்டப்பட்டுள்ளது.

காலதாமதத்திற்கு 6% வட்டி:

நியாயமான மருத்துவக் கோரிக்கையை நிராகரித்து இழுத்தடித்த காலத்திற்கு ஆண்டிற்கு 6% வட்டியுடன் தொகையைப் பெற இத்தீர்ப்பு வழிகாட்டுகிறது. ஊழியர்களின் ஊதியத்தில் இருந்து மாதந்தோறும் பிடித்தம் செய்யப்படும் மருத்துவக் காப்பீட்டுத் திட்டம், உண்மையான உடல்நலப் பாதிப்பின் போது கைகொடுக்க வேண்டும் என்பதே இத்தீர்ப்பின் அடிப்படை நோக்கமாகும். நெட்வொர்க் மருத்துவமனை விதிமுறைகளால் பாதிக்கப்பட்டு வந்த லட்சக்கணக்கான தமிழக அரசு ஊழியர்கள், ஆசிரியர்கள் மற்றும் ஓய்வூதியர்களுக்கு இந்த அரசாணை ஒரு முக்கியப் பாதுகாப்பு அரணாக அமைந்துள்ளது.