உணவுப் பஞ்சம் : தங்கத்தைப் போல் அரிசியை வாங்கிக் குவிக்கும் நாடுகள் - முழு விவரம்

Rice Price latest News : உலகளாவிய உணவுப் பாதுகாப்பு குறித்த அச்சம் மற்றும் புவிசார் அரசியல் சூழல்கள் காரணமாக, ஆப்பிரிக்க நாடுகள் இந்தியாவிலிருந்து அரிசியை பெருமளவில் கொள்முதல் செய்து சேமிக்கத் தொடங்கியுள்ளன. கடுமையான எல் நினோ வானிலை பாதிப்பு, உக்ரைன் போர் மற்றும் ஈரான் உள்ளிட்ட மத்திய கிழக்கு பிராந்திய பதற்றங்கள் சர்வதேச அளவில் உணவு தானிய விநியோகச் சங்கிலியைப் பாதிக்கலாம் என்ற அச்சத்தால், ஆப்பிரிக்க நாடுகள் தங்களின் இருப்பு கையிருப்பைப் பலப்படுத்த இந்த அதிரடி நடவடிக்கையை மேற்கொண்டு வருகின்றன.

இந்தியத் துறைமுகங்களில் காத்திருக்கும் கப்பல்கள்

அரிசிக்கான தேவை திடீரென அதிகரித்துள்ளதால், இந்தியாவின் காக்கிநாடா உள்ளிட்ட முக்கிய துறைமுகங்கள் அனைத்திலும் சரக்குகளை ஏற்றுவதற்காக ஏராளமான கப்பல்கள் வரிசைகட்டி நிற்கின்றன. காக்கிநாடா துறைமுகத்தில் மட்டுமே ஒரே நேரத்தில் சுமார் 20 கப்பல்கள் நங்கூரமிட்டு நின்ற நிலை இதற்கு முன் பார்த்திராத ஒன்று என ஏற்றுமதியாளர்கள் தெரிவிக்கின்றனர். வழக்கமாக வாங்கும் அளவை விட இரு மடங்கு வரை சில நாடுகள் கொள்முதல் செய்வதால், உலகச் சந்தையில் இந்திய அரிசியின் விலை சமீப மாதங்களில் சுமார் 20 சதவீதம் வரை உயர்ந்துள்ளது.

விளைச்சல் குறைவு மற்றும் ஏற்றுமதி சிக்கல்கள்

தென்மேற்கு பருவமழை நாடு முழுவதும் ஒழுங்கற்ற முறையிலேயே பெய்தது. சில பகுதிகளில் மழைக் குறைவு, சில இடங்களில் அதிக மழை மற்றும் பருவம் தவறிய மழை ஆகியவை காரணமாக நெல் உற்பத்தி சங்கிலி பாதிக்கப்பட்டுள்ளது. குறிப்பாக, நடப்பு பருவத்தில் குறைந்தபட்சம் 10 சதவீத உற்பத்தி குறைய வாய்ப்புள்ளதாகக் கணிக்கப்பட்டுள்ளது. மேலும், கர்நாடகா போன்ற சில மாநிலங்கள் அணைகளில் உள்ள நீரை குடிநீர்த் தேவைக்காக சேமித்து வைத்து, ரபி பாசனத்திற்கு திறந்துவிட மறுத்துள்ளதும் உற்பத்தியைப் பாதிக்கும் காரணியாக மாறியுள்ளது. இதற்கிடையே, உள்நாட்டில் சோனா மசூரி போன்ற பிரபல அரிசி ரகங்களின் விலை கிலோவுக்கு 45–46 ரூபாயிலிருந்து 58–59 ரூபாயாகவும், சுவர்ணா மசூரி அரிசி விலை 31–32 ரூபாயிலிருந்து 36 ரூபாயாகவும் உயர்ந்துள்ளது.

கப்பல் சரக்குக் கட்டணங்கள் பல மடங்கு உயர்வு

அரிசி ஏற்றுமதியாளர்கள் எதிர்கொள்ளும் மற்றொரு மிகப்பெரிய சவால் விண்ணைத் தொடும் கப்பல் சரக்குக் கட்டணமாகும். மும்பையிலிருந்து ஐக்கிய அரபு அமீரகத்தின் ஜெபல் அலி துறைமுகத்திற்கு ஒரு கன்டெய்னருக்கான கப்பல் கட்டணம் முன்பு 100 டாலராக இருந்த நிலையில், தற்போது 5,000 டாலர் வரை செங்குத்தாக உயர்ந்துள்ளது. மேலும், கப்பல்கள் மாற்றுத் துறைமுகங்களில் நீண்ட நாட்கள் காத்திருக்க வேண்டியிருப்பதால், முன்பு 5 முதல் 7 நாட்களில் சென்றடைய வேண்டிய சரக்குகள் தற்போது ஒரு மாதம் வரை தாமதமாகின்றன.

வியட்நாம் வர்த்தக சிக்கல் மற்றும் இந்திய கையிருப்பு

மற்றொரு முக்கிய அரிசி ஏற்றுமதி நாடான வியட்நாம், பிலிப்பைன்ஸ் நாட்டுடன் ஏற்றுமதி ஒப்பந்தங்களில் சிக்கல்களை எதிர்கொண்டுள்ளது. பிலிப்பைன்ஸின் மணிலா துறைமுகம் இறக்குமதியை நிறுத்தியதால் இந்தியக் கப்பல்கள் வியட்நாம் கடற்பகுதியில் காத்திருக்க நேரிட்டது. இருப்பினும், இந்திய உணவு தானியக் கழகத்திடம் செப்டம்பர் மாத நிலவரப்படி 39.1 மில்லியன் டன் அரிசி மற்றும் 30.75 மில்லியன் டன் நெல் கையிருப்பில் இருப்பதால், உள்நாட்டு தேவையைப் பூர்த்தி செய்வதிலும் உணவுப் பாதுகாப்பை உறுதி செய்வதிலும் இந்தியா வலுவான நிலையில் இருப்பதாக ஏற்றுமதியாளர்கள் சுட்டிக்காட்டுகின்றனர்.