Explainer: ரெப்போ விகிதத்தை அதிகரித்த RBI... கடன் EMI-ஐ குறைக்க உதவும் 4 எளிய வழிகள்

RBI Repo Rate Hike: இந்திய ரிசர்வ் வங்கி (RBI) இன்று அடிப்படை வட்டி விகிதமான 'ரெப்போ விகிதத்தை' (Repo Rate) 25 அடிப்படை புள்ளிகள் (basis points) உயர்த்தி, அதனை 5.5 சதவீதமாக நிர்ணயித்துள்ளது. இதைத் தொடர்ந்து கார் கடன், வீட்டுக் கடன் போன்ற கடன்களின் வட்டி விகிதங்கள், EMI ஆகியவற்றில் வரக்கூடிய உயர்வு மக்களை அச்சத்துக்குள்ளாக்கியுள்ளது.

பணவியல் கொள்கைக் குழு

ரிசர்வ் வங்கியின் பணவியல் கொள்கைக் குழு (MPC) உறுப்பினர்கள் இந்த வட்டி விகித உயர்வுக்கு ஒருமனதாக ஆதரவு அளித்தனர். இன்று காலை ரிசர்வ் வங்கி ஆளுநர் ரெப்போ விகித உயர்வு அறிவிப்பை வெளியிட்டார்.

ரெப்போ விகித உயர்வால் கடன் பெறுவதற்கான செலவு அதிகரித்துள்ளது. ரிசர்வ் வங்கி, பிற வங்கிகளுக்கு அளிக்கும் கடனுக்காகும் செலவு அதிகரித்தால், வங்கிகளும் வாடிக்கையாளர்களுக்கான கடன் வட்டி அளவை அதிகரிக்கும். இது கூடுதல் சுமையை ஏற்படுத்தும்.

ரெப்போ விகிதத்துடன் இணைக்கப்பட்ட 'வெளிப்புற அளவுகோல் கடன் விகிதத்துடன்' (EBLR) மாறும் வட்டி விகிதத்திலான (floating-rate) வீட்டுக் கடன்கள், வாகனக் கடன்கள் மற்றும் தனிநபர் கடன்கள் நேரடியாக இணைக்கப்பட்டுள்ளதால், இக்கடன்களுக்கான செலவு உடனடியாக அதிகரிக்கிறது. இது மாதாந்திர தவணை (EMI) அல்லது கடனைத் திருப்பிச் செலுத்தும் கால அளவை நேரடியாகப் பாதிக்கிறது.

மேலும் படிக்க | Life Certificate: அக்டோபரில் எந்தெந்த ஓய்வூதியதாரர்கள் ஆயுள் சான்றிதழைச் சமர்ப்பிக்கலாம்? முக்கிய அப்டேட்!

ரிசர்வ் வங்கி ரெப்போ விகிதத்தை உயர்த்தியதால் அதிகரித்த EMI சுமையைத் தவிர்ப்பதற்கான வழிகளை இங்கே காணலாம்.

1. EMI தொகையைச் சற்று உயர்த்துங்கள்

மத்திய வங்கி ரெப்போ விகிதத்தை உயர்த்தும்போது, ​​வங்கிகள் பொதுவாக வாடிக்கையாளரின் மாதாந்திர EMI தொகையை மாற்றாமல் வைத்துக்கொண்டு, கடனைத் திருப்பிச் செலுத்தும் காலத்தை ஒன்று அல்லது இரண்டு ஆண்டுகள் நீட்டிக்கின்றன. இது கடன் வாங்கியவருக்கு பெரும்பாலும் அதிக செலவு பிடிக்கும் தேர்வாக அமைகிறது. இப்படிப்பட்ட நேரங்களில்,

• கடன் காலத்தை நீட்டிப்பதற்குப் பதிலாக, உங்கள் வங்கியைத் தொடர்புகொண்டு மாதாந்திர EMI தொகையை உயர்த்துவதைத் தேர்ந்தெடுக்கலாம். 
• இது கடன் காலம் அதிகரிப்பதைத் தடுப்பதோடு, கூடுதல் கூட்டு வட்டியாகச் செலுத்த வேண்டிய லட்சக்கணக்கான ரூபாயையும் மிச்சப்படுத்துகிறது.

2. முன்கூட்டியே கடன் தொகையைச் செலுத்துதல் (Pre-payment)

கடன் பெற்றவர், மொத்தமாக பணம் கிடைக்கும்போதெல்லாம், கடனின் அசல் தொகையை சிறிது சிறிதாக அடைப்பது வட்டித் தொகையை மிச்சமாக்க உதவும்.

• பண்டிகைக்கால போனஸ், பொது வருங்கால வைப்பு நிதி (PPF) அல்லது உபரி சேமிப்பு போன்ற வழிகளில் உங்களுக்கு நிதி கிடைத்தால், அதைக் கொண்டு கடனின் அசல் தொகையைச் செலுத்தலாம். 
• உங்கள் மொத்த நிலுவைக் கடன் தொகையில் ஆண்டுக்கு 5% தொகையை முன்கூட்டியே செலுத்துவதன் மூலம், 0.25% வட்டி விகித உயர்வால் ஏற்படும் பாதிப்பை முழுமையாகச் சமன் செய்ய முடியும். 
• இந்த அணுகுமுறை 20 ஆண்டுகாலக் கடனை வெறும் 13–14 ஆண்டுகளாகக் குறைக்கக்கூடும்.
• இதன் மூலம் கணிசமான வட்டித் தொகை மிச்சமாகும்.

மேலும் படிக்க | 8வது ஊதியக் குழு: லெவல் 6-8 அரசு ஊழியர்களுக்கு 1 லட்சத்தைத் தாண்டும் அடிப்படை ஊதியம்!!

3. 'ஹோம் சேவர்' (ஓவர் டிராஃப்ட்) வசதியைப் பயன்படுத்துதல்

உங்கள் அவசரக்கால நிதியையோ அல்லது பணப்புழக்கத்தையோ பாதிக்காமல் வட்டியைச் சேமிக்க விரும்பினால், உங்கள் தற்போதைய கடனை 'வீட்டுக் கடன் ஓவர் டிராஃப்ட்' (home loan overdraft) கணக்காக மாற்றிக்கொள்ளலாம்.

• இதில் கடனுடன் இணைந்த ஒரு நடப்புக் கணக்கு அல்லது சேமிப்புக் கணக்கு திறக்கப்படும்.
• இதன் மூலம், ₹5–8 லட்சம் போன்ற உபரி நிதியைச் சில மாதங்களுக்கு அக்கணக்கில் வைத்திருக்க முடியும். 
• வங்கி, நீங்கள் டெபாசிட் செய்த தொகையை நிலுவையில் உள்ள மொத்தக் கடன் தொகையிலிருந்து கழித்துவிட்டு, மீதமுள்ள தொகைக்கு மட்டுமே வட்டி வசூலிக்கிறது. 
• தேவைப்படும்போது இந்தப் பணத்தை நீங்கள் திரும்பப் பெற்றுக்கொள்ளலாம்.

4. வீட்டுக் கடன் மாற்றம் மற்றும் 'ஸ்பிரெட்' (spread) குறித்த பேச்சுவார்த்தை

வங்கியுடன் கடன் 'ஸ்பிரெட்' பற்றிய பேச்சுவார்த்தை மூலம் நன்மை பெறலாம்.

• கடன் வாங்கிய பிறகு உங்கள் CIBIL ஸ்கோர் 780 அல்லது 800-க்கு மேல் உயர்ந்திருந்தாலும், அல்லது உங்கள் வேலைவாய்ப்பு அல்லது வருமான நிலை மேம்பட்டிருந்தாலும், உங்கள் தற்போதைய வங்கியிடம் 'ஸ்பிரெட்'டை (அதாவது, அடிப்படை வட்டி விகிதத்திற்கு (benchmark rate) மேலாக வசூலிக்கப்படும் கூடுதல் விகிதம்) குறைக்குமாறு கோரலாம். 
• தற்போதைய வங்கி வட்டி விகிதத்தைக் குறைக்க முன்வராவிட்டால், குறைந்த வட்டி விகிதத்தை வழங்கும் வேறொரு வங்கிக்கு உங்கள் கடனை மாற்றுவது குறித்துப் பரிசீலிக்கலாம். 
• பெரிய அளவிலான கடன்களுக்கு, வட்டி விகிதத்தில் 0.25% முதல் 0.50% வரை சேமிப்பது கூட, பல லட்சம் ரூபாய் வரை பணத்தை மிச்சப்படுத்த உதவும்.

வட்டி விகிதங்கள் உயர்ந்துள்ள காலத்திலும், வீட்டுக் கடன், வாகன கடன் போன்றவற்றுக்கான EMI-ஐ செலுத்திக்கொண்டிருக்கும் நபர்கள், மேலே குறிப்பிடப்பட்டுள்ள வழிகள் மூலம் அதிக பண விரயத்தை தவிர்க்க முயற்சிக்கலாம்.

மேலும் படிக்க | திருப்பதி ரூ.300 ஸ்பெஷல் தரிசன டிக்கெட் புக்கிங் தொடக்கம்! எப்படி புக் செய்வது?