Explainer | ஈரான்-அமெரிக்கா போர்: ஓமனுக்கு டொனால்ட் டிரம்ப் விடுத்த பகிரங்க எச்சரிக்கை!

பிப்ரவரி 28 முதல் மத்திய கிழக்கு பிராந்தியத்தில் ஈரான், அமெரிக்கா, இஸ்ரேல், லெபனான், காசா, சவுதி அரேபியா மற்றும் ஹூதி அமைப்பினருக்கு இடையே தொடர்ந்து போர் பதற்றம் நீடித்து வருகிறது. இந்நிலையில் இந்த மோதலில் தற்போது 'ஓமன்' நாடும் ஒரு முக்கிய புள்ளியாக உருவெடுத்துள்ளது.

மத்திய கிழக்கில் நீடித்து வரும் ஈரான் மற்றும் அமெரிக்கா மோதல் தற்போது மேலும் ஒரு ஆபத்தான கட்டத்தை எட்டியுள்ளது. அமெரிக்க அதிபர் டொனால்ட் டிரம்ப், ஈரானுடன் நடைபெறும் பேச்சுவார்த்தைக்கு ஓமன் இடையூறாக இருந்தால், அந்த நாட்டுக்கு எதிராக ராணுவ நடவடிக்கை எடுக்கப்படும் என எச்சரித்திருப்பது சர்வதேச அளவில் அதிர்வலைகளை ஏற்படுத்தியுள்ளது.

ஏற்கனவே ஈரான் மற்றும் அமெரிக்கா இடையிலான 60 நாள் பேச்சுவார்த்தை காலக்கெடு எந்தவிதமான இறுதி உடன்பாடும் இல்லாமல் முடிவடைந்துள்ளது. அந்த இடைக்கால புரிந்துணர்வு ஒப்பந்தத்தை நீட்டிக்க அமெரிக்கா விரும்பவில்லை என்று டிரம்ப் தெரிவித்துள்ளார்.

இதற்கிடையில், ஈரானும் ஓமனும் ஹார்முஸ் நீரிணை வழியாக சர்வதேச வர்த்தக கப்பல்கள் பாதுகாப்பாக செல்லும் வகையில் தனிப்பட்ட பேச்சுவார்த்தையில் ஈடுபட்டுள்ளன. இந்த முயற்சியே தற்போது அமெரிக்கா - ஈரான் மோதலின் அடுத்த முக்கிய திருப்பமாக மாறியுள்ளது.

மேலும் படிக்க - அமெரிக்கா-ஈரான் மோதல்: ஹார்முஸ் முதல் எண்ணெய் சந்தை வரை... அடுத்து என்ன நடக்கும்? Explained

ஓமன் மீது குண்டுவீச்சு எச்சரிக்கை: டிரம்ப் அதிரடி

ஈரான் மற்றும் அமெரிக்கா இடையே நீண்டகாலமாக அமைதி பேச்சுவார்த்தைக்கு ஓமன் தூதராகச் செயல்பட்டு வந்தது. ஆனால் அமெரிக்காவிற்கும் ஈரானுக்கும் இடையே நடக்கும் பேச்சுவார்த்தைக்கு ஓமன் தடையாக இருந்தால், அந்நாட்டின் மீது குண்டுவீச்சு நடத்தப்படும் என Fox News ஊடக நேர்காணலில் டிரம்ப் எச்சரித்துள்ளார்.

ஹார்முஸ் நீரிணை (Strait of Hormuz) பகுதி சர்வதேச கடல் பகுதி அல்ல, அது தங்களின் எல்லைக்குட்பட்ட கடல் பகுதி என ஈரானும் ஓமனும் கூறி வருகின்றன. இச்சூழலில் ஓமன் மீது டிரம்ப் தெரிவித்துள்ள இந்த அச்சுறுத்தல் சர்வதேச சமூகத்தில் பெரும் அதிர்ச்சியை ஏற்படுத்தியுள்ளது.

ஏன் ஓமன் இவ்வளவு முக்கியம்?

ஈரான் மற்றும் அமெரிக்கா இடையிலான நேரடி பேச்சுவார்த்தைகளில் ஓமன் நீண்ட காலமாக முக்கியமான மத்தியஸ்த நாடாக இருந்து வருகிறது.

தற்போது ஹார்முஸ் நீரிணை தொடர்பாக ஈரான் மற்றும் ஓமன் இடையே தனிப்பட்ட பேச்சுவார்த்தை நடைபெற்று வருகிறது. வணிகக் கப்பல்கள் பாதுகாப்பாக செல்லும் வழிமுறை குறித்து இரு நாடுகளும் முன்னேற்றம் கண்டுள்ளதாக ஈரான் தரப்பு தெரிவித்துள்ளது. இதனால்தான் டிரம்பின் ஓமன் குறித்த எச்சரிக்கை முக்கியத்துவம் பெறுகிறது.

ஒருபுறம் ஓமன் பேச்சுவார்த்தைக்கு பாலமாக செயல்படுகிறது. மறுபுறம் அமெரிக்கா ஹார்முஸ் நீரிணை மீண்டும் திறக்கப்பட வேண்டும் என்று அழுத்தம் கொடுத்து வருகிறது. இந்த இரண்டு நிலைப்பாடுகளும் மோதும் சூழல் உருவாகியுள்ளது.

ஈரான் - ஓமன் பேச்சுவார்த்தையில் என்ன நடக்கிறது?

ஈரான் தரப்பில் இருந்து வெளியாகிய தகவல்களின்படி, ஹார்முஸ் வழியாக கப்பல்கள் செல்வதற்கான நடைமுறைகள் தொடர்பாக ஓமனுடன் பேச்சுவார்த்தை முன்னேறி வருகிறது. முழுமையான உடன்பாடு இன்னும் இறுதி செய்யப்படவில்லை என்றாலும், கப்பல் போக்குவரத்தை நிர்வகிப்பது தொடர்பாக இரு தரப்பும் முக்கியமான கட்டத்தை எட்டியுள்ளதாக தகவல்கள் தெரிவிக்கின்றன.

இதுதான் அமெரிக்காவுக்கு முக்கிய பிரச்சினையாக மாறியுள்ளது. அமெரிக்காவின் கோரிக்கைகள் மற்றும் ஈரான்–ஓமன் இடையிலான தனிப்பட்ட ஏற்பாடு ஒரே பாதையில் செல்லாவிட்டால், பதற்றம் மேலும் அதிகரிக்க வாய்ப்பு உள்ளது.

ஹார்முஸ் நீரிணைப் போர்: தற்போதைய நிலைப்பாடு

மேலும் படிக்க - அரியவகை நோயால் பாதிக்கப்பட்ட..28 வயது இன்ஸ்டா பிரபலம் இறப்பு!

டிரம்ப் ஏன் ஓமனை எச்சரித்தார்?

டிரம்பின் குற்றச்சாட்டு என்னவென்றால், ஈரானுடன் அமெரிக்கா மேற்கொள்ளும் முயற்சிகளுக்கு ஓமன் இடையூறாக இருக்கக்கூடாது என்பதே.

Fox News-க்கு அளித்த பேட்டியில், ஓமன் அமெரிக்கா–ஈரான் முயற்சிகளுக்கு தடையாக இருந்தால் ராணுவ நடவடிக்கை எடுக்கப்படும் என டிரம்ப் கடுமையாக எச்சரித்தார். 

இதனால் இதுவரை மத்தியஸ்தராக பார்க்கப்பட்ட ஓமன், தற்போது மோதலின் நேரடி அழுத்தத்துக்குள் சிக்கியுள்ளது.

வளைகுடா நாடுகளை கைவிட்ட அமெரிக்கா?

சவுதி அரேபியா, யுஏஇ, கத்தார் போன்ற வளைகுடா நாடுகள் தங்கள் நாட்டில் அமெரிக்க ராணுவ முகாம்களுக்கு அனுமதி அளித்தும், ஈரானிடம் இருந்து தங்களைப் பாதுகாக்க அமெரிக்கா தவறிவிட்டதாகக் குற்றஞ்சாட்டுகின்றன.

இதற்குப் பதிலளித்த டிரம்ப், "அனைத்து நாடுகளையும் சென்று எங்களால் காப்பாற்ற முடியாது; குறிப்பாக அமெரிக்காவிற்கு உதவாத நாடுகளைப் பாதுகாக்க முடியாது" எனக் கூறி, வளைகுடா நாடுகளைத் சுய பாதுகாப்பு தேடிக் கொள்ளுமாறு சுட்டிக்காட்டியுள்ளார்.

ஈரான் அடுத்த கட்டத்தில் என்ன செய்யும்?

அமெரிக்கா - ஈரான் பேச்சுவார்த்தையில் முன்னேற்றம் இல்லாத நிலையில், ஈரான் தனது அணுகுமுறையை மேலும் கடுமையாக்கக்கூடும் என்ற அச்சமும் உருவாகியுள்ளது. குறிப்பாக ஹார்முஸ் நீரிணை பகுதியில் கப்பல் போக்குவரத்து ஏற்கனவே பாதிக்கப்பட்டுள்ள நிலையில், மேலும் கப்பல்கள் தாக்கப்பட்டால் சர்வதேச சந்தையில் அதிர்ச்சி ஏற்படலாம்.

ஆகஸ்ட் 14 அன்று கூட ஹார்முஸ் பகுதியில் மேலும் இரண்டு கப்பல்கள் தாக்கப்பட்டதாகவும், அதன் பின்னர் கப்பல் போக்குவரத்து கடுமையாகக் குறைந்ததாகவும் Reuters தெரிவித்தது.

அமெரிக்காவுக்கு இருக்கும் சிக்கல் என்ன?

அமெரிக்காவுக்கு ஈரானை ராணுவ ரீதியாக அழுத்தம் கொடுப்பது மட்டும் போதுமானதாக இல்லை. ஏனெனில் போர் நீடித்தால் அதன் பொருளாதார தாக்கமும் அமெரிக்காவையே பாதிக்கும்.

டிரம்ப் நிர்வாகம் ஈரானின் மீது அழுத்தம் அதிகரித்து வருவதாக கூறினாலும், எண்ணெய் விலை உயர்வு, பிராந்திய பாதுகாப்பு பிரச்சினை மற்றும் அமெரிக்க ராணுவ வளங்களின் நீண்டகால பயன்பாடு போன்றவை புதிய சவால்களை உருவாக்குகின்றன.

அதே நேரத்தில், வளைகுடா நாடுகளும் தங்களது பாதுகாப்பு குறித்து புதிய கணக்கீடுகளை செய்ய வேண்டிய நிலைக்கு தள்ளப்பட்டுள்ளன.

இந்தியாவுக்கு என்ன தாக்கம்?

ஹார்முஸ் நெருக்கடி நீடித்தால் இந்தியாவும் அதன் தாக்கத்திலிருந்து முழுமையாக தப்ப முடியாது. இந்தியாவின் எரிசக்தி தேவையில் இறக்குமதி முக்கிய பங்கு வகிக்கிறது. எனவே சர்வதேச கச்சா எண்ணெய் விலை தொடர்ந்து உயர்ந்தால், அதன் தாக்கம் இந்திய பொருளாதாரத்திலும் தெரியக்கூடும்.

குறிப்பாக..

• பெட்ரோல், டீசல் விலை மீது அழுத்தம்
• போக்குவரத்து செலவு அதிகரிப்பு
• விமான கட்டணங்களில் மாற்றம்
• இறக்குமதி செலவு அதிகரிப்பு
• பணவீக்க அழுத்தம்
• தொழில்துறை உற்பத்தி செலவு உயர்வு" போன்ற விளைவுகள் ஏற்பட வாய்ப்பு உள்ளது.

மேலும் படிக்க - 5.3 வினாடியில் 800 kmph வேகம்... அதிவேகத்தில் மிதக்கும் ரயில் - மிரட்டும் சீனா