ஆசிட் குடித்த டீச்சர், உடலில் சிகரெட் சூடு காயம்: கொலையா, தற்கொலையா? மனதை உலுக்கும் கொடூரம்

Madhya Pradesh Crime: மத்தியப் பிரதேசத்தில் நெஞ்சை உலுக்கும் சம்பவம் ஒன்று நடந்துள்ளது. மத்தியப் பிரதேசத்தின் கர்கோன் நகரில், கடந்த இரண்டு நாட்களாக ஒரு பெண்ணின் மர்ம மரணம் விவாதப் பொருளாக இருந்து வருகிறது. தற்போது இது குறித்த திடுக்கிடும்  தகவல்கள் கிடைத்துள்ளன.

மத்தியப் பிரதேசம் கர்கோன் மாவட்டத்தில் நடந்த சம்பவம்

மத்தியப் பிரதேசத்திம் கர்கோன் மாவட்டத்தில் 29 வயதுடைய பெண் ஒருவர் சந்தேகத்திற்கிடமான முறையில் உயிரிழந்தார். அவரது மரணம் குறித்து குடும்பத்தினர் சந்தேகம் எழுப்பியதைத் தொடர்ந்து, பிரேதப் பரிசோதனைக்காக அவரது உடல் அடக்கம் செய்யப்பட்ட இடத்திலிருந்து தோண்டி எடுக்கப்பட்டது.

கணவரால் கொடுமைப்படுத்தப்பட்ட ஆசிரியை

நிலோஃபர் என்று அறியப்படும் உயிரிழந்த  அந்த பெண் ஒரு ஆசிரியை ஆவார். நகரின் மோகன் டாக்கீஸ் பகுதியில் அவர் சந்தேகத்திற்கிடமான முறையில் இறந்து கிடந்தார். சனிக்கிழமையன்று அவரது உடல் அடக்கம் செய்யப்பட்டது.

தனது கணவர் நயீம் கான் தன்னைத் தொடர்ந்து தாக்கி வந்ததாக நிலோஃபர் கூறியிருந்ததாக அவரது குடும்பத்தினர் புகார் மற்றும் குற்றச்சாட்டுகளை முன்வைத்தனர்.

இதையடுத்து, துணைப் பிரிவு நீதிபதியின் (SDM) உத்தரவின் பேரில், ஞாயிற்றுக்கிழமையன்று அவரது உடல் அடக்கம் செய்யப்பட்ட இடத்திலிருந்து தோண்டி எடுக்கப்பட்டது. மாவட்ட மருத்துவமனையில் மருத்துவர்கள் குழுவினர் உடலைப் பிரேதப் பரிசோதனை செய்தனர். பிரேதப் பரிசோதனை மற்றும் தடயவியல் துறை அறிக்கைகளுக்காகக் காவல்துறை காத்திருக்கிறது.

காவல்துறை அளித்த தகவல்

காவல்துறையின் தகவலின்படி, நிலோஃபர் ஆசிட் (அமிலம்) குடித்துவிட்டதாக அவரது கணவர் வீட்டார் தெரிவித்தனர். அவரது உடல்நிலை மோசமடைந்ததையடுத்து, சிகிச்சைக்காக கர்கோனில் உள்ள தனியார் மருத்துவமனைக்கு அழைத்துச் செல்லப்பட்டதாக அவர்கள் கூறினர்.

அங்கு முதலுதவி சிகிச்சைக்குப் பிறகு, அவர் இந்தூருக்கு மேல் சிகிச்சைக்காக பரிந்துரைக்கப்பட்டார். ஆனால் வழியிலேயே கஸ்ராவாத் (Kasrawad) அருகே அவர் உயிரிழந்தார். நிலோஃபரின் வாக்குமூலத்தைப் பதிவு செய்ய முடியவில்லை.

மறுபுறம், நிலோஃபரின் தாயார் ஆயிஷா மற்றும் சகோதரர் ஃபர்ஹான் ஷேக் ஆகியோர், "சனிக்கிழமை மதியம் 1:30 மணி முதல் 2:00 மணிக்குள் இந்தச் சம்பவம் குறித்து எங்களுக்குத் தெரியவந்தது" என்று கூறினர். நிலோஃபரின் மரணம் தொடர்பான முழுமையான தகவல்கள் தங்களுக்கு வழங்கப்படவில்லை என்றும், அவசரகதியில் சில ஆவணங்களில் கையெழுத்திட வற்புறுத்தப்பட்டதாகவும் அவர்கள் குற்றம் சாட்டினர்.

அவசரம் அவசரமாக அடக்கம்?

தாங்கள் அடக்கம் செய்யும் இடத்திற்கு வருவதற்கு முன்பே நிலோஃபரின் உடல் அடக்கம் செய்யப்பட்டுவிட்டதாக நிலோஃபரின் குடும்பத்தினர் தெரிவித்தனர். இந்த அவசரம் சந்தேகத்தை ஏற்படுத்தியதால், அவர்கள் இது குறித்து விசாரணை நடத்தக் கோரினர்.

நிலோஃபர் அத்தகைய தீவிரமான முடிவை எடுத்திருக்க வாய்ப்பில்லை என்று கூறிய குடும்பத்தினர், அவர் தற்கொலை செய்துகொண்டிருக்கலாம் என்ற கூற்றையும் மறுத்தனர்.

மேலும் படிக்க | பெண்ணை கொன்று சாக்குப்பையில் அடைத்த லிவ்-இன் பார்ட்னர்: ஹைதராபாதில் திகில் சம்பவம்

உடலில் காயங்கள்

நிலோஃபரின் குடும்ப உறுப்பினர் ஒருவர், அவரது உடலில் காயங்கள் இருந்ததாகக் கூறினார். அவரது கணவர் வீட்டார் அவரை பெல்ட்டால் அடித்ததாகவும், தொடை, மார்பு, முதுகு, வயிறு மற்றும் பிறப்புறுப்பு உள்ளிட்ட உடலின் பல்வேறு பகுதிகளில் சிகரெட்டால் சுட்டதாகவும் அவர் குற்றம் சாட்டினார். பிரேதப் பரிசோதனை அறிக்கை, தடயவியல் பரிசோதனை மற்றும் பிற ஆதாரங்களின் அடிப்படையில் இந்தக் குற்றச்சாட்டுகளின் உண்மைத்தன்மையை உறுதிப்படுத்த முடியும் என்று காவல்துறை தெரிவித்துள்ளது.

9 ஆண்டுகளுக்கு முன்பு நடந்த திருமணம்

நிலோஃபரின் தாய்மாமன் ஷேக் மொஹ்சின் மன்சூர் கூறுகையில், "நிலோஃபர் சுமார் ஒன்பது ஆண்டுகளுக்கு முன்பு கார்கோனைச் சேர்ந்த ஒரு பிரபலமான மருத்துவரின் மகனான நயீம் கானை மணந்தார். நயீமுக்கு ஏற்கனவே திருமணமாகியிருந்தது; அவரது முதல் திருமணம் குறித்த விவரம் நிலோஃபரின் குடும்பத்தினருக்குப் பின்னரே தெரியவந்தது. இருப்பினும், நிலோஃபர் தனது திருமண வாழ்க்கையைத் தொடர்ந்தார்," என்று தெரிவித்தார். இத்தம்பதியினருக்கு ஏழு மற்றும் நான்கு வயதில் இரண்டு குழந்தைகள் உள்ளனர்.

முதல் மனைவியுடன் தொடர்பா?

திருமணத்திற்குப் பிறகும் நிலோஃபரின் கணவர் நயீம் கான் முதல் மனைவியுடன் தொடர்பில் இருந்ததாகவும், இதனால் தம்பதியினரிடையே அடிக்கடி தகராறு ஏற்பட்டதாகவும் நிலோஃபரின் சகோதரர் ஃபர்ஹான் குற்றம் சாட்டியுள்ளார். இது குறித்தும் காவல்துறை விசாரணை மேற்கொண்டு வருகின்றது.

மேலும் படிக்க | கோவையில் கொடூரம்: கல்லூரி மாணவர் அடித்துக் கொலை.. 5 பேரிடம் போலிஸ் தீவிர விசாரணை!

உடலை தோண்டி எடுத்த காவல்துறை

ஞாயிற்றுக்கிழமையன்று, எஸ்டிஎம் (SDM)-இன் அறிவுறுத்தலின் பேரில் வட்டாட்சியர் (Tehsildar) முன்னிலையில் 'பஞ்ச்நாமா' (ஆய்வு அறிக்கை) தயாரிக்கப்பட்டது. அதைத் தொடர்ந்து, காவல் நிலைய அதிகாரி பி.எல். மண்டலோய் மற்றும் காவல் குழுவினர் முன்னிலையில், முக்கிய இடுகாட்டிலிருந்து நிலோஃபரின் உடல் தோண்டி எடுக்கப்பட்டது.

பின்னர் உடல் மாவட்ட மருத்துவமனைக்கு அனுப்பப்பட்டு, அங்கு நான்கு மருத்துவர்கள் கொண்ட குழுவால் பிரேதப் பரிசோதனை செய்யப்பட்டது. தடயவியல் பரிசோதனைக்காக உடலின் உட்புற உறுப்பு மாதிரிகள் (viscera) காவல்துறையினரால் பாதுகாத்து வைக்கப்பட்டுள்ளன.

வழக்கு பதிவு செய்த கார்கோன் காவல் துறை

கார்கோன் காவல் துறை அதிகாரிகளின் தகவலின்படி, இது தொடர்பாக வழக்கு பதிவு செய்யப்பட்டு விசாரணை தொடங்கப்பட்டுள்ளது. நிலோஃபரின் குடும்பத்தினர் மற்றும் அவரது கணவர் வீட்டுத் தரப்பினரிடமிருந்து காவல்துறையினர் வாக்குமூலங்களைப் பதிவு செய்து வருகின்றனர். மருத்துவமனை ஆவணங்கள், சூழ்நிலைச் சான்றுகள் மற்றும் பிரேதப் பரிசோதனை அறிக்கை ஆகியவையும் விசாரணையின் ஒரு பகுதியாகக் கருத்தில் கொள்ளப்படுகின்றன.

காவல் கண்காணிப்பாளர் (SP) ரவீந்திர வர்மா கூறுகையில், "நிர்ணயிக்கப்பட்ட சட்ட நடைமுறைகளின்படி உடல் தோண்டி எடுக்கப்பட்டு பிரேதப் பரிசோதனை செய்யப்பட்டது. நிலோஃபரின் தாயார் மற்றும் சகோதரர் பிரமாணப் பத்திரங்களைச் சமர்ப்பித்த பிறகு உடல் அடக்கம் செய்யப்பட்டது. பிரேதப் பரிசோதனை அறிக்கை மற்றும் விசாரணையில் தெரியவரும் உண்மைகளின் அடிப்படையில் மேல் நடவடிக்கை எடுக்கப்படும்," என்று தெரிவித்தார்.

கொத்வாலி காவல் நிலைய ஆய்வாளர் (TI) ராஜேந்திர அவாசியா கூறுகையில், "இரு தரப்பினரிடமிருந்தும் வாக்குமூலங்கள் பெறப்பட்டுள்ளன. பிரேதப் பரிசோதனை அறிக்கைக்காகக் காத்திருக்கிறோம்," என்று கூறினார்.

நீதி கோரும் குடும்பத்தினர்

இறந்த பெண்ணின் மறைவுக்குப் பிறகு, அவரது குழந்தைகளின் வளர்ப்பு குறித்து அவரது தாய்வழி உறவினர்கள் கவலை தெரிவித்துள்ளனர். கொலை உறுதி செய்யப்பட்டால், அக்குழந்தைகளுக்கு நீதி கிடைக்க வேண்டும் என்று அவர்கள் வலியுறுத்துகின்றனர்.

மேலும் படிக்க | புதுவை எல்லையில் பட்டப்பகலில் பயங்கரம்: வெடிகுண்டு வீசி இளைஞர் கொலை.. வெறிச்செயல்