Explained: அமெரிக்க அதிபரின் Veto அதிகாரம்... டிரம்பால் என்ன செய்ய முடியும்?
அமெரிக்க இடைக்காலத் தேர்தலில் நாடாளுமன்றத்தின் இரு அவைகளிலும் பெரும்பான்மை பெற்று ஜனநாயகக் கட்சி வெற்றி பெற்றுள்ளது. குடியரசுக் கட்சி பெரும்பான்மையை இழந்ததால், தனது நிர்வாகத் திட்டங்களைக் காக்க அதிபர் டொனால்ட் டிரம்ப் VETO அதிகார்ததை முன்னிறுத்துகிறார்.
US Midterm Election 2026, Veto Power Explained: அமெரிக்காவில் நவம்பர் 3ஆம் தேதி, 2026 இடைக்கால தேர்தல் நடந்தது.உடனே வாக்குகள் எண்ணப்பட்டு தேர்தல் முடிவுகளும் வெளியாகின.
இந்த தேர்தல் முடிவுகள் அமெரிக்க அதிபர் டொனால்ட் டிரம்பின் அரசியல் எதிர்காலத்திற்கு முக்கியத்துவம் வாய்ந்ததாக கருதப்பட்டது. அதிபராக டிரம்ப் பதவியில் இருந்தாலும், நாடாளுமன்றத்தின் இரு அவைகளிலும் பெரும்பான்மை இல்லாவிட்டால் அவரது திட்டங்களைச் சட்டமாக்குவதில் சிக்கல்கள் ஏற்படலாம்.
குறிப்பாக, எதிர்க்கட்சியினர் பெரும்பான்மை பெற்றால் அரசின் முக்கிய மசோதாக்கள் நிறைவேறுவதைத் தடுக்க முடியும். இந்நிலையில், தேர்தல் முடிவுகளின்படி, அமெரிக்க நாடாளுமன்றத்தின் இரு அவைகளையும் எதிர்க்கட்சியான ஜனநாயக கட்சி கைப்பற்றி உள்ளது.
மேலும் அதிபர் டொனால்ட் டிரம்ப் சார்ந்திருக்கும் குடியரசுக் கட்சி இரு அவைகளிலும் தனது பெரும்பான்மையை இழந்துள்ளது. இதனால், அடுத்த இரண்டு ஆண்டுகளில் டிரம்ப் அரசு கொண்டுவரும் சட்ட மசோதாக்கள், வரவு செலவு திட்டங்கள் உள்ளிட்ட முக்கிய முடிவுகளுக்கு ஜனநாயக கட்சியின் ஆதரவு அல்லது எதிர்ப்பை சந்திக்க வேண்டிய கட்டாயம் உருவாகி உள்ளது.
நாடாளுமன்றத்தில் இருக்கட்சிகளின் எண்ணிக்கை
| அவை | ஜனநாயக கட்சி | குடியரசு கட்சி |
| செனட் (100) | 54 (+2 சுயேட்சை ஆதரவு) | 44 |
| பிரதிநிதிகள் சபை (435) | 228 | 139 |
*இந்திய நேரப்படி இரவு 10 மணி நிலவரம்
டிரம்ப் போட்ட VETO பதிவு
- தேர்தல் முடிவுகள் வெளியாகிக் கொண்டிருந்த நேரத்தில், அதாவது குடியரசுக் கட்சி பெரும்பான்மையை இழந்து பின்னடைவை சந்தித்தபோது, அதிபர் டொனால்ட் டிரம்ப் அவரது Truth Social சமூக வலைதளப் பக்கத்தில் ஒரு புகைப்படத்தை பதிவிட்டார்.
- அந்த புகைப்படத்தில் டிரம்ப் அணியும் வழக்கமான சிவப்பு நிறத் தொப்பியில் VETO என பொறிக்கப்பட்டிருந்தது. இதன்மூலம், ஜனநாயகக் கட்சி நாடாளுமன்றத்தில் நிறைவேற்றும் மசோதாக்களை தனது அதிபர் அதிகாரத்தைப் பயன்படுத்தி நிராகரிக்கப்போவதாக அவர் மறைமுகமாக சுட்டிக்காட்டியதாகப் பொதுவாக பார்க்கப்படுகிறது.
- இதற்கு முன், CBS News செய்தி நிறுவனத்திற்கு அளித்த நேர்காணலில், தனது VETO அதிகாரத்தை 'Ultimate Power' (உச்சபட்ச அதிகாரம்) என டிரம்ப் குறிப்பிட்டிருந்தார். ஜனநாயக கட்சியினர் கொண்டுவரும் மசோதாக்களை நிராகரிப்பேன் என்றும்; தொடர்ந்து VETO செய்தால் ஒருகட்டத்தில் அவர்கள் பேச்சுவார்த்தைக்கு வருவார்கள் என்றும் அந்த நேர்காணலில் அவர் பேசியிருந்தது நினைவுக்கூரத்தக்கது.
VETO அதிகாரம் என்றால் என்ன?
- அமெரிக்க அரசியலமைப்புச் சட்டத்தின்படி Article I, 7வது பிரிவின்படி, அதிபருக்கு VETO அதிகாரம் வழங்கப்பட்டுள்ளது. இதன்படி, பிரதிநிதிகள் சபை மற்றும் செனட் ஆகிய இரு அவைகளிலும் நிறைவேற்றப்பட்ட ஒரு மசோதா அதிபரின் ஒப்புதலுக்கான வெள்ளை மாளிகைக்கு அனுப்பப்படும்.
- அந்த மசோதாவில் அதிபர் கையெழுத்திட்டால் மட்டுமே அது சட்டமாகும். அதேநேரத்தில் அதிபர் அதற்கு ஒப்புதல் அளிக்காதபட்சத்தில், தனது எதிர்ப்புக் குறிப்புகளுடன் நாடாளுமன்றத்துக்கே அந்த மசோதாவை திருப்பி அனுப்பலாம். இதுவே VETO எனப்படுகிறது.
- இதில் கவனிக்கத்தக்க விஷயம் என்னவென்றால், ஒரு மசோதாவின் குறிப்பிட்ட சில அம்சங்களை மட்டும் நீக்கிவிட்டு, மற்ற அனைத்திற்கும் ஒப்புதல் அளிக்கும் அதிகாரம் அதிபருக்கு கிடையாது. ஒன்று அவரால் முழு மசோதாவையும் ஏற்க முடியும், அல்லது நிராகரிக்க முடியும், அவ்வளவுதான்.
VETO அதிகாரத்தை மீற முடியுமா?
- டிரம்பின் VETO அதிகாரத்தை மீறவே முடியாதா என்றால், இல்லை. அதை மீறி செயல்பட முடியும். அதாவது அமெரிக்காவில் அதிபரின் VETO அதிகாரம் முழுமையானது அல்ல, அதிபர் நிராகரித்த ஒரு மசோதா மீண்டும் இரு அவைகளிலும் வாக்கெடுப்புக்கு கொண்டுவரப்படலாம்.
- ஆனா்ல், அந்த மசோதா மீண்டும் சட்டமா்க வேண்டுமென்றால், பிரதிநிதிகள் சபை மற்றும் செனட் ஆகிய இரண்டு அவைகளிலும் இரண்டு பங்கு உறுப்பினர்களின் ஆதரவு அவசியம்.
பிரதிநிதிகள் சபை: மொத்தம் உறுப்பினர்கள் - 435, ஆதரவு அளிக்க வேண்டிய உறுப்பினர்கள் - 290
செனட்: மொத்தம் உறுப்பினர்கள் - 100, ஆதரவு அளிக்க வேண்டிய உறுப்பினர்கள் - 67
- எனவே, ஜனநாயகக் கட்சி இரு அவைகளிலும் பெரும்பான்மை பெற்றிருந்தாலும், மூன்றில் இரண்டு பங்கு ஆதரவு இல்லாமல் டிரம்பின் VETO அதிகாரத்தை தனியாக முறியடிக்க முடியாது. அதற்கு டிரம்ப் சார்ந்த குடியரசுக் கட்சியினர் சிலரின் ஆதரவும் தேவைப்படும்.
Pocket VETO என்றால் என்ன?
- VETO அதிகாரத்தில் மற்றொரு முக்கியமான அம்சம்தான் இந்த Pocket VETO.
- அதிபருக்கு ஒரு மசோதா அனுப்பப்பட்ட பிறகு, 10 நாட்களுக்குள் (ஞாயிற்றுக்கிழமைகள் சேர்க்காமல்) கையெழுத்திடாமலும், நாடாளுமன்றத்திற்கு திருப்பி அனுப்பாமல் இருந்தாலும், நாடாளுமன்றம் தொடர்ந்து அந்த கூட்டத்தில் இருந்தால் அந்த மசோதா தானாகவே சட்டமாகிவிடும்.
- ஆனால், 10 நாட்களுக்குள் நாடாளுமன்றக் கூட்டத்தொடர் நிறைவடைந்து, மசோதாவைத் திருப்பி அனுப்ப முடியாத சூழல் ஏற்பட்டால், அது சட்டமாகாது. இதுவே Pocket VETO என்றழைக்கப்படுகிறது.
அடுத்த இரண்டு ஆண்டுகளில் என்ன நடக்கும்?
இன்னும் பாக்கியிருக்கும் டிரம்பின் இரண்டு ஆண்டுகால பதவிக் காலத்தில், அமெரிக்க அரசியலில் கடும் அதிகாரப் போட்டியை இந்த 2026 இடைக்காலத் தேர்தல் முடிவுகள் கொண்டுவந்துள்ளன எனலாம். இதன்மூலம், அடுத்தடுத்து என்னவெல்லாம் நடக்கும் என்பதை இங்கு சுருக்கமாக காணலாம்,
1. சட்ட மசோதாக்களுக்கு முட்டுக்கட்டை: குடியேற்றக் கொள்கை, வரிவிதிப்பு, அரசு செலவினங்கள் உள்ளிட்ட டிரம்ப் அரசின் முக்கியத் திட்டங்களுக்கு ஜனநாயக கட்சியினர் எதிர்ப்பு தெரிவித்து, அவற்றுக்கு முட்டுக்கட்டை போடாம்.
2. அரசு மீதான விசாரணைகள்: பிரதிநிதிகள் சபையின் கட்டுப்பாடு ஜனநாயக கட்சியிடம் வந்துள்ளது. இதனால், டிரம்ப் அரசின் கொள்கை முடிவுகள், நிர்வாக நடவடிக்கைகள் உள்ளிட்டவை தொடர்பாக அவற்றால் விசாரணையை முன்னெடுக்க முடியும்.
3. நியமனங்களுக்கு பிரச்னை: செனட் சபையில் ஜனநாயகக் கட்சிக்கு பெரும்பான்மை இருப்பதால் அமைச்சரவை மற்றும் நீதித்துறை சார்ந்த முக்கிய பதவிகளுக்கான டிரம்ப்பின் நியமனங்களை எதிர்க்க முடியும்.
4. VETO மூலம் அதிகாரப் போட்டி: ஜனநாயகக் கட்சியினர் நிறைவேற்றும் மசோதாக்களை டிரம்ப் நிராகரிக்கலாம். இதனால், இது இரு தரப்புக்கும் பேச்சுவார்த்தை, அரசியல் மோதல்கள் அதிகரிக்க அதிக வாய்ப்புள்ளது.
இதன்மூலம், அமெரிக்க இடைக்காலத் தேர்தலில் ஜனநாயகக் கட்சி பெற்ற வெறப்றி, நாடாளுமன்றத்தின் அதிகாரச் சமநிலையை மாற்றி உள்ளது. இருப்பினும் அதிபராக டிரம்ப் தொட்ரந்து செயல்படுவார். அவரிடம் VETO அதிகாரம் உள்ளிட்ட அரசியலமைப்பு அதிகாரங்கள் நீடிக்கின்றன.
எனவே இரண்டு ஆண்டுகளில் சட்டங்களை நிறைவேற்றவதற்கும், அரசின் கொள்கைகளைச் செயல்படுத்துவதற்கும் வெள்ளை மாளிகைக்கும் நாடாளுமன்றத்திற்கும் இடையே ஒத்துழைப்பும், மோதலும் கலந்த அரசியல் சூழல் உருவாகலாம்.
