Explainer: புகை மண்டலமான டெல்லி, அரசின் அதிரடி ஆக்‌ஷன்!! WFH, கட்டுமானத் தடை... நவம்பரில் புதிய விதிகள்

Delhi Pollution: ஒவ்வொரு ஆண்டும் நாட்டின் தலைநகர் டெல்லியை அச்சுறுத்தும் காற்று மாசுபாடு இந்த ஆண்டும் தலைதூக்கிவிட்டது. டெல்லி புகை மண்டலமாய் காட்சியளிக்கத் தொடங்கிவிட்டது. பனியா, தூசியா என தெரியாத ஒரு வித படலம் டெல்லியை மீண்டும் சூழ்ந்துள்ளது. இந்த நிலையிலிருந்து மக்களை காக்க அரசு துரித நடவடிக்கைகளை எடுத்து வருகிறது.

டெல்லியில் கட்டுமானப் பணிகளுக்கு தடை

டெல்லி-என்.சி.ஆர் (Delhi-NCR) மற்றும் அதனைச் சுற்றியுள்ள பகுதிகளில், தூசியை உருவாக்கும் அனைத்து வெளிப்புறக் கட்டுமான மற்றும் இடிப்புப் பணிகளுக்கும் நவம்பர் 5 முதல் 15 நாட்களுக்கு முழுமையான தடை விதிக்கப்பட்டுள்ளது. அதிகரித்து வரும் காற்று மாசுபாட்டைக் கருத்தில் கொண்டு இந்த முடிவு எடுக்கப்பட்டுள்ளது.

டெல்லியில் ஒவ்வொரு ஆண்டும் நவம்பர் மாதத்தில் காற்று மாசுபாடு மிக அபாயகரமான மற்றும் உச்ச அளவை எட்டுகிறது. இதைக் கவனத்தில் கொண்டு, காற்று தர மேலாண்மை ஆணையம் (CAQM) இந்த முன்னெச்சரிக்கை நடவடிக்கையை மேற்கொண்டுள்ளது.

50% ஊழியர்களுக்கு Work From Home

மேலும், என்.சி.ஆர் பகுதியின் ஐந்து மாவட்டங்களான குருகிராம், ஃபரிதாபாத், சோனிபத், காசியாபாத் மற்றும் கௌதம் புத் நகர் ஆகியவற்றில் உள்ள அரசு மற்றும் தனியார் அலுவலகங்கள், தங்கள் பணியாளர்களில் 50 சதவீதம் பேர் வரை வீட்டிலிருந்தே பணிபுரிய (work from home) அனுமதிக்க வேண்டும் என்று இந்த ஆணையம் உத்தரவிட்டுள்ளது.

அதிக வாகனப் போக்குவரத்து கொண்ட இந்த ஐந்து மாவட்டங்களில், தொழில் நிறுவனங்கள் மற்றும் அத்தியாவசிய சேவைகளுக்கு இந்த உத்தரவிலிருந்து விலக்கு அளிக்கப்பட்டுள்ளது.

கட்டுமானப் பணிகளுக்கு அரசு கட்டுப்பாடுகளை விதித்திருந்தாலும், சில அத்தியாவசியத் திட்டங்களுக்கு முழு விலக்கு அளிக்கப்பட்டுள்ளது; அதே சமயம் பிற கட்டுமானப் பணிகளுக்குத் தடை தொடர்கிறது.

எந்தெந்த பணிகளுக்கு விலக்கு அளிக்கப்பட்டுள்ளது?

• ரயில்வே மற்றும் மெட்ரோ தொடர்பான பணிகள்,
• விமான நிலையங்கள் மற்றும் முக்கிய பேருந்து முனையங்கள் (ISBTs),
• மருத்துவமனைகள் மற்றும் மருத்துவ வசதிகள் தொடர்பான கட்டுமானங்கள்,
• குடிநீர் விநியோகம் மற்றும் சுகாதாரம் தொடர்பான திட்டங்கள்,
• தேசிய பாதுகாப்பு மற்றும் ஆயுதப்படைகள் (பாதுகாப்புத்துறை) தொடர்பான பணிகள்.

எந்தெந்த பணிகளுக்குத் தடை தொடரும்?

• தேசிய நெடுஞ்சாலைகள், பொதுச் சாலைகள் மற்றும் மேம்பாலங்களின் கட்டுமானம்,
• மேல்நிலை பாலங்கள் அமைத்தல்,
• முக்கிய மின் இணைப்பு பணிகள் மற்றும் குழாய்ப் பாதைகளை அமைத்தல்,
• மொபைல் அல்லது இணைய உள்கட்டமைப்பு தொடர்பான திட்டங்கள்

மேலும் படிக்க | வறுமை ஒழிப்பு... இந்தியாவில் ஏழைகளின் எண்ணிக்கை குறைவு.. உலக வங்கி சொல்வது என்ன?

இதற்கிடையில், மத்திய சுற்றுச்சூழல் துறை அமைச்சர் பூபேந்தர் யாதவ், டெல்லியில் உள்ள காற்று தர மேலாண்மை ஆணையத்தின் (CAQM) அலுவலகத்தைப் பார்வையிட்டார். அங்கு, காற்று மாசுபாட்டைக் கண்காணிப்பதற்காக புதிதாக அமைக்கப்பட்ட அதிநவீன கட்டுப்பாட்டு அறையை (Integrated Command and Control Centre) அவர் ஆய்வு செய்தார். அவரது வருகைக்குப் பிறகு, மாசுபாட்டைக் கட்டுப்படுத்தும் நோக்கில் இந்த புதிய அரசு உத்தரவு பிறப்பிக்கப்பட்டது.

நவம்பர் 1 முதல் அமலுக்கு வரும் அரசின் ஆக்‌ஷன் பிளான்

டெல்லி அரசின் ‘குளிர்கால செயல் திட்டம்’ (Winter Action Plan) நவம்பர் 1 முதல் அமலுக்கு வருகிறது. இந்தக் கட்டுப்பாடுகள், டெல்லி அரசின் 10 அம்சங்களைக் கொண்ட ‘குளிர்கால செயல் திட்டத்திற்கு’ கூடுதலாக அமல்படுத்தப்படுகின்றன.

இந்தத் திட்டம் நவம்பர் 1 முதல் பிப்ரவரி 28, 2027 வரை நடைமுறையில் இருக்கும். இதன் கீழ் தூசியை உருவாக்கும் இடிப்புப் பணிகள் மற்றும் வெளிப்புறக் கட்டுமானப் பணிகளைத் தடை செய்யப்படுகின்றன. மேலும், டிசம்பர் 10 முதல் 2027 ஜனவரி 20 வரை அனைத்து வகையான கட்டுமான மற்றும் இடிப்புப் பணிகளும் முழுமையாக நிறுத்தப்படும்.

டெல்லி அரசின் ‘குளிர்கால செயல் திட்டத்தின்’ கீழ், மாசுபாட்டைக் கட்டுப்படுத்த மூன்று முக்கிய நடவடிக்கைகள் அறிமுகப்படுத்தப்பட்டுள்ளன.

• முதலாவதாக, அனைத்து தனியார் அலுவலகங்களும் தங்கள் பணியாளர்களில் 50 சதவீதத்தினரை வீட்டிலிருந்தே பணிபுரிய அனுமதிக்க வேண்டும். 
• இரண்டாவதாக, செல்லுபடியாகும் ‘மாசு கட்டுப்பாட்டுச் சான்றிதழ்’ (PUC) இல்லாத வாகனங்களுக்கும், அனுமதிக்கப்பட்ட பயன்பாட்டுக் காலத்தை முடித்த வாகனங்களுக்கும் பெட்ரோல் நிலையங்களில் எரிபொருள் வழங்கப்படாது. 
• மூன்றாவதாக, டெல்லிக்கு வெளியே இருந்து வரும், ‘BS-VI’ உமிழ்வு தரநிலைகளுக்கு உட்படாத பெட்ரோல் மற்றும் டீசல் வாகனங்கள் நகரத்திற்குள் நுழைவதற்குத் தடை விதிக்கப்படும்.

மேலும் படிக்க | DLC Campaign 5.0: நவம்பர் 1 முதல் ஆயுள் சான்றிதழ் பிரச்சாரம்... ஓய்வூதியதாரர்களுக்கு முக்கிய அப்டேட்

கழிவுகளை எரிப்பதற்கு எதிரான கடுமையான நடவடிக்கைகள்

• குடியிருப்பு நலச் சங்கங்கள் (RWAs), வீட்டுவசதி சங்கங்கள், அரசு மற்றும் தனியார் நிறுவனங்கள், மற்றும் ஒப்பந்ததாரர்கள் தங்கள் வளாகத்திற்குள் கழிவுகள், காய்ந்த இலைகள், உயிரிப் பொருட்கள் (biomass) அல்லது பிளாஸ்டிக் பொருட்கள் எரிக்கப்படாமல் இருப்பதை உறுதி செய்ய வேண்டும் என்று அறிவுறுத்தப்பட்டுள்ளனர். 
• திறந்த வெளியில் பொருட்கள் எரிக்கப்படுவதைத் தவிர்க்க, பணியாளர்களுக்கு வெப்பமூட்டும் வசதிகளை (மின்சாரம் அல்லது அங்கீகரிக்கப்பட்ட தூய்மையான எரிபொருட்களைப் பயன்படுத்தி) ஏற்படுத்திக் கொடுக்கவும் உத்தரவிடப்பட்டுள்ளது. 
• மேலும், இரவு நேரக் கண்காணிப்பை அதிகரிக்கவும், ட்ரோன்களைப் பயன்படுத்தி கண்காணிப்புப் பணிகளை மேற்கொள்ளவும் அறிவுறுத்தல்கள் வழங்கப்பட்டுள்ளன.

வாகன நிறுத்துமிடக் கட்டணம் இருமடங்காக உயர்வு

• சொந்த வாகனங்களின் பயன்பாட்டைக் குறைக்கும் நோக்கில், அங்கீகரிக்கப்பட்ட வாகன நிறுத்துமிடங்களில் வசூலிக்கப்படும் கட்டணம் நவம்பர் 1 முதல் பிப்ரவரி 28 வரை இருமடங்காக உயர்த்தப்படும். 
• டெல்லி மெட்ரோ ரயில் கழகத்தால் (DMRC) இயக்கப்படும் வாகன நிறுத்துமிடங்களுக்கு இந்த கட்டண உயர்விலிருந்து விலக்கு அளிக்கப்பட்டுள்ளது.
• இது தொடர்பாக மாநகராட்சி மற்றும் என்.டி.எம்.சி (NDMC) அமைப்புகளுக்கும் அறிவுறுத்தல்கள் வழங்கப்பட்டுள்ளன.

விதிகளை மீறினால் நடவடிக்கை

அரசாங்கத்தின் உத்தரவுகளை மீறுபவர்கள் மீது, 1986-ஆம் ஆண்டின் சுற்றுச்சூழல் (பாதுகாப்பு) சட்டத்தின் கீழ் நடவடிக்கை எடுக்கப்படும் என்று அரசு தெளிவுபடுத்தியுள்ளது. இதில் வழக்குப்பதிவு செய்தல், சுற்றுச்சூழல் இழப்பீடு வசூலித்தல், மற்றும் சம்பந்தப்பட்ட இடத்திற்கு சீல் வைத்தல் போன்ற நடவடிக்கைகள் அடங்கும்.

மேலும் படிக்க | தண்ணீர் வீணாக்கினால் போலீஸ் கேஸ்? குடிநீரை வீணடித்தால் ரூ. 10000 அபராதம் -புனே மாநகராட்சி