தீபாவளி போனஸ் அறிவிப்பு... 11 லட்சம் ஊழியர்களுக்கு குட் நியூஸ் - அமைச்சரவை ஒப்புதல்

Diwali Bonus 2026: 11 லட்சத்து 40 ஆயிரத்து 770 ரயில்வே ஊழியர்களுக்கு 78 நாட்களுக்கான உற்பத்தித் திறன் சார்ந்த போனஸ் தொகையை வழங்க மத்திய அமைச்சரவை ஒப்புதல் அளித்துள்ளது.

இதற்கு தகுதிவாய்ந்த ஒவ்வொரு ரயில்வே ஊழியருக்கும் 78 நாட்களுக்கு வழங்கப்படக் கூடிய அதிகபட்ச போனஸ் தொகை 17,951 ரூபாய் ஆகும். பிரதமர் மோடி தலைமையிலான அமைச்சரவை ஒப்புதல் அளித்ததை தொடர்ந்து ரூ.2,0009.61 கோடி தொகை மொத்தமாக 11,40,770 ஊழியர்களுக்கு வழங்கப்பட இருக்கிறது.

non-gazetted ரயில்வே ஊழியர்களுக்கு மட்டுமே இந்த போனஸ் வழங்கப்படும். அதாவது, தண்டவாளப் பணியாளர்கள், எஞ்சின் ஓட்டுநர்கள், ரயில் மேலாளர்கள் (Guards), ரயில் நிலையப் பொறுப்பாளர்கள், தொழில்நுட்ப வல்லுநர்கள் மற்றும் அவர்களின் உதவியாளர்கள், நிர்வாகப் பணியாளர்கள், வழிகாட்டிப் பணியாளர்கள், பிற 'C' பிரிவு பணியாளர்கள் ஆகியோருக்கு போனஸ் வழங்கப்படும்.

2025-26 நிதியாண்டில் ரயில்வே துறை மிகச் சிறப்பாக செயலாற்றியது. மொத்தம் 1,670 மில்லியன் டன் சரக்குகளை கொண்டு சென்றிருக்கிறது. 741 கோடி பயணிகளுக்கு சேவையாற்றி உள்ளது.

இந்நிலையில், ரயில்வே ஊழியர்களின் சிறப்பான செயல்பாட்டை அங்கீகரிக்கும் விதமாக இந்த ஆண்டுக்கான ஒப்புதல் வழங்கப்பட்டுள்ளது என அமைச்சரவை தெரிவித்துள்ளது. மேலும் ரயில்வேயின் செயல்திறனை தொடர்ந்து மேம்படுத்துவதற்கு ஊழியர்களை ஊக்கமளிக்கும் வகையில் இந்த போனஸ் வழங்கப்டப்டிருப்பதாக தெரிவிக்கப்பட்டுள்ளது.  

கடந்தாண்டும், 2025 செப்டம்பர் 24ஆம் தேதி அன்று, 78 நாட்கள் போனஸ் ரயில்வே ஊழியர்களுக்கு 10 லட்சத்து 91 ஆயிரத்து 146 ரயில்வே ஊழியர்களுக்கு 1,865.68 கோடி மதிப்பில் போனஸ் மொத்தமாக வழங்கப்பட்டது.

அந்த வகையில், இந்தாண்டு ரூ.143.93 கோடி உயர்ந்துள்ளது, அதாவது 7.7% அளவுக்கு உயர்ந்துள்ளது. 49 ஆயிரத்து 600 ஊழியர்களுக்கு கூடுதலாக வழங்கப்பட்டது, அதாவது 4.5% அளவுக்கு உயர்ந்துள்ளது. ஆனால், அதேநேரத்தில் போனஸ் தொகை உயரவில்லை. கடந்தாண்டும் அதிகபட்ச போனஸ் தொகை 17,951 ரூபாய் தான்.