இந்திய அணி வெற்றி... சொதப்பிய சஞ்சு சாம்சன் - வெறியோடு வெயிட் பண்ணும் சூர்யவன்ஷி

வைபவ் சூர்யவன்ஷிக்கு நோ சான்ஸ்

இந்தியா - ஆப்கானிஸ்தான் அணிகளுக்கு எதிரான முதல் டி20ஐ போட்டி டெல்லி அருண் ஜெட்லி மைதானத்தில் நடைபெற்றது. டாஸ் வென்ற இந்திய அணி கேப்டன் ஷ்ரேயாஸ் ஐயர் பந்துவீச்சை தேர்வு செய்தார். பலரும் எதிர்பார்த்திருந்த வைபவ் சூர்யவன்ஷிக்கு வாய்ப்பு அளிக்கப்படவில்லை. சஞ்சு சாம்சன் ஓபனராக தொடர்ந்தார். (Image Source: X/@BCCI)

ஆப்கானிஸ்தான் அணிக்கு மோசமான தொடக்கம்

முதலில் பேட்டிங் செய்த ஆப்கானிஸ்தான் அணி முதல் 7 ஓவர்களிலேயே 5 விக்கெட்டை இழந்தது. அப்போது வெறும் 43 ரன்களே அடிக்கப்பட்டிருந்தது. அடுத்து அஸ்மத்துல்லா ஓமர்சாய் - முகமது நபி ஆகியோரின் சிறப்பான பார்ட்னர்ஷிப்பில் 56 பந்துகளில் 83 ரன்கள் அடிக்கப்பட்டது. கடைசி நேரத்திலும் சில விக்கெட்டுகள் சரிய 20 ஓவர்களில் ஆப்கானிஸ்தான் அணி 8 விக்கெட் இழப்பிற்கு 156 ரன்களை அடித்தது. முகமது நபி 33(27) ரன்களில் ஆட்டமிழந்தாலும், அஸ்மத்துல்லா ஓமர்சாய் 44 பந்துகளில் 4 பவுண்டரி, 4 சிக்ஸர் என 64 ரன்களை எடுத்து ஆட்டமிழக்காமல் இருந்தார். (Image Source: X/@BCCI)

இந்திய அணியின் மிரட்டல் பந்துவீச்சு

இந்திய அணி பந்துவீச்சில் மிரட்டியது. பவர்பிளேவில் 4 விக்கெட்டை எடுத்து 41 ரன்களையே கொடுத்திருந்தது. பும்ரா முதல் ஓவரிலேயே விக்கெட்டை வீழ்த்தினார். மிடில் ஓவரில் விக்கெட் எடுக்க இந்திய வீரர்கள் திணறினர். 7வது ஓவருக்கு பின் 17வது ஓவரில்தான் விக்கெட் சரிந்தது. தூபே 1 ஓவரை மட்டும் வீசி 21 ரன்களையும், நிதிஷ் குமார் ரெட்டி 2 ஓவர்களை வீசி 30 ரன்களையும் வாரி வழங்கினர். அர்ஷ்தீப் சிங் மிக சிறப்பாக பந்துவீசி 4 ஓவர்களில் 19 ரன்களை மட்டும் கொடுத்து 3 விக்கெட்டை வீழ்த்தினர். ஜஸ்பிரித் பும்ரா, அக்சர் பட்டேல், வருண் சக்ரவர்த்தி ஆகியோர் தலா 1 விக்கெட்டை வீழ்த்தினர். மூவரும் தலா 4 ஓவர்களை வீசினர். அதில் வருண் 17 ரன்களையும் பும்ரா 26 ரன்களையும், அக்சர் பட்டேல் 27 ரன்களையும் கொடுத்தனர். (Image Source: X/@BCCI)

அதிவேகமாக முதல் வெற்றியை ருசித்த இந்திய அணி

157 ரன்கள் என்ற இலக்கை இந்திய அணி ஊதித் தள்ளியது என்றே சொல்ல வேண்டும். 13.4 ஓவர்களிலேயே இலக்கை அடைந்து 7 விக்கெட் வித்தியாசத்தில் வெற்றிபெற்றது. 3 போட்டிகள் கொண்ட தொடரில் 1-0 என்ற கணக்கில் முன்னிலை பெற்றது. அபிஷேக் சர்மா 32 பந்துகளில் 7 பவுண்டரி, 7 சிக்ஸருடன் 82 ரன்களை குவித்தார் (ஸ்ட்ரைக் ரேட் 256.25). அவருடன் இஷான் கிஷனும் அதிரடி காட்டி 33 பந்துகளில் 5 பவுண்டரி, 1 சிக்ஸருடன் 42 ரன்களையும் (ஸ்ட்ரைக் ரேட் 127.27) எடுத்தார். அபிஷேக் சர்மா 11வது ஓவரிலும், இஷான் கிஷன் 13வது ஓவரிலும் முகமது நபி பந்துவீச்சில் ஆட்டமிழந்தனர். அபிஷேக் சர்மாவின் அதிரடியால் பவர்பிளே முடிவிலேயே இந்திய அணி 82 ரன்களை குவித்தது. கடைசியாக ஷ்ரேயாஸ் - திலக் ஜோடி ஆட்டத்தை முடித்துவைத்தது. (Image Source: X/@BCCI)

சஞ்சு சாம்சன் இடத்திற்கு தொடரும் ஆபத்து

சஞ்சு சாம்சன் தொடர்ச்சியாக ஓபனிங்கில் சொதப்பி வருகிறார். வைபவ் சூர்யவன்ஷி வெறியுடன் காத்திருக்கிறார். இங்கிலாந்தில் சூர்யவன்ஷி சொதப்பினாலும் ஜிம்பாப்வேவுக்கு எதிராக சிறப்பாக விளையாடி தொடர் நாயகன் விருதையும் வென்றிருந்தார். தற்போது இந்திய சூழலுக்கும் சூர்யவன்ஷியே அதிக செட்டாவார் என்பதால் வைபவ் சூர்யவன்ஷியால், சஞ்சு சாம்சனுக்கு நெருக்கடி அதிகமாகி உள்ளது. சஞ்சு சாம்சன் 8 பந்துகளில் 2 பவுண்டரிகளுடன் 10 ரன்களை எடுத்து ஓமர்சாய் வீசிய 3வது ஓவரில் ஆட்டமிழந்தார். அடுத்த 2 போட்டிகளில் சஞ்சு சாம்சன் விளையாடலாம். ஒருவேளை தொடர்ந்து சொதப்பினால் ஜப்பானில் ஆசிய விளையாட்டு போட்டித்தொடரில் சூர்யவன்ஷியின் பக்கம் காற்று வீச அதிக வாய்ப்புள்ளது. (Image Source: X)