ரிங்கில் மிரட்டிய இந்தியர்.. சுபாஷ் சந்திரா அறக்கட்டளை மாணவர் அங்குஷ் பங்கால் தங்கம் வென்று அசத்தல்!

ஆசிய விளையாட்டு போட்டிகளில் இந்தியாவுக்கு குத்துச்சண்டையில் மேலும் ஒரு தங்கப் பதக்கம் கிடைத்துள்ளது. ஹரியானாவை சேர்ந்த 21 வயது குத்துச்சண்டை வீரர் அங்குஷ் பங்கால், ஆடவர் 80 கிலோ எடைப்பிரிவில் தங்க பதக்கம் வென்று அசத்தியுள்ளார்.

ஜப்பானில் நடைபெற்று வரும் ஆசிய விளையாட்டு போட்டியின் இறுதி போட்டியில் தென்கொரியாவின் கிம் மின்சியோங்கை எதிர்கொண்ட அங்குஷ் 4-0 என்ற கணக்கில் வெற்றி பெற்று தங்க பதக்கத்தை கைப்பற்றினார்.

ஹரியானா மாநிலம் ஹிசார் பகுதியை சேர்ந்த அங்குஷ் பங்கால், கங்க்வா கிராமத்தில் உள்ள சுபாஷ் சந்திரா அறக்கட்டளையின் குத்துச்சண்டை பயிற்சி மையத்தில் பயிற்சி பெற்றவர். 13 ஆகஸ்ட் 2005 அன்று பிறந்த அவர், இளம் வயதிலேயே தேசிய மற்றும் சர்வதேச போட்டிகளில் தனது திறமையை வெளிப்படுத்தி வருகிறார்.

சர்வதேச அரங்கில் அடுத்தடுத்து சாதனைகள்

அங்குஷின் சர்வதேச பயணம் சமீப ஆண்டுகளில் வேகமாக முன்னேறியுள்ளது. 2025 ஆம் ஆண்டு டெல்லியில் நடைபெற்ற உலக குத்துச்சண்டை கோப்பை இறுதி போட்டியில் 80 கிலோ எடைப்பிரிவில் பங்கேற்ற அவர் வெள்ளி பதக்கம் வென்றார். இறுதி போட்டியில் இங்கிலாந்தின் ஒலடெமிஜி ஷிட்டுவிடம் தோல்வியடைந்தார்.

இதன்பின்னர் 2026 ஆம் ஆண்டு தனது செயல்பாட்டை மேலும் மேம்படுத்திய அங்குஷ், செக் குடியரசின் உஸ்தி நாட் லாபெம் கிராண்ட் பிரிக்ஸ் போட்டியில் 80 கிலோ பிரிவில் தங்கம் வென்றார். அதே ஆண்டில் கிளாஸ்கோவில் நடைபெற்ற காமன்வெல்த் விளையாட்டு போட்டிகளிலும் 80 கிலோ பிரிவில் தங்க பதக்கம் வென்று தனது சர்வதேச சாதனையை தொடர்ந்தார்.

காமன்வெல்த்தில் அங்குஷ் கம்பேக்

காமன்வெல்த் விளையாட்டு போட்டியின் இறுதி போட்டியில் இங்கிலாந்தின் டைமேஜி ஷிட்டுவை அங்குஷ் எதிர்கொண்டார். போட்டியின் முதல் சுற்றில் 0-5 என பிந்தங்கியதால் அவருக்கு சவாலான தொடக்கமாக அமைந்தது. ஆனால் அடுத்தடுத்த சுற்றுகளில் சிறப்பாக செயல்பட்டு போட்டியை தனது கட்டுப்பாட்டுக்குள் கொண்டு வந்தார். இறுதியில் 4-1 என்ற ஸ்பிளிட் டிசிஷன் மூலம் வெற்றி பெற்று காமன்வெல்த் தங்கப் பதக்கத்தை கைப்பற்றினார்.

ஆசிய விளையாட்டில் தொடக்கத்திலிருந்தே ஆதிக்கம்

ஆசிய விளையாட்டுப் போட்டியிலும் அங்குஷ் தனது சிறப்பான ஆட்டத்தை தொடர்ந்து வெளிப்படுத்தினார். காலிறுதியில் தஜிகிஸ்தானின் நெகெர்ஸ் சலிமோவை 5-0 என்ற கணக்கில் வீழ்த்தினார். இதன் மூலம் பதக்கத்தை உறுதி செய்ததுடன், அரையிறுதிக்கும் முன்னேறினார்.

அரையிறுதியில் உஸ்பெகிஸ்தானின் ஃபஸ்லிதீன் எர்கின்போயேவை எதிர்கொண்டார். 75 கிலோ எடைப்பிரிவின் தற்போதைய உலக சாம்பியனான அவருக்கு எதிரான போட்டியில் தொடக்கத்தில் அங்குஷ் சற்று பின்தங்கினார். எனினும், போட்டியின் போக்கை புரிந்துகொண்டு தனது உத்தியை மாற்றிய அங்குஷ், அடுத்தடுத்த சுற்றுகளில் சிறப்பாக செயல்பட்டு 4-1 என்ற கணக்கில் வெற்றி பெற்றார். இதன் மூலம் இறுதிப் போட்டிக்கு தகுதி பெற்றார்.

இந்தியாவுக்கு தங்கம்

இறுதிப் போட்டியில் தென்கொரியாவின் கிம் மின்சியோங்கை எதிர்கொண்ட அங்குஷ், ஆரம்பம் முதலே போட்டியில் தனது ஆதிக்கத்தை நிலைநிறுத்தினார். வேகமான நகர்வுகள், துல்லியமான பஞ்ச்கள் மற்றும் போட்டிக்கு ஏற்ப தனது உத்தியை மாற்றிக்கொள்ளும் திறனை வெளிப்படுத்திய அவர், இறுதியில் 4-0 என்ற கணக்கில் வெற்றி பெற்றார். இதன் மூலம் ஆடவர் 80 கிலோ எடைப்பிரிவில் ஆசிய விளையாட்டுப் போட்டியின் தங்கப் பதக்கத்தை அங்குஷ் பங்கால் வென்றார்.

கங்க்வா கிராமத்தில் உள்ள சுபாஷ் சந்திரா அறக்கட்டளை குத்துச்சண்டை பயிற்சி மையத்தில் இருந்து சர்வதேச அரங்கிற்கு வந்துள்ள அங்குஷின் இந்த வெற்றி, அவரது வளர்ந்து வரும் குத்துச்சண்டை வாழ்க்கையில் முக்கியமான சாதனையாக அமைந்துள்ளது. 21 வயதிலேயே ஆசிய விளையாட்டுப் போட்டியில் தங்கம் வென்றுள்ள அவர், இந்திய குத்துச்சண்டையில் கவனம் பெற்ற இளம் வீரராக உருவெடுத்துள்ளார்.