வெற்றி மடிக்கணினி திட்டம்: கல்லூரி மாணவர்களுக்கு முதல்வர் விஜய் பரிசு, யாருக்கெல்லாம் கிடைக்கும்?

சென்னை: தமிழ்நாடு முதலமைச்சர் சி. ஜோசப் விஜய், மாநிலத்தில் உள்ள கல்லூரி மாணவர்களுக்கு இலவச மடிக்கணினி வழங்கும் திட்டத்தைச் செயல்படுத்த உத்தரவிட்டுள்ளார். 'வெற்றி மடிக்கணினி திட்டம்' (Vetri Laptop Scheme) என்று பெயரிடப்பட்டுள்ள இந்தத் திட்டத்திற்காக, 2026-27 நிதியாண்டுக்கான பட்ஜெட்டில் மாநில அரசு ₹2,000 கோடி நிதி ஒதுக்கியுள்ளது.

இந்தத் திட்டத்தைச் சிறப்பாகச் செயல்படுத்துவதையும், கண்காணிப்பதையும் உறுதி செய்ய, முதலமைச்சர் தலைமையிலான உயர்மட்டக் குழு ஒன்று அமைக்கப்படும் என்று அரசு தெரிவித்துள்ளது. இத்திட்டத்தைச் செயல்படுத்துவதற்கான விரிவான வழிகாட்டுதல்களும் வெளியிடப்பட்டுள்ளன.

மாணாக்கர்களின் முன்னேற்றமே மாநிலத்தின் முன்னேற்றம் என்ற உயர்ந்த நோக்கத்தில், கல்லூரி மாணாக்கர்களின் தொழில்நுட்பத் திறனை மேம்படுத்த ரூ.2,000 கோடி மதிப்பீட்டில் வெற்றி மடிக்கணினித் திட்டத்தைச் செயல்படுத்திட மாண்புமிகு தமிழ்நாடு முதலமைச்சர் திரு.ச.ஜோசப் விஜய் அவர்கள் உத்தரவு. #CMJosephVijay | #TNDIPR | @TVKVijayHQ | @imrajmohan |

— TN DIPR (@TNDIPRNEWS) November 7, 2026

யாருக்கெல்லாம் இலவச மடிக்கணினி கிடைக்கும்?

• அரசு மற்றும் அரசு உதவி பெறும் கல்லூரிகளில் பயிலும் மாணவர்களுக்கு இத்திட்டத்தின் மூலம் பலன் கிடைக்கும். 
• இதில் 2026-27 கல்வி ஆண்டில் இளங்கலை (UG) மற்றும் பட்டயப் படிப்புகளில் (Diploma courses) முதலாம் மற்றும் இரண்டாம் ஆண்டில் பயிலும் மாணவர்கள் அடங்குவர்.
• கலை, அறிவியல், பொறியியல், மருத்துவம், கால்நடை மருத்துவம், வேளாண்மை, மீன்வளம் மற்றும் சட்டம் போன்ற துறைகளில் பயிலும் மாணவர்கள் இத்திட்டத்தின் கீழ் பயன்பெறுவர். 
• மேலும், பாலிடெக்னிக் மற்றும் ஐடிஐ (ITI - தொழிற்பயிற்சி நிலையம்) படிப்புகளில் சேரும் மாணவர்களும் இதற்குத் தகுதியுடையவர்கள் ஆவர்.

மேலும் படிக்க | ”தவெக அரசின் சின்ன புத்தி அரசியல்" - சாடிய உதயநிதி, ஸ்டாலின்!

மூன்றாம் மற்றும் நான்காம் ஆண்டு மாணவர்களுக்கான பலன்கள்

2025-26 கல்வி ஆண்டில் இலவச மடிக்கணினித் திட்டத்தின் பலனைப் பெறாத மாணவர்களையும் இத்திட்டத்தில் சேர்க்க அரசு முடிவு செய்துள்ளது. அரசு அல்லது அரசு உதவி பெறும் கல்வி நிறுவனங்களில் தொழில்முறைப் படிப்புகளில் (Professional courses) தற்போது மூன்றாம் அல்லது நான்காம் ஆண்டில் பயிலும் மாணவர்களுக்கும் மடிக்கணினிகள் வழங்கப்படும்.

பொறியியல் மாணவர்களுக்கு மேம்பட்ட செயலிகள் கொண்ட மடிக்கணினிகள்

பொறியியல் மாணவர்களின் தேவைகளைக் கருத்தில் கொண்டு, அவர்களுக்காகச் சிறப்பு ஏற்பாடுகளை அரசு செய்துள்ளது. இவர்களுக்கு 'இன்டெல் கோர் i5' (Intel Core i5) செயலிகள் (Processors) அல்லது அதற்கு இணையான திறன் கொண்ட செயலிகளைக் கொண்ட மடிக்கணினிகள் வழங்கப்படும்.

மடிக்கணினிகளை கொள்முதல் செய்து விநியோகிக்கும் பொறுப்பு, மாநில அரசு நிறுவனமான 'எல்காட்' (ELCOT) வசம் ஒப்படைக்கப்பட்டுள்ளது. இதற்கான நிர்வாக அனுமதி ஏற்கனவே வழங்கப்பட்டுவிட்டது. நிர்ணயிக்கப்பட்ட தரநிலைகளுக்கு உட்பட்ட மடிக்கணினிகளையே இந்நிறுவனம் கொள்முதல் செய்ய வேண்டும்.

டிஜிட்டல் கல்வி மற்றும் வேலைவாய்ப்பிற்கான ஆதரவு

இன்றைய டிஜிட்டல் யுகத்தில், உயர்கல்வி பயிலும் மாணவர்களுக்கு மடிக்கணினி ஒரு இன்றியமையாத கல்வி கருவியாக மாறியுள்ளது என்று மாநில அரசு குறிப்பிடுகிறது. இது மாணவர்களின் தொழில்நுட்ப அறிவை மேம்படுத்தவும், திறன் மேம்பாட்டுப் பயிற்சிகளைப் பெறவும், இணையவழிக் கல்வியை அணுகவும் பெரிதும் உதவும்.

மேலும் படிக்க | வனவிலங்கு பாதிப்புகளுக்கான இழப்பீட்டுத் தொகையை அதிரடியாக அதிகரித்த தமிழக அரசு