உணவு பார்சல்களில் ஸ்டேப்ளர் பின்களுக்கு அதிரடி தடை: FSSAI அதிரடி உத்தரவு

FSSAI new rules : ஹோட்டல்களில் வாங்கும் சாப்பாடு பார்சல்கள், பேக்கரிகளின் கேக் மற்றும் இனிப்புப் பெட்டிகளில் ஸ்டேப்ளர் பின்கள் மற்றும் உலோகக் கம்பிகளைப் பயன்படுத்துவதற்கு இந்திய உணவுப் பாதுகாப்பு மற்றும் தர நிர்ணய ஆணையம் உடனடித் தடை விதித்து உத்தரவிட்டுள்ளது. உணவுப் பொட்டலங்களைக் கட்டுவதற்கு மிக எளிய மற்றும் செலவு குறைந்த வழியாக ஸ்டேப்ளர் பின்கள் பரவலாகப் பயன்படுத்தப்பட்டு வந்தாலும், அது மனித உயிருக்கே உலைவைக்கும் மிகப்பெரிய ஆபத்தாக மாறுவதால் இந்த நடவடிக்கை எடுக்கப்பட்டுள்ளது.  

தடையின் பின்னணி என்ன?

சமீபகாலமாக பேக்கரி கேக்குகள் மற்றும் கடைகளில் விற்கப்படும் உணவுப் பொட்டலங்களுக்குள் ஸ்டேப்ளர் பின்கள் கலந்திருப்பதாக உணவுப் பாதுகாப்புத் துறைக்குத் தொடர்ந்து புகார்கள் வந்த வண்ணம் இருந்தன. ஒரு சிறிய அலட்சியம் கூட நுகர்வோரின் உயிருக்கு ஆபத்தை விளைவிக்கும் என்பதால், பேக்கிங்கில் பயன்படுத்தப்படும் சிறிய பின்களும் உணவுப் பாதுகாப்பின் வரம்பிற்குள் கொண்டுவரப்பட்டு இந்தத் தடை அறிவிக்கப்பட்டுள்ளது.  

மருத்துவ ரீதியான கடுமையான பாதிப்புகள்

உணவோடு தவறுதலாக ஸ்டேப்ளர் பின்கள் அல்லது உலோகக் கம்பிகள் கலந்து உடலுக்குள் சென்றால் ஏற்படக்கூடிய தீவிர அபாயங்கள் குறித்து மும்பை ஜெனோவா ஷால்பி மருத்துவமனையின் காது, மூக்கு, தொண்டை நிபுணர் எச்சரித்துள்ளார்:  

தொண்டை மற்றும் வாய்க் காயங்கள்: தவறுதலாக விழுங்கப்படும் போது, கூர்மையான பின்கள் வாய் மற்றும் தொண்டைப் பகுதியில் கீறல்களையும் ஆழமான உள் காயங்களையும் உண்டாக்கும்.  

குழந்தைகளுக்கு மூச்சுத்திணறல்: குறிப்பாக சிறு குழந்தைகளுக்கு உணவுடன் இந்த பின் தொண்டையில் மாட்டிக்கொண்டு தீவிர மூச்சுத்திணறலை ஏற்படுத்தும்.  

அவசர அறுவை சிகிச்சை தேவை: உணவு குழாயில் பின் மாட்டிக்கொண்டால் தாங்க முடியாத வலியை ஏற்படுத்துவதோடு, உடனடி மருத்துவ சிகிச்சை அல்லது எண்டோஸ்கோபி தேவைப்படும் சூழலுக்குத் தள்ளும்.  

உயிர் இழக்கும் அபாயம்: அரிதான சில தருணங்களில், இந்த பின் மூச்சுக்குழாய்க்குள் சென்று அடைத்துக்கொண்டால் உயிரிழப்பு ஏற்படும் அபாயமும் உள்ளது.  

டெட்டனஸ் தொற்று: துருப்பிடித்த பின்கள் மற்றும் அவற்றில் உள்ள கிருமிகள் காரணமாக ரணஜன்னி எனப்படும் தீவிர உடல் தொற்று ஏற்படக்கூடும்.  

வணிகர்களுக்கான மாற்று வழிகள் மற்றும் சட்ட நடவடிக்கைகள்

உணவுப் பொருட்களில் விபத்துகளை ஆரம்பத்திலேயே தடுக்கும் வகையில், ஸ்டேப்ளர் பின்களுக்குப் பதிலாகப் பாதுகாப்பான மாற்று முறைகளைப் பின்பற்றுமாறு வணிகர்களுக்கு FSSAI அறிவுறுத்தியுள்ளது. அதாவது, உணவுத் தரம் கொண்ட ஒட்டும் நாடாக்கள், மீண்டும் ஒட்ட முடியாத பாதுகாப்பு சீல்கள், வெப்பம் மூலம் பேக்கிங் செய்யும் முறைகள் ஆகியவற்றை பயன்படுத்தலாம்.  

சட்ட நடவடிக்கை: இந்தத் தடையை மீறித் தொடர்ந்து ஸ்டேப்ளர் பின்களைப் பயன்படுத்தும் உணவு நிறுவனங்கள் மற்றும் கடைகள் மீது உணவுப் பாதுகாப்புச் சட்டத்தின் கீழ் (FSS Act, 2006) கடும் நடவடிக்கைகள் பாயும். கணிசமான அபராதம் விதிக்கப்படுவதோடு, சம்பந்தப்பட்ட கடையின் வணிக உரிமமே ரத்து செய்யப்படும்.  

உணவில் பின் இருந்தால் நுகர்வோர் புகார் அளிப்பது எப்படி?

நீங்கள் வாங்கும் உணவிலோ அல்லது உணவுப் பொட்டலத்திலோ ஸ்டேப்ளர் பின்கள் அல்லது உலோகப் பொருட்கள் இருப்பதை கவனித்தால் உடனடியாகப் பின்வரும் வழிகளில் புகார் அளிக்கலாம்:  

ஆதாரங்களைப் பாதுகாத்தல்: உணவையோ அல்லது அதன் பேக்கிங்கையோ தூக்கி எறியாமல் பத்திரமாக வைத்திருக்க வேண்டும்.  

வீடியோ மற்றும் புகைப்படம்: உணவுப் பொட்டலம் மற்றும் அதில் உள்ள உலோகப் பின்னை தெளிவாகப் படம் அல்லது வீடியோ எடுத்துக் கொள்ளவும்.  

புகார் பதிவு செய்யும் வழிகள்: மத்திய அரசின் 'ஃபுட் சேஃப்டி கனெக்ட்' என்ற அதிகாரப்பூர்வ மொபைல் செயலி வழியாகவோ அல்லது FSSAI-ன் அதிகாரப்பூர்வ இணையதளம் மூலமாகவோ புகார் அளிக்கலாம்.  

இணைக்க வேண்டிய விவரங்கள்: உணவின் பெயர், தயாரிப்பு நிறுவனம் அல்லது கடையின் பெயர், பாக்கெட்டில் உள்ள பேட்ச் எண் (Batch Number), வாங்கிய பில் மற்றும் ஆதாரப் புகைப்படங்களை இணைத்துப் புகார் அளிக்க வேண்டும். இதன் மூலம் புகாரின் தற்போதைய நிலையை இணையவழியிலேயே கண்காணிக்க முடியும்.