வீட்டில் இருந்தே போராட்டம் நடத்தலாம்.. ‘ஜந்தர் மந்தர் சலோ’ வீடியோ கேம் அறிமுகம்!

டெல்லி ஜந்தர் மந்தரில் போராட்டம் நடத்துவதில் ஏற்படும் சவால்களை மையமாக கொண்டு வீட்டில் இருந்தபடியே விளையாடக்கூடிய புதிய வீடியோ கேம் உருவாக்கப்பட்டுள்ளது. போராட்டக்காராகவும், போலீஸ் அதிகாரியாகவும் மாறி விளையாடும் வகையில் வடிவமைக்கப்பட்டுள்ள இந்த கேம் இணையத்தில் கவனம் பெற்று வருகிறது.

இந்த கேம்மை உருவாக்கியது யார்?

உத்தரப் பிரதேச மாநிலம் பரேலியைச் சேர்ந்த 27 வயதான ஐடி ஊழியர் சூரஜ் குஷ்வா, ‘ஜந்தர் மந்தர் சலோ’ (Jantar Mantar Chalo) என்ற இந்த 3D வீடியோ கேமை உருவாக்கியுள்ளார். டெல்லியில் போராட்டங்களுக்கு அழைப்பு விடுக்கப்படுவது தொடர்பான செய்திகளைப் பார்த்து இந்த யோசனை தோன்றியதாக அவர் தெரிவித்துள்ளார்.

‘Bugswriter’ என்ற பெயரில் சமூக வலைதளங்களில் செயல்படும் சூரஜ், கேமின் நிரலாக்கப் பணிகளில் சிலவற்றுக்கு Claude உள்ளிட்ட செயற்கை நுண்ணறிவுக் கருவிகளைப் பயன்படுத்தியுள்ளார். இருப்பினும், கேமின் அடிப்படை யோசனையும் விளையாட்டு வடிவமைப்பும் தன்னுடையது என குறிப்பிட்டுள்ளார்.

இந்த விளையாட்டில் போராட்டக்காரர் அல்லது டெல்லி போலீஸ் என இரண்டு கதாபாத்திரங்களில் ஏதேனும் ஒன்றைத் தேர்வு செய்யலாம்.

போராட்டக்காரராக விளையாடுபவர்கள், மற்றவர்களை தங்கள் அணியில் சேர்த்துக்கொண்டு, போலீஸ் தடுப்புகளை தாண்டி ஜந்தர் மந்தரை அடைந்து தர்ணா போராட்டத்தை தொடர வேண்டும். மெட்ரோ நுழைவாயில்கள் மூடப்படுவது, தடியடி, இணையத் தடைகள், கைது நடவடிக்கைகள் போன்ற சவால்களையும் எதிர்கொள்ள வேண்டும்.

போலீஸ் அதிகாரியாக விளையாடுபவர்கள், போராட்டக்காரர்கள் குறிப்பிட்ட இடத்தை அடைவதை தடுக்க வேண்டும். இதற்காக தடுப்புகளை ஏற்படுத்துவது, தடியடி மற்றும் கண்ணீர்ப்புகையை பயன்படுத்துவது, போராட்டக்காரர்களை கைது செய்வது போன்ற அம்சங்கள் இடம்பெற்றுள்ளன.

மேலும், டெல்லியின் சாலைகளில் காணப்படும் பள்ளங்கள், குப்பைகள், சாலையை மறிக்கும் மாடுகள், தேநீர்க் கடைகள், கோல்கப்பா போன்ற அன்றாட காட்சிகளும் நகைச்சுவை கலந்த முறையில் சேர்க்கப்பட்டுள்ளன. அரசியல் நையாண்டியுடன் உருவாக்கப்பட்டுள்ள இந்த கேம், போராட்ட சூழலை மெய்நிகர் அனுபவமாக மாற்றுகிறது.