தாட்கோ இலவச பயிற்சி! லட்சங்களில் சம்பாதிக்கலாம் - எப்படி விண்ணப்பிப்பது?
தாட்கோ, ICT Academy இணைந்து வழங்கும் இலவச திறன் மேம்பாட்டுப் பயிற்சியில் ஆதிதிராவிடர், பழங்குடியின இளைஞர்கள் விண்ணப்பிக்கலாம் என தமிழ்நாடு அரசு தெரிவித்துள்ளது.
தமிழ்நாடு அரசின் சமூகநீதித் துறையின் கீழ் இயங்கும் தமிழ்நாடு ஆதிதிராவிடர் வீட்டு வசதி மற்றும் மேம்பாட்டுக் கழகம் (தாட்கோ - TAHDCO) மற்றும் ICT Academy ஆகியவை இணைந்து ஆதிதிராவிடர் மற்றும் பழங்குடியின இளைஞர்களுக்கான பிரத்யேக இலவச திறன் மேம்பாட்டுப் பயிற்சித் திட்டத்தை அறிவித்துள்ளன. தற்கால நவீன தொழில்நுட்ப வளர்ச்சிக்கு ஏற்ப தகவல் தொழில்நுட்பம் மற்றும் நிதித் துறைகளில் முன்னணிப் பயிற்சிகளை வழங்கி, அதன் மூலம் தகுதியான இளைஞர்களுக்கு நேரடி வேலைவாய்ப்புகளைப் பெற்றுத் தருவதை இத்திட்டம் நோக்கமாகக் கொண்டுள்ளது.
பயிற்சி அளிக்கப்படும் முக்கியப் பிரிவுகளும் மாவட்டங்களும்:
இப்பயிற்சிகள் சென்னை, கோயம்புத்தூர் மற்றும் மதுரை ஆகிய மூன்று முக்கிய நகரங்களில் வழங்கப்பட உள்ளன. ஒவ்வொரு மாவட்டத்திலும் பின்வரும் பிரிவுகளில் பயிற்சிகள் நடைபெறவுள்ளன:
சென்னை: மென்பொருள் வடிவமைப்பாளர் (Software Designer), வலைதள வடிவமைப்பாளர் (Web Designer) மற்றும் பயன்பாட்டு மென்பொருள் மேம்பாட்டாளர் (App Developer).
கோயம்புத்தூர்: மென்பொருள், வலைதள வடிவமைப்பாளர் (Software & Web Designer), பயன்பாட்டு மென்பொருள் மேம்பாட்டாளர் (App Developer), தரவுப் பகுப்பாய்வாளர் (Data Analyst), நுண்நிதி நிர்வாகம் (Microfinance) மற்றும் காப்பீட்டு முகவர் (Insurance Agent).
மதுரை: தரவுப் பகுப்பாய்வாளர் (Data Analyst), மென்பொருள் வடிவமைப்பாளர் (Software Designer), நுண்நிதி நிர்வாகம் (Microfinance) மற்றும் காப்பீட்டு முகவர் (Insurance Agent).
விண்ணப்பிப்பதற்கான தகுதி வரம்புகள்:
இப்பயிற்சியில் இணைந்து பயன்பெற ஆர்வமுள்ள விண்ணப்பதாரர்கள் பின்வரும் தகுதிகளைப் பூர்த்தி செய்திருக்க வேண்டும்:
கல்வித்தகுதி: மென்பொருள் சார்ந்த (சாப்ட்வேர்) பயிற்சிகளுக்கு: பிஇ / பிடெக் (BE / B.Tech) அல்லது பி.எஸ்சி கணிப்பொறி அறிவியல் (B.Sc Computer Science) முடித்திருக்க வேண்டும்.
நிதி சார்ந்த பயிற்சிகளுக்கு: பி.காம் (B.Com) அல்லது பிபிஏ (BBA) பட்டம் பெற்றிருக்க வேண்டும்.
சமூகப் பிரிவு: ஆதிதிராவிடர் (SC) மற்றும் பழங்குடியினர் (ST) பிரிவைச் சேர்ந்தவராக இருத்தல் வேண்டும்.
வயது வரம்பு: விண்ணப்பதாரர்கள் 18 வயது முதல் 35 வயதிற்குள் இருக்க வேண்டும்.
வருமான வரம்பு: விண்ணப்பதாரரின் குடும்ப ஆண்டு வருமானம் ₹3.00 லட்சத்திற்குள் இருக்க வேண்டும்.
முக்கிய நன்மைகள்: அரசு அங்கீகாரம்: பயிற்சியை வெற்றிகரமாக நிறைவு செய்யும் அனைத்துப் பயனாளிகளுக்கும் தமிழ்நாடு அரசின் அதிகாரப்பூர்வ அங்கீகாரம் பெற்ற சான்றிதழ் வழங்கப்படும்.
வேலைவாய்ப்பு உதவி: தகுதியான நபர்களுக்குப் பயிற்சி நிறுவனத்தின் வாயிலாக முன்னணி நிறுவனங்களில் வேலைவாய்ப்பு பெற்றுத் தர முழு உதவிகளும் முன்னெடுக்கப்படும்.
மேலும் படிக்க | பருப்பு கொள்முதல் விலையை குறைத்ததா தவெக அரசு? திமுக சுடச்சுட பதிலடி
விண்ணப்பிக்கும் முறை: இப்பயிற்சிக்கு விண்ணப்பிக்க விரும்பும் தகுதியான இளைஞர்கள் தாட்கோவின் அதிகாரப்பூர்வ இணையதளப் பக்கமான https://iei.tahdco.com/skilfutr_reg.php வாயிலாக ஆன்லைனில் பதிவு செய்துகொள்ளலாம். மேலும், அறிவிப்பில் கொடுக்கப்பட்டுள்ள QR குறியீட்டை ஸ்கேன் செய்தும் தங்களின் விண்ணப்பங்களை உடனடியாகச் சமர்ப்பிக்கலாம்.
