தீபாவளி கொண்டாட்டத்தில் விபரீதம்.. 1,387 பேர் மருத்துவமனையில் அனுமதி; குழந்தை பலி!

தமிழகம் முழுவதும் தீபாவளி பண்டிகை உற்சாகமாக கொண்டாடப்பட்டு வரும் நிலையில், பட்டாசு வெடிப்பு உள்ளிட்ட விபத்துகள் மக்களின் மகிழ்ச்சிக்கு இடையூறாக அமைந்துள்ளன. கடந்த 24 மணி நேரத்தில் மாநிலம் முழுவதும் பல்வேறு விபத்துகளில் காயமடைந்த 1,387 பேர் மருத்துவமனைகளில் அனுமதிக்கப்பட்டுள்ளனர். இதில் 15 வயதுக்குட்பட்ட குழந்தை ஒன்று உயிரிழந்துள்ளதாக அவசரகால மேலாண்மை சேவை தரவுகள் தெரிவிக்கின்றன.

தீபாவளி விபத்தில் குழந்தை உயிரிழப்பு

தீபாவளி பண்டிகையின்போது பட்டாசுகளை பாதுகாப்பாக வெடிக்க வேண்டும் என அரசு பல்வேறு அறிவுறுத்தல்களை வழங்கி வருகிறது. இருப்பினும், கவனக்குறைவு மற்றும் எதிர்பாராத சம்பவங்களால் பட்டாசு விபத்துகள் ஏற்பட்டு வருகின்றன. இந்த நிலையில், தமிழகத்தில் 15 வயதுக்கு உட்பட்ட குழந்தை ஒன்று உயிரிழந்துள்ளதாக வெளியாகியுள்ள தகவல் அதிர்ச்சியை ஏற்படுத்தியுள்ளது.

எந்த விபத்தில் எத்தனை பேர் பாதிப்பு?

கடந்த 24 மணி நேரத்தில் தமிழகத்தில் பட்டாசு உள்ளிட்ட தீக்காயங்களால் பாதிக்கப்பட்டு 110 பேர் மருத்துவமனைகளில் அனுமதிக்கப்பட்டுள்ளனர். சாலை விபத்துகளில் காயமடைந்த 956 பேர் சிகிச்சைக்காக மருத்துவமனைகளில் சேர்க்கப்பட்டுள்ளனர். இதேபோல், சிறிய காயங்கள் மற்றும் மோதல் சம்பவங்களில் பாதிக்கப்பட்ட 321 பேரும் மருத்துவமனைகளில் அனுமதிக்கப்பட்டுள்ளனர். இதன் மூலம், மாநிலம் முழுவதும் மொத்தம் 1,387 பேர் மருத்துவமனைகளில் சிகிச்சை பெற்று வருகின்றனர். இவர்களில் 15 வயதுக்குட்பட்ட குழந்தைகள் 65 பேர் எனத் தரவுகள் தெரிவிக்கின்றன.

அரசு மருத்துவமனைகளில் சிகிச்சை

விபத்துகளில் காயமடைந்தவர்கள் தஞ்சாவூர், மதுரை, செங்கல்பட்டு உள்ளிட்ட மாவட்டங்களில் உள்ள அரசு மருத்துவக் கல்லூரி மருத்துவமனைகளிலும், பெரியார் நகர் மற்றும் தூத்துக்குடி அரசு மருத்துவமனைகளிலும் சிகிச்சை பெற்று வருகின்றனர்.

தீபாவளி கொண்டாட்டத்தின் போது பட்டாசு விபத்துகள் மட்டுமின்றி சாலை விபத்துகள் மற்றும் மோதல் சம்பவங்களும் அதிகளவில் பதிவாகியுள்ளன. கடந்த 24 மணி நேரத்தில் 1,387 பேர் மருத்துவமனைகளில் அனுமதிக்கப்பட்டுள்ளதுடன், ஒரு குழந்தை உயிரிழந்துள்ள சம்பவம் கவலையை ஏற்படுத்தியுள்ளது.

பண்டிகைக் காலத்தில் குழந்தைகள் பட்டாசு வெடிக்கும்போது பெற்றோர்கள் அருகில் இருந்து கண்காணிப்பது அவசியம். பாதுகாப்பு விதிகளை பின்பற்றி, கவனத்துடன் பட்டாசுகளை வெடிப்பதன் மூலம் விபத்துகளை தவிர்க்க முடியும். தீபாவளி மகிழ்ச்சியான கொண்டாட்டமாக அமைய, அனைவரும் பாதுகாப்புக்கு முக்கியத்துவம் அளிக்க வேண்டும்.