பெண் குழந்தைகளுக்கு ரூ.50 ஆயிரம் கொடுக்கும் தமிழ்நாடு அரசு! விண்ணப்பிப்பது எப்படி?

Chief Minister Girl Child Protection Scheme : தமிழ்நாடு அரசு பெண் குழந்தைகளின் பாதுகாப்பை உறுதி செய்யும் வகையிலும், பெண் சிசுக் கொலையை தடுக்ககவும் ‘முதலமைச்சரின் பெண் குழந்தைகள் பாதுகாப்பு திட்டம்’ என்ற பெயரில் நிதியுதவி திட்டத்தை செயல்படுத்தி வருகிறது. இத்திட்டம் ஒரு வைப்புத் தொகை திட்டமாகும். புதிதாக பெண் குழந்தைகள் பிறந்தால், இத்திட்டத்தின் கீழ் நிதியுதவி பெற பெற்றோர் விண்ணப்பிக்க வேண்டும். ஒரு பெண் குழந்தை என்றால் ரூ.50 ஆயிரமும், இரண்டு பெண் குழந்தைகள் என்றால் தலா 25 ஆயிரம் ரூபாயும், மூன்று பெண் குழந்தைகள் என்றால் தலா 25 ஆயிரமும் அரசு டெபாசிட் செய்யும்.

முதலமைச்சரின் பெண் குழந்தை பாதுகாப்பு திட்டத்தின் விதிமுறைகள்

புதிதாக பிறக்கும் பெண் குழந்தையின் பெயரில் இந்த தொகையானது தமிழ்நாடு மின் விசை நிதி நிறுவனத்தில் வைப்புத் தொகையாக சேமித்து வைக்கப்படும். அவ்வாறு சேமித்து வைக்கப்பட்ட நிதியின் முதிர்வு தொகையை பெற்றுக் கொள்ள சார்ந்த பெண் குழந்தை 18 வயது பூர்த்தி செய்திருக்க வேண்டும். மேலும் பத்தாம் வகுப்பு பொதுத் தேர்வு எழுதி மதிப்பெண் சான்றிதழ் பெற்றிருக்க வேண்டும்.

இந்த விதிமுறை மிக மிக முக்கியமானது. குழந்தை பிறந்ததும் சிசுக் கொலையை தடுக்க அவர்களின் பெயரில் 50 ஆயிரம் ரூபாய் வரவு வைக்கும் தமிழ்நாடு அரசு, அக்குழந்தையின் கல்வியை உறுதி செய்யும் பொருட்டு 10 ஆம் வகுப்பு வரை கட்டாயம் படித்திருந்தால் மட்டுமே இந்த முதிர்வுத் தொகையை பெற முடியும் என்ற விதிமுறையையும் இத்திட்டத்தில் வைத்துள்ளது.

யாரெல்லாம் விண்ணப்பிக்கலாம்? விண்ணப்பிக்க தேவையான ஆவணங்கள்

இத்திட்டத்தில் விண்ணப்பிக்க வருமான சான்று (ரூ.1,20,000க்குள்), பயனாளியின் சாதி சான்று, வயது சான்று (பிறப்பு சான்று அல்லது பள்ளிக் கல்வி சான்று), பயனாளியின் இருப்பிடச் சான்று, குடும்ப கட்டுப்பாடு அறுவை சிகிச்சை சான்று (40 வயதிற்குள் குடும்ப கட்டுப்பாடு அறுவை சிகிச்சை மேற்கொண்டு இருக்க வேண்டும், ஆண் குழந்தை இல்லை என்பதற்கான சான்று, குடும்பத்தில் ஒரே ஒரு பெண் குழந்தை இருந்தால் அந்த பெண் குழந்தைக்கு 3 வயது முடிவதற்குள் விண்ணப்பிக்க வேண்டும். இரண்டு பெண் குழந்தைகள் இருந்தால் இரண்டாவது பெண் குழந்தைக்கு 3 வயது முடிவதற்குள் விண்ணப்பிக்க வேண்டும், ஆதார் அட்டை, குடும்ப புகைப்படம் ஆகிய சான்றுகள் அவசியம்.

விண்ணப்பிக்கும் முறை:

தகுதியும் விருப்பமும் உள்ள பெற்றோர், மேலே குறிப்பிடப்பட்டுள்ள அனைத்து ஆவணங்களின் அசல்கள் மற்றும் நகல்களுடன் உங்கள் பகுதிக்கு அருகில் உள்ள அரசு இ-சேவை மையத்திற்குச் சென்று உடனடியாக ஆன்லைன் வழியாக விண்ணப்பிக்கலாம்.