2014இல் பும்ராவை ஆர்சிபி அணி தவறவிட்ட கதை... பார்த்தீவ் பட்டேல் சொன்னது!

முன்னாள் இந்திய அணி பேட்டரான பார்த்தீவ் பட்டேல், ஆர்சிபி அணி ஜஸ்பிரித் பும்ராவை எடுக்கும் வாய்ப்பை தவறவிட்ட கதையை பகிர்ந்துகொண்டுள்ளார். 2014ஆம் ஆண்டில் ஜஸ்பிரித் பும்ராவை எடுக்கும்படி பார்த்தீவ் பட்டேல் அறிவுறுத்தியும், அதை ஆர்சிபி தவறவிட்டதாக  தெரிகிறது.

2014 மெகா ஏலத்தின் நடுவே, ஆர்சிபி அணி பார்த்தீவ் பட்டேலை எடுத்தது. ஆர்சிபி அவரை எடுத்த பின்னர், பும்ராவையும் எடுக்கும்படி அட்வைஸ் கொடுத்துள்ளார். ஆனால் அவரை ஆர்சிபி எடுக்கவில்லை. பார்த்தீவ் பட்டேல் மற்றும் பும்ரா இருவரும் உள்நாட்டு தொடர்களில் குஜராத் அணிக்காக விளையாடி வந்தது குறிப்பிடத்தக்கது.

மேலும் படிக்க | NZ ஒருநாள் தொடர்: 2 இந்திய அணிகள்.. புவி, ஷமிக்கு வாய்ப்பு? முழு விவரம்

2013இல் அறிமுகமான பும்ரா

2013ஆம் ஆண்டிலேயே மும்பை இந்தியன்ஸ் அணி ஜஸ்பிரித் பும்ராவை அறிமுகப்படுத்திவிட்டது. அந்த தொடரில்தான் ஆர்சிபியின் விராட் கோலியின் விக்கெட்டை ஜஸ்பிரித் பும்ரா எடுத்திருந்தார். ஐபிஎல் தொடரில் அந்த விராட் கோலி விக்கெட்தான், பும்ராவின் முதல் விக்கெட் ஆகும்.

அப்படியிருக்க, 2014 மெகா ஏலத்தை முன்னிட்டு மும்பை இந்தியன்ஸ் அணி அவரை தக்கவைக்கவில்லை, ஏலத்தில் விடுவித்தது. பின்னர் 2014 மெகா ஏலத்தில் மும்பை இந்தியன்ஸ் அணிக்கும், ராஜஸ்தான் ராயல்ஸ் அணிக்கும் பெரும் போர் நடைபெற்றது. இறுதியில் ரூ.1.40 கோடிக்கு மும்பை அணி பும்ராவை எடுத்தது.

மும்பையின் ஸ்டார் வீரராக மாறிய பும்ரா

பும்ரா ஐபிஎல் மற்றும் சாம்பின்ஸ் லீக் தொடர்களில் 161 இன்னிங்ஸில் 190 விக்கெட்டை வீழ்த்தியிருக்கிறார். பும்ரா அணிக்குள் வந்த பின்னர் 4 கோப்பைகளை மும்பை இந்தியன்ஸ் வென்றுவிட்டது. ஆனால் ஆர்சிபி அணி 2025, 2026 சீசன்களில்தான் கோப்பைகளை வென்றிருக்கிறது. பார்த்தீவ் பட்டேல் மும்பை அணியில் Scouting-ல் பணியாற்றியிருக்கிறார்.

மேலும் படிக்க | IND அணியில் புவனேஷ்வர் குமார் ரீ-என்ட்ரி.. முகமது ஷமிக்கு வாய்ப்பு கிடைக்குமா? Explainer

பும்ரா என்ன செய்துவிடுவார்...?

தொலைக்காட்சி நேரலையின் போது பார்த்தீவ் பட்டேல், "2014 மெகா ஏலத்தில் முதல் நாளன்று மதிய உணவு நேரத்தில் நான் தேர்வு செய்யப்பட்டேன். அவர்களிடம் எனக்கு மெசேஜ் வந்தபோது, 'இங்கே ஒரு வீரர் இருக்கிறார், அவரையும் கவனியுங்கள்' என்று அவரிடம் சொன்னேன்.

ஒருவேளை நான் அவர்களிடம் சொன்ன விதம் சரியாக இருக்கவில்லை என நினைக்கிறேன். ஏனென்றால், 'பும்ரா போன்ற வீரர்கள் என்ன செய்துவிடுவார்கள்?' என்பது போன்ற ஒரு பதில் அவர்களிடம் இருந்து வந்தது" என்றார்.

மேலும், நேரலையில் இந்த கதையை சொல்ல, அதன் வீடியோ சமூக வலைதலங்களில் வைரலானது குறித்தும் பேசிய பார்த்தீவ் பட்டேல், "நான் அதை அப்படிச் சொல்லியிருக்கக் கூடாது. அந்த நிலையில் அவரை வாங்குவது மதிப்புக்குரியதாக இருக்கும் என்று அவர்கள் நினைக்கவில்லை. அது பரவாயில்லை.

உண்மை கசக்கும்...

ஆனால் அது மிகவும் வைரலாகிவிட்டது. அதனால் X தளத்தில், 'வேப்ப இலைகளும் உண்மையும் எப்போதும் கசப்பானவை' என்று எழுதினேன். மக்கள் அதை தங்களுக்கு தோன்றியபடி எடுத்துக்கொண்டார்கள்" என்றார். அதாவது தான் சொல்லியது ஆர்சிபி நிர்வாகத்திற்கு புரியவில்லையே தவிர, அவர்கள் பும்ராவை குறைத்து மதிப்பிடவில்லை என பார்த்தீவ் பட்டேல் விளக்கி உள்ளார், ஆனால் மக்கள் அதை தவறாக புரிந்துகொண்டதாகவும் தெரிவித்திருக்கிறார்.

மேலும் படிக்க | விக்கெட் கீப்பராகும் ஜெய்ஸ்வால்... இந்திய அணியில் இது ஏன் ரொம்ப முக்கியம்?