Tamil Nadu Government Updates : தமிழ்நாட்டில் உள்ள திருக்கோயில்களில் பணிபுரிந்து வரும் பணியாளர்களின் பணிநலன், குடும்ப நலன் மற்றும் சமூகப் பாதுகாப்பைக் கருத்தில் கொண்டு, அவர்களுக்கு அரசு ஊழியர்களுக்கு இணையான பல்வேறு முக்கிய சலுகைகளை வழங்கி தமிழ்நாடு அரசு ஆணை பிறப்பித்துள்ளது. குறிப்பாக, ஓய்வு பெறும்போது ஈட்டிய விடுப்பை ஒப்படைத்து பணப்பலன் பெறுவதற்கான உச்சவரம்பு நாட்களை உயர்த்தியும், பெண் பணியாளர்களுக்கான மகப்பேறு விடுப்புக் காலத்தை நீட்டித்தும் வெளியிடப்பட்ட அறிவிப்புகள் தற்போது அதிகாரப்பூர்வமாகச் செயல்படுத்தப்பட்டுள்ளன.
மானியக் கோரிக்கையில் வெளியான முக்கிய அறிவிப்புகள்:
தமிழ்நாடு முதலமைச்சர் அவர்களின் வழிகாட்டுதலின்படி, 2026-27 ஆம் ஆண்டிற்கான இந்து சமய அறநிலையத்துறையின் மானியக் கோரிக்கையின் போது சட்டப் பேரவையில் பல்வேறு புதிய திட்டங்களும் அறிவிப்புகளும் வெளியிடப்பட்டன. அறநிலையத்துறை அமைச்சர் ரமேஷ் அவர்களால் திருக்கோயில்களில் திருப்பணிகள் மேற்கொள்வது, ஆயிரம் ஆண்டுகள் பழமையான திருக்கோயில்களைப் புதுப்பிப்பது, சிதலமடைந்த கோயில்களைப் பழமை மாறாமல் சீரமைப்பது, திருத்தேர்கள் மற்றும் திருக்குளங்களைச் சீரமைத்தல், பக்தர்களுக்கான அடிப்படை வசதிகள், கல்வி நிறுவனங்களை மேம்படுத்துதல், அன்னதானத் திட்ட விரிவாக்கம் மற்றும் பணியாளர் நலன் சார்ந்த பல்வேறு அறிவிப்புகள் சட்டப்பேரவையில் வெளியிடப்பட்டன.
ஈட்டிய விடுப்பு உச்சவரம்பு 240 நாட்களாக உயர்வு:
சட்டப்பேரவை அறிவிப்புகளில் ஒன்றாக, திருக்கோயில் பணியாளர்கள் ஓய்வு பெறும்போது தங்களது ஈட்டிய விடுப்பை ஒப்படைத்து அதற்கான பணப்பலனைப் பெறுவதற்கான உச்சவரம்பு நாள் 210 நாட்களாக இருந்து வந்தது. தற்போது பணியாளர்களின் நலனைக் கருத்தில் கொண்டு, அரசு ஊழியர்களுக்கு இணையாக இந்த உச்சவரம்பு 210 நாட்களிலிருந்து 240 நாட்களாக உயர்த்தப்படும் என அறிவிப்பு எண் 79ல் தெரிவிக்கப்பட்டிருந்தது.
பெண் பணியாளர்களுக்கு 12 மாதங்கள் மகப்பேறு விடுப்பு:
அதேபோன்று, திருக்கோயில்களில் பணிபுரியும் பெண் பணியாளர்களின் குடும்ப நலன் மற்றும் ஆரோக்கியத்தைப் பாதுகாக்கும் வகையில் மற்றுமொரு முக்கிய அறிவிப்பு வெளியிடப்பட்டது. அதன்படி, பெண் பணியாளர்களுக்கு தற்போது வழங்கப்பட்டு வரும் மகப்பேறு விடுப்பு (Maternity Leave) 9 மாதங்களிலிருந்து 12 மாதங்களாக உயர்த்தப்படும் என்று அறிவிப்பு எண் 80ல் குறிப்பிடப்பட்டிருந்தது.
விதிகளில் திருத்தம் மற்றும் அரசாணை நடைமுறை:
திருக்கோயில் பணியாளர்களின் நலன் சார்ந்த இந்த இரண்டு அறிவிப்புகளையும் உடனடியாகச் செயல்படுத்தும் வகையில், 'இந்து சமய நிறுவனங்களின் பணியாளர் (பணி நிபந்தனைகள்) விதிகள் 2020'-ல் உரிய திருத்தங்கள் மேற்கொள்ளப்பட்டு தற்போது அரசாணை வெளியிடப்பட்டுள்ளது.
இதன் மூலம், ஓய்வு பெறும் கோயில் பணியாளர்கள், தங்களது ஈட்டிய விடுப்பை அரசு ஊழியர்களுக்கு இணையாக அதிகபட்சமாக 240 நாட்கள் வரை ஒப்படைத்து, அதற்கான முழு பணப்பலனையும் எளிதாகப் பெற்றுக் கொள்ளும் வாய்ப்பு நடைமுறைக்கு வந்துள்ளது. திருக்கோயில்களில் பணிபுரியும் அனைத்துப் பெண் பணியாளர்களும் அரசு ஊழியர்களுக்கு இணையாக முழுமையாக 12 மாத கால மகப்பேறு விடுப்பினைப் பெற்று பயனடைவதற்குத் தெளிவான வழிவகை செய்யப்பட்டுள்ளது.
பணியாளர்கள் பெரும் மகிழ்ச்சி:
திருக்கோயில் ஊழியர்களின் நீண்ட நாள் கோரிக்கைகளான ஈட்டிய விடுப்பு ஒப்படைப்பு பணப்பலன் உயர்வு மற்றும் மகப்பேறு விடுப்பு நீட்டிப்பு ஆகியவை தற்போது சட்டப்பூர்வமாக அமல்படுத்தப்பட்டிருப்பது, அவர்களின் பணிப் பாதுகாப்பிலும் குடும்பப் பொருளாதாரத்திலும் பெரும் முன்னேற்றத்தை ஏற்படுத்தும். அரசின் இந்த அதிரடி உத்தரவு காரணமாக மாநிலம் முழுவதும் உள்ள திருக்கோயில் பணியாளர்களும் பெண் ஊழியர்களும் மிகுந்த மகிழ்ச்சியடைந்துள்ளனர்.
 "இந்துசமய அறநிலையத்துறை பெண் ஊழியர்களுக்கும் 12 மாத கால மகப்பேறு விடுப்பு")
)