SOCIAL MEDIA

Newsletter

PARTNER SITES
Select Language Select State

மீனவ பெண்களுக்கு 60% வரை மானியம் + வட்டியில்லா கடன் - தமிழ்நாடு அரசு முக்கிய அறிவிப்பு

Tamil Nadu government scheme : ஆழ்கடல் மீன்பிடிப் படகுகளுக்கு 60% வரை மானியம் மற்றும் வட்டியில்லா கடன் வழங்குவது தொடர்பான அரசாணையை தமிழ்நாடு அரசு வெளியிட்டுள்ளது.

Written By Karthikeyan Sekar
Published: Nov 16, 2026, 15:15 IST | Updated: Nov 16, 2026, 15:25 IST
Image Credit: Tamil Nadu women fishers scheme
Join

Tamil Nadu government scheme : தமிழகப் பாரம்பரிய மீனவர்களின் வாழ்வாதாரத்தை மேம்படுத்தும் வகையிலும், அவர்கள் ஆழ்கடல் மீன்பிடித் தொழிலில் நவீன வசதிகளுடன் ஈடுபடுவதை ஊக்குவிக்கும் வகையிலும் தமிழக அரசு முக்கிய அரசாணை ஒன்றை வெளியிட்டுள்ளது. 2026-27 ஆம் ஆண்டிற்கான சட்டப்பேரவை பட்ஜெட் கூட்டத்தொடரில், 05.08.2026 அன்று நிதி, திட்டமிடல் மற்றும் மேம்பாட்டுத் துறை அமைச்சர் வெளியிட்ட அறிவிப்பைச் செயல்படுத்தும் விதமாக, கால்நடை பராமரிப்பு, பால்வளம், மீன்வளம் மற்றும் மீனவர் நலத்துறை சார்பில் இந்த அரசாணை பிறப்பிக்கப்பட்டுள்ளது.  

மேலும் படிக்க | 12 ஆம் வகுப்பு மதிப்பெண் சான்றிதழ் திருத்தம்! தமிழ்நாடு அரசின் புதிய அப்டேட்

திட்டத்தின் சிறப்பம்சங்கள் மற்றும் படகுகளின் எண்ணிக்கை

பிரதான் மந்திரி மத்ஸ்ய சம்பதா யோஜனா திட்டத்தின் கீழ், நவீன பதப்படுத்தும் வசதிகள் கொண்ட 25 ஆழ்கடல் மீன்பிடிப் படகுகளைப் பாரம்பரிய மீனவர்கள் வாங்குவதற்கு நிர்வாக அனுமதி வழங்கப்பட்டுள்ளது. இதில் 20 படகுகள் பொதுப் பிரிவு மீனவர்களுக்கும், 5 படகுகள் பெண் மீனவர்களுக்கும் ஒதுக்கீடு செய்யப்பட்டுள்ளன. இதற்கான மொத்த மானியத் திட்டச் செலவாக ரூ.13.464 கோடி (2% நிர்வாகச் செலவு உட்பட) நிர்ணயிக்கப்பட்டுள்ளது. இதில் மத்திய அரசின் பங்காக ரூ.8.0784 கோடியும், மாநில அரசின் பங்காக ரூ.5.3856 கோடியும் வழங்கப்படும்.  

மானிய விவரங்கள் மற்றும் கடன் கட்டமைப்பு

இந்தத் திட்டத்தின் கீழ் வாங்கப்படும் ஒரு ஆழ்கடல் மீன்பிடிப் படகின் அலகு விலை ரூ.1.20 கோடியாக (ரூ.120 லட்சம்) நிர்ணயிக்கப்பட்டுள்ளது. இதில் பொதுப் பிரிவு மீனவர்களுக்கு 40 சதவீத மானியமாக மொத்தம் ரூ.48 லட்சம் வழங்கப்படுகிறது. இதில் மத்திய அரசின் பங்கு ரூ.28.80 லட்சமாகவும், மாநில அரசின் பங்கு ரூ.19.20 லட்சமாகவும் இருக்கும். மீதமுள்ள தொகையில் பயனாளியின் பங்காக 10 சதவீதம் அதாவது ரூ.12 லட்சமும், வங்கிக் கடனாக ரூ.60 லட்சமும் பெற வழிவகை செய்யப்பட்டுள்ளது.  

பெண் மீனவர்களை ஊக்குவிக்கும் விதமாக அவர்களுக்கு 60 சதவீத மானியமாக மொத்தம் ரூ.72 லட்சம் வழங்கப்படுகிறது. இதில் மத்திய அரசு ரூ.43.20 லட்சமும், மாநில அரசு ரூ.28.80 லட்சமும் மானியமாக வழங்குகின்றன. பெண் பயனாளிகளும் தங்களது பங்களிப்பாக ரூ.12 லட்சம் செலுத்த வேண்டும், மீதமுள்ள ரூ.36 லட்சத்தை மட்டுமே வங்கிக் கடனாகப் பெற வேண்டியிருக்கும்.  

வங்கி கடனுக்கான வட்டியை முழுமையாக ஏற்கும் தமிழக அரசு

இந்தத் திட்டத்தின் மிக முக்கியமான சிறப்பம்சமாக, படகு வாங்குவதற்காக மீனவர்கள் பெறும் வங்கிக் கடனுக்கான வட்டியை மாநில அரசே முழுமையாகத் திரும்பச் செலுத்தும் வகையில் நிதி ஒதுக்கீடு செய்யப்பட்டுள்ளது. குறு, சிறு மற்றும் நடுத்தரத் தொழில் நிறுவனங்கள் துறையின் (MSME) 'நீட்ஸ்' (NEEDS) திட்டத்தின் மாதிரியைப் பின்பற்றி, வட்டி மானியத் தொகையானது பயனாளிகளின் கடன் கணக்கிற்கு நேரடியாக வங்கிகளுக்கே அரசால் செலுத்தப்படும். இதற்காக 5 ஆண்டுகளுக்கு அதிகபட்சமாக ரூ.402.25 லட்சம் (ரூ.4.02 கோடி) நிதி ஒதுக்கீடு செய்யப்பட்டுள்ளது. இதில் 2026-27 நிதியாண்டில் ரூ.1.51 கோடியும், 2027-28 நிதியாண்டில் ரூ.1.15 கோடியும், 2028-29 நிதியாண்டில் ரூ.80.25 லட்சமும் எனப் படிப்படியாக விடுவிக்கப்படும்.  

மீனவர்களுக்குக் கிடைக்கும் கூடுதல் நிதிப் பலன்கள்

பயனாளிகள் பொதுத்துறை அல்லது வணிக வங்கிகளில் தங்களது தகுதியின் அடிப்படையில் கடன் பெற்று, வழக்கமான மாதாந்திரத் தவணையை (EMI) வங்கிக்குச் செலுத்த வேண்டும். அரசு செலுத்தும் காலாண்டு வட்டி மானியத் தொகை நேரடியாகக் கடன் கணக்கில் வரவு வைக்கப்படுவதால், அசல் தொகை விரைவாகக் குறையும். இதன் மூலம் 12 சதவீத வட்டியில் 7 ஆண்டுகளுக்கு (84 மாதங்கள்) பெறப்படும் கடனானது, சுமார் 4 ஆண்டுகள் 9 மாதங்களிலேயே (57 மாதங்கள்) முழுமையாக அடைந்துவிடும்.  

இந்த வட்டி மானியத் திட்டத்தின் கீழ் பொதுப் பிரிவு மீனவருக்கு சுமார் ரூ.17.47 லட்சம் வட்டியையும், பெண் மீனவருக்கு சுமார் ரூ.10.48 லட்சம் வட்டியையும் அரசே ஏற்றுக்கொள்கிறது. இதனால் பொதுப் பிரிவினர் மாதம் ரூ.1,05,916 மற்றும் பெண் மீனவர்கள் மாதம் ரூ.63,550 என்ற அளவில் தவணை செலுத்தினால் போதுமானது. மேலும், முன்னோடி வங்கிகளுடன் இணைந்து 9 முதல் 10 சதவீத குறைந்த வட்டியில் கடன் வழங்குவதற்கான நடவடிக்கைகளும் மேற்கொள்ளப்பட்டு வருகின்றன. இந்தத் திட்டத்தின் மூலம் பாரம்பரிய மீனவர்கள் ஆழ்கடல் பகுதிகளுக்குச் சென்று அதிகளவில் மீன்பிடித்து, தங்களது பொருளாதார நிலையைப் பன்மடங்கு உயர்த்திக்கொள்ள முடியும் என அரசுச் செயலாளர் அனு ஜார்ஜ் தெரிவித்துள்ளார்.  

Add Zee News as a Preferred Source
TAGS:

About the Author

I have 10 years of experience in writing content for news, television, and digital media websites. I have extensive experience in government projects, politics, and other fields. I provide quality news with factual information.
Read More

ZEENEWS TRENDING STORIES