அரசு ஊழியர்கள், ஆசிரியர்களுக்கு முக்கிய செய்தி: தமிழ்நாடு அரசு அதிரடி உத்தரவு!

தமிழ்நாடு அரசு ஊழியர்கள் மற்றும் ஆசிரியர்களின் பங்களிப்பு ஓய்வூதியத் திட்ட இறுதி ஒப்பளிப்பு தொடர்பான நடைமுறைகளில் கருவூலகங்கள் மற்றும் கணக்குகள் துறை மிகக் கடுமையான அறிவுறுத்தல்களை வெளியிட்டுள்ளது. ஓய்வுபெறும் அல்லது பணியில் இருந்து விலகும் ஊழியர்களுக்கான CPS இறுதி ஒப்படைப்பு முன்மொழிவுகளை, களஞ்சியம் இணையதளம் வழியாக மட்டுமே ஆன்லைனில் சமர்ப்பிக்க வேண்டும் என்றும், தபால் மூலமாகவோ அல்லது நேரடியாகவோ ஆஃப்லைனில் அனுப்பப்படும் எந்தவொரு கருத்துருவும் இனி பரிசீலிக்கப்படாது என்றும் திட்டவட்டமாகத் தெரிவிக்கப்பட்டுள்ளது.  

ஏற்கனவே பிறப்பிக்கப்பட்ட உத்தரவு என்ன?

கடந்த 14.08.2026 நாளிட்ட அலுவலகக் கடிதத்தின் வாயிலாக, 01.09.2026 முதல் CPS இறுதி ஒப்பளிப்பு வழங்குவதற்கான அனைத்துக் கருத்துருக்களும் சம்பந்தப்பட்ட பணம் பெற்று வழங்கும் அலுவலரால் கட்டாயமாக IFHRMS மூலமாக மட்டுமே சமர்ப்பிக்கப்பட வேண்டும் என்று அறிவுறுத்தப்பட்டிருந்தது.  

உத்தரவை மீறி ஆஃப்லைனில் அனுப்பப்பட்ட விண்ணப்பங்கள்:

முந்தைய சுற்றறிக்கையில் மிகத் தெளிவாகக் குறிப்பிடப்பட்டிருந்த போதிலும், சில பணம் பெற்று வழங்கும் அலுவலர்கள் அதனைப் பின்பற்றாமல், CPS இறுதி ஒப்பளிப்பு முன்மொழிவுகளை IFHRMS வழியாகப் பதிவேற்றாமல் ஆஃப்லைன் முறையில் தபால் மூலமாகவும் நேரடியாகவும் தொடர்ந்து அனுப்பி வருவது கண்டறியப்பட்டுள்ளது. இந்தச் செயல் அரசாணைகளுக்கும் துறையின் நடைமுறை அறிவுறுத்தல்களுக்கும் முற்றிலும் முரணானது எனச் சுட்டிக்காட்டப்பட்டுள்ளது.  

கருவூலத்துறையின் கடுமையான எச்சரிக்கை:

இந்த நிலையில், 05.10.2026 நாளிட்ட புதிய சுற்றறிக்கை வாயிலாகக் கருவூலக் கணக்குத் துறை பின்வரும் கடுமையான கட்டுப்பாடுகளை விதித்துள்ளது:  

பரிசீலனைக்குத் தடை: IFHRMS இணையதளம் வாயிலாக ஆன்லைனில் அனுப்பப்படாத எந்தவொரு CPS இறுதி ஒப்படைப்புக் கருத்துருவும் எந்தக் காரணத்தைக் கொண்டும் பரிசீலனைக்கு எடுத்துக்கொள்ளப்பட மாட்டாது.  

திருப்பி அனுப்பப்படும்: தபால் மூலமாகவோ, நேரடியாகவோ அல்லது பிற அலுவலக வழிமுறைகளிலோ பெறப்படும் கடிதங்கள் மற்றும் ஆவணங்கள் அனைத்தும் நிராகரிக்கப்பட்டு, அவற்றை IFHRMS வழியிலேயே சமர்ப்பிக்குமாறு சம்பந்தப்பட்ட DDO-க்களுக்கே திருப்பி அனுப்பப்படும்.  

DDO-க்களே முழுப் பொறுப்பு: இந்த அறிவுறுத்தல்களை மீறி தபால் அல்லது நேரடி முறையில் கருத்துருக்கள் அனுப்பப்பட்டு, அதனால் ஏற்படும் தேவையற்ற காலதாமதம் மற்றும் கருத்துருக்கள் திருப்பி அனுப்பப்படுவதால் ஏற்படும் சிக்கல்களுக்குச் சம்பந்தப்பட்ட பணம் பெற்று வழங்கும் அலுவலரே முழுப் பொறுப்பாவார்.  

அதிகாரிகளுக்கு விடுக்கப்பட்டுள்ள வழிகாட்டுதல்:

அனைத்துச் சம்பளம் மற்றும் கணக்கு அலுவலர்கள்மற்றும் மாவட்டக் கருவூல அலுவலர்கள், தங்களது கட்டுப்பாட்டில் உள்ள அனைத்து DDO-க்களுக்கும் இந்த உத்தரவை உடனடியாகவும் தெளிவாகவும் எடுத்துரைக்க வேண்டும் என்று உத்தரவிடப்பட்டுள்ளது. இனிவரும் காலங்களில் CPS இறுதித் தீர்வுக்கான கருத்துருக்கள் ஆன்லைனில் மட்டுமே பதிவேற்றப்படுவதை முழுமையாக உறுதி செய்ய வேண்டும் என்றும் அறிவுறுத்தப்பட்டுள்ளது.  

மேலும், மண்டல இணை இயக்குநர்களும் தங்களது ஆளுகைக்குட்பட்ட பகுதிகளில் இந்த வழிகாட்டுதல்கள் தடையின்றி முறையாகக் கடைப்பிடிக்கப்படுவதை உறுதி செய்ய உரிய நடவடிக்கைகளை மேற்கொள்ளுமாறு உத்தரவிடப்பட்டுள்ளது.