சாக்கடை அடைப்பு, குடிநீர் குழாய் உடைப்புக்கு இனி உடனடியாக முற்றுப்புள்ளி! அரசின் புதிய திட்டம்

தமிழ்நாட்டில் உள்ள நகர்ப்புற உள்ளாட்சி அமைப்புகளில் அடிப்படை சேவைகளை மேம்படுத்தவும், பொதுமக்களின் அத்தியாவசிய தேவைகளை உடனுக்குடன் கண்காணிக்கவும் தமிழ்நாடு அரசின் நகராட்சி நிர்வாக இயக்குநரகம் புதிய மெகா திட்டத்தை முன்னெடுத்துள்ளது. இதன்படி, குடிநீர் விநியோகம், பாதாளச் சாக்கடைத் திட்டம் மற்றும் திடக்கழிவு மேலாண்மை ஆகிய மூன்று முக்கிய பணிகளையும் நிகழ்நேரத்தில் ஒருங்கிணைத்துக் கண்காணிக்கும் வகையில் "ரியல் டைம் மானிட்டரிங் சிஸ்டம்" (RMS) செயல்படுத்தப்படவுள்ளது. இந்த உயர் தொழில்நுட்ப அமைப்பினை வடிவமைத்தல், மேம்படுத்துதல், செயல்படுத்துதல் மற்றும் பராமரித்தல் பணிகளுக்காக தகுதிவாய்ந்த அமைப்பு ஒருங்கிணைப்பாளரை தேர்வு செய்ய அதிகாரப்பூர்வமாக ஒப்பந்தப்புள்ளி கோரப்பட்டுள்ளது.  

மேலும் படிக்க | தமிழகத்தை நெருங்கும் ‘முரசு’ புயல்: சென்னைக்கு ஆரஞ்சு அலர்ட் – முழு விவரம்!

நிகழ்நேர கண்காணிப்பில் இணையும் மூன்று முக்கிய சேவைகள்

நகராட்சி நிர்வாக இயக்குநரகம் அறிவித்துள்ள இந்த ஒருங்கிணைந்த RMS அமைப்பில் மூன்று முதன்மை துறைகள் முழுமையாக இணைக்கப்பட உள்ளன:  

குடிநீர் வழங்கல்: நகர்ப்புறப் பகுதிகளில் பொதுமக்களுக்கு விநியோகிக்கப்படும் குடிநீரின் அளவு, விநியோக அழுத்தம் மற்றும் விநியோக நேரம் ஆகியவை டிஜிட்டல் சென்சார்கள் மூலம் கண்காணிக்கப்படும். இதன் மூலம் எந்தப் பகுதியில் எப்போது குடிநீர் விநியோகம் செய்யப்படுகிறது என்ற துல்லியமான தகவல் தலைமை அலுவலகத்திற்கு உடனுக்குடன் சென்று சேரும்.  

பாதாளச் சாக்கடைத் திட்டம்: நிலத்தடி கழிவுநீர் குழாய்களின் நிலை, மேன்ஹோல்களில் கழிவுநீர் நிரம்பி வழியும் அபாயம் மற்றும் கழிவுநீர் உந்து நிலையங்களின் செயல்பாடுகள் நவீன உணரிகள் வாயிலாகக் கண்காணிக்கப்படும்.  

திடக்கழிவு மேலாண்மை: வீடு வீடாகச் சென்று குப்பைகளைச் சேகரிக்கும் வாகனங்களின் இயக்கம், குப்பை சேகரிப்புப் பாதைகள் மற்றும் பொதுக் குப்பைத் தொட்டிகள் நிரம்பியுள்ள விவரங்கள் ஜிபிஎஸ் (GPS) தொழில்நுட்பம் மற்றும் சென்சார்கள் மூலம் தொடர்ந்து கண்காணிக்கப்படும்.  

பொதுமக்களுக்குக் கிடைக்கும் நேரடி நன்மைகள்

இந்த ஹை-டெக் கண்காணிப்பு நடைமுறைக்கு வருவதன் மூலம் பொதுமக்கள் அன்றாடம் சந்திக்கும் பல முக்கிய பிரச்சனைகளுக்கு அதிகாரிகள் அலுவலகத்தில் இருந்தபடியே கணினித் திரையில் தீர்வு காண முடியும். குழாய் உடைப்புகள் அல்லது முறைகேடான தண்ணீர் திருட்டுகள் நிகழ்ந்தால் விநியோக அழுத்தக் குறைவு மூலம் சென்சார்கள் உடனடியாக எச்சரிக்கை விடுக்கும் என்பதால், குடிநீர் விநியோகத் தடைகள் தாமதமின்றி சரிசெய்யப்படும்.

அதேபோல், மழைக்காலங்களிலோ அல்லது வழக்கமான நாட்களிலோ கழிவுநீர் நிரம்பி தெருக்களில் பெருக்கெடுத்து ஓடும் முன், சென்சார் எச்சரிக்கை மூலம் துப்புரவுப் பணிகள் முன்கூட்டியே முடுக்கிவிடப்படும். குப்பை சேகரிக்கும் வாகனங்கள் எந்தெந்த வீதிகளுக்குச் சென்றன, குப்பைகள் முறையாக அள்ளப்பட்டனவா என்பதையும் ஆணையர்கள் மற்றும் அதிகாரிகள் லைவ் முறையில் ஆய்வு செய்ய இயலும் என்பதால், நகர்ப்புறத் தூய்மைப் பணிகள் தொய்வின்றி நடைபெறும்.

டெண்டர் குறித்த முக்கிய விவரங்கள்

சென்னை எம்.ஆர்.சி. நகரில் செயல்பட்டு வரும் நகராட்சி நிர்வாக இயக்குநரகம் வெளியிட்டுள்ள அறிவிப்பின்படி, இத்திட்டத்திற்கான ஒப்பந்தப்புள்ளி ஆவணங்கள் தமிழ்நாடு அரசின் அதிகாரப்பூர்வ இணையதளமான www.tntenders.gov.in முகவரியில் வெளியிடப்பட்டுள்ளன.  

முன்கலந்தாய்வுக் கூட்டம்: 10.11.2026 அன்று காலை 11 மணியளவில் சென்னை நகராட்சி நிர்வாக இயக்குநர் அலுவலகத்தில் நடைபெறும்.  

ஒப்பந்தப்புள்ளி சமர்ப்பிக்க கடைசி நாள் மற்றும் நேரம்: 17.11.2026 அன்று மாலை 3 மணி வரை.  

டெண்டர் திறக்கப்படும் நேரம்: 17.11.2026 அன்று மாலை 4 மணி.  

நகர்ப்புற நிர்வாகத்தை முழுமையாக டிஜிட்டல் மயமாக்கி, குடிநீர் பற்றாக்குறை, சாக்கடை அடைப்பு, குப்பைக் கழிவுகள் போன்ற அன்றாடப் பிரச்சனைகளுக்கு விரைந்து தீர்வு காண வழிவகுக்கும் இந்த முன்னெடுப்பு, பொதுமக்கள் மத்தியில் மிகுந்த வரவேற்பைப் பெற்றுள்ளது