தமிழகத்தை நெருங்கும் ‘முரசு’ புயல்: சென்னைக்கு ஆரஞ்சு அலர்ட் – முழு விவரம்!

Cyclone Murasu Near Tamil Nadu: வங்கக் கடலில் நிலை கொண்டுள்ள ‘முரசு’ புயலின் நகர்வுகள் குறித்து தமிழ்நாடு பேரிடர் அபாயக் குறைப்பு முகமை மற்றும் இந்திய வானிலை ஆய்வு மையம் ஆகியவை தீவிரமாகக் கண்காணித்து வருகின்றன. நவம்பர் 1 ஆம் தேதி பிற்பகல் நிலவரப்படி, ‘முரசு’ புயலானது சென்னைக்கு கிழக்கு-தென்கிழக்கே சுமார் 480 கிலோமீட்டர் தொலைவில் நிலைகொண்டு, மேற்கு-வடமேற்கு திசையை நோக்கி நகர்ந்து கொண்டிருக்கிறது.  

இந்தப் புயல் நவம்பர் 2 ஆம் தேதி இன்று காலைக்குள் மேலும் தீவிரமடைந்து ‘தீவிர புயலாக’ வலுப்பெறும் என்று கணிக்கப்பட்டுள்ளது. அதனைத் தொடர்ந்து, நவம்பர் 2 இன்று இரவு முதல் நவம்பர் 3 அதிகாலைக்குள் ஆந்திரப் பிரதேசத்தின் நெல்லூர் மற்றும் நரசாபுரம் இடையே கரையை கடக்கும் என வானிலை ஆய்வு மையம் தெரிவித்துள்ளது. புயல் ஆந்திரக் கடற்கரையை நோக்கிக் கடந்தாலும், அதன் தாக்கத்தால் தமிழகத்தின் கடலோர மற்றும் வட மாவட்டங்களில் பலத்த சூறைக்காற்றுடன் கூடிய கனமழை முதல் மிகக் கனமழை பெய்யக்கூடும் என்று எச்சரிக்கப்பட்டுள்ளது. இதனால் பொதுமக்கள் அச்சப்படத் தேவையில்லை என்றும், அதே வேளையில் தேவையான முன்னெச்சரிக்கை நடவடிக்கைகளை மேற்கொள்ள வேண்டும் என்றும் அரசு அறிவுறுத்தியுள்ளது.  

சென்னை, திருவள்ளூருக்கு ஆரஞ்சு அலர்ட்:

வட தமிழகத்தில் பல இடங்களில் லேசானது முதல் மிதமான மழையும், ஓரிரு இடங்களில் கனமழை முதல் மிகக் கனமழையும் பதிவாக வாய்ப்புள்ளது. மாவட்ட வாரியாக விடுக்கப்பட்டுள்ள மழை எச்சரிக்கை விவரங்கள்:  

ஆரஞ்சு எச்சரிக்கை (மிகக் கனமழை): நவம்பர் 2 இன்று சென்னை மற்றும் திருவள்ளூர் மாவட்டங்களுக்கும் மிகக் கனமழைக்கான ‘ஆரஞ்சு அலர்ட்’ விடுக்கப்பட்டுள்ளது.  

மஞ்சள் எச்சரிக்கை (கனமழை): நவம்பர் 2 அன்று வேலூர், காஞ்சிபுரம், செங்கல்பட்டு மற்றும் நீலகிரி ஆகிய மாவட்டங்களுக்கு கனமழைக்கான ‘மஞ்சள் அலர்ட்’ விடுக்கப்பட்டுள்ளது.  

80 கி.மீ வேகத்தில் சூறைக்காற்று: கொந்தளிக்கும் கடல் பகுதி

வடக்கு தமிழ்நாடு மற்றும் புதுச்சேரி கடலோரப் பகுதிகளில் காற்றின் வேகம் கணிசமாக உயரும் என்று கணிக்கப்பட்டுள்ளது.  

நவம்பர் 2 ஆம் தேதியான இன்று காலையில் காற்றின் வேகம் மணிக்கு 55 முதல் 65 கி.மீ ஆகவும், அதிகபட்சமாக 75 கி.மீ வரையிலும் அதிகரிக்கும்.  

மாலை முதல் நவம்பர் 3 காலை வரை புயலின் தாக்கம் உச்சத்தில் இருக்கும் நேரத்தில் வழக்கமாக மணிக்கு 60 முதல் 70 கி.மீ வேகத்திலும், அவ்வப்போது அதிகபட்சமாக 80 கி.மீ வேகம் வரையிலும் பலத்த காற்று வீசக்கூடும். நவம்பர் 3 பிற்பகல் முதல் காற்றின் வேகம் படிப்படியாகக் குறையத் தொடங்கும்.  

கடல் நிலவரத்தைப் பொறுத்தவரை, நவம்பர் 4 காலை வரை வடக்கு தமிழ்நாடு மற்றும் புதுச்சேரி கடலோரப் பகுதிகளில் கடல் மிகவும் கொந்தளிப்பாகக் காணப்படும். சுமார் 4 முதல் 6 மீட்டர் வரை ராட்சத அலைகள் எழக்கூடும் என்பதால் பார்வைத்திறனும் குறைவாக இருக்கும். நவம்பர் 4-க்குப் பிறகே இயல்பு நிலை திரும்பும் என்று அறிவிக்கப்பட்டுள்ளது.  

மீனவர்களுக்குக் கடுமையான எச்சரிக்கை: கடலுக்குச் செல்ல முழுத் தடை

வடக்கு தமிழ்நாடு மற்றும் புதுச்சேரி கடலோரப் பகுதிகள் மற்றும் தென்மேற்கு வங்காள விரிகுடா கடற்பகுதிகளுக்கு நவம்பர் 4-ஆம் தேதி காலை வரை மீனவர்கள் எவரும் மீன்பிடிக்கச் செல்ல வேண்டாம் என்று கண்டிப்புடன் அறிவுறுத்தப்பட்டுள்ளது. அனைத்து விதமான மீன்பிடி நடவடிக்கைகளும் முழுமையாக நிறுத்தி வைக்கப்பட வேண்டும்.  

ஏற்கெனவே ஆழ்கடலில் மீன்பிடித்துக் கொண்டிருக்கும் மீனவர்கள் உடனடியாக அருகிலுள்ள துறைமுகத்திற்கோ அல்லது பாதுகாப்பான கடற்கரைக்கோ திரும்ப வேண்டும். படகுகளைக் கண்காணித்து, மீனவர்கள் பாதுகாப்பாகக் கரை திரும்புவதற்குத் தேவையான வழிகாட்டுதல் பணிகளில் மீன்வளத்துறை மற்றும் துறைமுக அதிகாரிகள் தீவிரமாக ஈடுபட்டு வருகின்றனர்.  

பொதுமக்கள் செய்ய வேண்டிய பாதுகாப்பு நடவடிக்கைகள்

கடலோரச் சாலைகளைத் தவிர்த்தல்: ராட்சத அலைகள் மற்றும் கடல் கொந்தளிப்பினால் கிழக்குக் கடற்கரைச் சாலை (ECR), பழைய மாமல்லபுரம் சாலை (OMR) போன்ற பகுதிகளில் கடல் நீர் தெறித்து ஆபத்து ஏற்பட வாய்ப்புள்ளது. எனவே கடலோர நடைபாதைகள் மற்றும் சாலைகளில் இருந்து பாதுகாப்பான தொலைவில் இருக்க வேண்டும்.  

நீர் தேங்கிய பகுதிகளைத் தவிர்த்தல்: ஆழம் தெரியாத நீர் தேங்கிய சாலைகள், பாலங்கள் மற்றும் தாழ்வான சுரங்கப்பாதைகளில் நடப்பதையோ அல்லது வாகனங்களை இயக்குவதையோ முற்றிலுமாகத் தவிர்க்க வேண்டும்.  

அத்தியாவசியப் பொருட்கள் இருப்பு: போதுமான அளவு குடிநீர், குடும்பத்திற்குத் தேவையான அத்தியாவசிய மருந்துகள், அவசர விளக்குகள் (எமர்ஜென்சி லைட்/டார்ச்), மற்றும் பவர் பேங்க் மூலம் முழுமையாக சார்ஜ் செய்யப்பட்ட செல்போன்களை எப்போதும் தயார் நிலையில் வைத்திருக்க வேண்டும்.  

வீட்டுப் பராமரிப்பு மற்றும் தளர்வான பொருட்கள்: மழைநீர் தடையின்றி வெளியேறும் வகையில் மொட்டை மாடி மற்றும் பால்கனி வடிகால்களைச் சுத்தம் செய்து வைக்க வேண்டும். பலத்த காற்றில் பறக்கக்கூடிய தகரங்கள், விளம்பரப் பலகைகள் அல்லது எடை குறைந்த பொருட்களைப் பாதுகாப்பாகக் கட்டி வைக்க வேண்டும்.  

அதிகாரப்பூர்வ தகவல்கள்: வானிலை மாற்றங்கள் குறித்து TNDRRA, இந்திய வானிலை ஆய்வு மையம் (IMD) மற்றும் மாவட்ட ஆட்சியர் அலுவலகங்கள் வழங்கும் அதிகாரப்பூர்வ அறிவிப்புகளை மட்டுமே பின்பற்ற வேண்டும்.  

அவசர எண்கள்: ஏதேனும் அவசர உதவி தேவைப்பட்டால் மாநில அவசர உதவி எண்: 1070 அல்லது மாவட்ட அவசர உதவி எண்: 1077 ஆகியவற்றைத் தொடர்பு கொள்ளலாம்.  

பொதுமக்கள் தவிர்க்க வேண்டிய தவறுகள்

வேடிக்கை பார்க்கச் செல்லக் கூடாது: கடல் கொந்தளிப்பாக இருக்கும்போது புகைப்படம் எடுப்பதற்காகவோ, செல்ஃபி எடுப்பதற்கோ அல்லது வேடிக்கை பார்ப்பதற்காகவோ கடற்கரைகள், துறைமுக நடைமேடைகள் அல்லது கடலோரப் பகுதிகளுக்குச் செல்லவே கூடாது.  

மின்கம்பங்களைத் தொடக் கூடாது: ஈரப்பதம் மற்றும் சூறைக்காற்று இருக்கும் காலங்களில் தெருவிளக்குகள், மின் கம்பங்கள், மின்மாற்றிகள் (டிரான்ஸ்பார்மர்கள்) மற்றும் அறுந்து விழுந்து கிடக்கும் மின் கம்பிகளுக்கு அருகில் செல்லவோ அல்லது அவற்றைத் தொடவோ கூடாது.  

பாதுகாப்பற்ற கட்டடங்களைத் தவிர்த்தல்: பலவீனமான கூரைகள், குடிசை வீடுகள் அல்லது பாழடைந்த பழைய கட்டடங்களில் தங்குவதைத் தவிர்க்க வேண்டும். அதிகாரிகள் அறிவுறுத்தினால் உடனடியாக அரசு ஏற்பாடு செய்துள்ள நிவாரண முகாம்களுக்குச் செல்ல வேண்டும்.  

வதந்திகளைப் பரப்ப வேண்டாம்: உறுதிப்படுத்தப்படாத செய்திகளையோ அல்லது தேவையற்ற பீதியை ஏற்படுத்தும் வதந்திகளையோ சமூக வலைதளங்களில் பகிரவோ, மற்றவர்களுக்கு அனுப்பவோ கூடாது.  

இத்தகவல்களை வருவாய் நிர்வாக ஆணையர் அதிகாரப்பூர்வமாக வெளியிட்டுள்ளார். பொதுமக்கள் விழிப்புணர்வுடனும் முழு ஒத்துழைப்புடனும் செயல்படுமாறு கேட்டுக்கொள்ளப்படுகிறார்கள்