இன்னும் பென்ஷன் வரலையா... டென்ஷன் ஆக வேண்டாம்... தமிழ்நாடு அரசின் முக்கிய அறிவிப்பு
முதியோர், மாற்றுத்திறனாளி என 12 வகை திட்டங்கள் மூலம் ஓய்வூதியம் பெறுவோர் பணம் வரவு வைக்கப்படுவதில் தாமதம் ஏற்பட்டால் பயப்படத் தேவையில்லை என தமிழ்நாடு அரசு தரப்பில் விளக்கம் அளிக்கப்பட்டுள்ளது. எப்போது வரவு வைக்கப்படும் என்பது குறித்து தெரிவிக்கப்பட்டுள்ளது.
TN Social Security Pension Latest News: தமிழ்நாடு அரசின் முன்னோடித் திட்டங்களில் மிகவம் சிறப்பு வாய்ந்த சமூகப் பாதுகாப்புத் திட்டங்களின் கீழ், முதியோர், மாற்றுத்திறனாளிகள், விதவைகள், கணவனால் கைவிடப்பட்டவர்கள், வேளாண் தொழிலாளர்கள் உள்ளிட்ட நலிவுற்ற பிரிவினருக்கு 12 வகையான திட்டங்களின் கீழ் ஓய்வூதியம் அளிக்கப்பட்டு வருகிறது.
இந்த 12 வகையான திட்டங்களின் கீழ் 35 லட்சத்து 37 ஆயிரத்து 372 பயனாளிகளுக்கு தமிழ்நாடு அரசு ஓய்வூதியம் வழங்கி வருகிறது. இவர்களில், சுமார் 15 லட்சத்து 56 ஆயிரத்து 674 ஓய்வூதியப் பயனாளிகளுக்கு, நடப்பு செம்டம்பரில் வழங்கப்படும் ஆகஸ்ட் மாதத்திற்கான ஓய்வூதியத் தொகை அவர்களது வங்கிக் கணக்குகளில் ஏற்கனவே வரவு வைக்கப்பட்டுள்ளதாக தமிழ்நாடு அரசு தெரிவித்துள்ளது.
இந்த 3 திட்டங்களின் பயனாளிகள் விவரம்
மேலும், தேசிய சமூகப் பாதுகாப்புத் திட்டத்தின் கீழ், மத்திய அரசின் பங்களிப்புடன் செயல்படுத்தப்பட்டு வரும் இந்திரா காந்தி தேசிய முதியோர் ஓய்வூதியத் திட்டம், இந்திரா காந்தி தேசிய விதவையர் ஓய்வூதியத் திட்டம் மற்றும் இந்திரா காந்தி தேசிய மாற்றுத்திறனாளிகள் ஓய்வூதியத் திட்டம் ஆகிய மூன்று திட்டங்களின் கீழ் சுமார் 19 லட்சத்து 20 ஆயிரத்து 858 பயனாளிகள் ஓய்வூதியம் பெற்று வருகின்றனர்.
மத்திய அரசுக்காக காத்திருப்பு...
இந்த திட்டங்களின் கீழ் கடந்த ஆகஸ்ட் மாதத்திற்கான ஓய்வூதியத் தொகையை, மத்திய அரசால் அறிவுறுத்தப்பட்டுள்ள SNA-SPARSH நிதிப் பரிவர்த்தனை தளத்தின் மூலம் இம்மாதம் முதல் வழங்குவதற்கான நடவடிக்கைகள் மேற்கொள்ளப்பட்டு வருகின்றன. இத்திட்டங்களின் பயனாளிகளுக்கான ஓய்வூதியப் பட்டியல் தயார் செய்யப்பட்டது. தொடர்ந்து மத்திய அரசின் பங்களிப்புத் தொகைக்கான ஒப்புதலுக்காக அனுப்பப்பட்டுள்ளது.
ஒப்புதல் பெறுவதில் தாமதம்
இந்நிலையில், செப்டம்பர் 11ஆம் தேதி (வெள்ளி) முதல் செப்டம்பர் 14ஆம் தேதி வரை (திங்கள்) மத்திய அரசு அலுவலகங்களுக்கு தொடர் விடுமுறை என்பதால், மேற்குறிப்பிட்ட
திட்டங்களுக்கான ஓய்வூதியப் பட்டியலுக்கு ஒப்புதல் பெறுவதில் தாமதம் ஏற்பட வாய்ப்புள்ளது.
அச்சப்பட தேவையில்லை - அரசு
எனவே, சமூகப் பாதுகாப்புத் திட்டங்களின் கீழ் ஓய்வூதியம் பெற்று வரும் பயனாளிகள், தங்களது ஓய்வூதியத் தொகை வரவு வைக்கப்படுவதில் ஏற்படும் தாமதம் குறித்து அச்சம் கொள்ளத் தேவையில்லை என்று தமிழ்நாடு அரசு தெரிவித்துள்ளது.
ஓய்வூதியத் தொகை வரும் செப்டம்பர் 14ஆம் தேதி முதல் உரிய முறையில் வழங்குவதற்கான தொடர் நடவடிக்கைகள் மேற்கொள்ளப்பட்டு வருகின்றன என்றும் தமிழ்நாடு அரசு சார்பில் தெரிவிக்கப்பட்டுள்ளது.
திட்டங்களின் அடிப்படைகள் மற்றும் தகுதிகள்
- தமிழ்நாடு அரசின் 12 வகையான சமூகப் பாதுகாப்பு திட்டங்களின் அடிப்படைகள் மற்றும் தகுதிகளை இங்கு காணலாம்.
- முதியோர் ஓய்வூதிய திட்டத்தில் பயனடைய பொதுவாக 60 அல்லது அதற்கு மேற்பட்ட வயதினராக இருக்க வேண்டும்.
- வறுமை கோட்டிற்கு கீழ் உள்ள குடும்பங்களைச் சேர்ந்த முதியோர்களுக்கு இதில் முன்னுரிமை வழங்கப்படுகிறது.
- ஆதரவற்ற விதவைகள், 18 வயது பூர்த்தியடைந்த நிலையில் வருமான வரம்பிற்கு உட்பட்டு விதவை ஓய்வூதியம் பெற விண்ணப்பிக்கலாம்.
- கணவனால் கைவிடப்பட்ட பெண்களுக்கான ஓய்வூதியம் பெற சட்டப்பூர்வமாக விவாகரத்து பெற்றிருக்க வேண்டும் அல்லது குறைந்தது 5 ஆண்டுகள் கணவரைப் பிரிந்து வாழ்ந்ததற்கான சான்று தேவைப்படும்.
- திருமணமாகாத, ஆதரவற்ற 50 வயதிற்கு மேற்பட்ட ஏழைப் பெண்களுக்குத் தனியாக ஓய்வூதியத் திட்டம் செயல்படுத்தப்படுகிறது.
- உழவர் பாதுகாப்புத் திட்டத்தின் கீழ் நிலமற்ற விவசாயக் கூலித் தொழிலாளர்கள் மற்றும் சிறு, குறு விவசாயிகளுக்கு ஓய்வூதியம் வழங்கப்படுகிறது.
- 40% அல்லது அதற்கு மேற்பட்ட உடல் ஊனமுற்ற மாற்றுத்திறனாளிகளுக்குச் சிறப்பு ஓய்வூதியம் வழங்கப்படுகிறது.
- கடுமையான அறிவுசார் குறைபாடு, தசைச்சிதைவு நோய் உள்ள நபர்களுக்கு பராமரிப்புத் தொகையாகக் கூடுதல் நிதி உதவி அளிக்கப்படுகிறது.
- எய்ட்ஸ்/ஹெச்.ஐ.வி பாதித்த நபர்களுக்கு அவர்களின் வாழ்வாதாரத்தை உறுதி செய்யத் தனி ஓய்வூதியம் நடைமுறையில் உள்ளது.
- இலங்கைத் தமிழர் மறுவாழ்வு முகாம்களில் வசிக்கும் முதியோர் மற்றும் மாற்றுத்திறனாளிகளுக்கும் இந்த சமூகப் பாதுகாப்பு ஓய்வூதியம் விரிவுப்படுத்தப்பட்டுள்ளது.