Explained : பேராசிரியர் கலையரசன் கைது செய்யப்பட்டாரா? போலீஸார் துன்புறுத்தியதாக புகார்..என்ன நடந்தது?

பேராசிரியரும், பொருளாதார அறிஞருமான கலையரசன், புதன்கிழமையன்று சட்டவிரோதமாக போலீசாரால் அழைத்து செல்லப்பட்டு, அலைக்கழிக்கப்பட்டதாக கூறப்படுகிறது. இது, அவரது நலம் விரும்பிகள், திமுக கட்சியினர் இடையே கடும் அதிர்ச்சியை ஏற்படுத்தி இருக்கிறது.

காவல் நிலையத்திற்கு அழைத்து செல்லப்பட்ட கலையரசன்..

அக்டோபர் 28ஆம் தேதியான நேற்று அதிகாலை 5 மணியளவில், சென்னை அடையாறு நேரு நகரில் உள்ள கலையரசனை, சாதாரண உடையில் வந்த போலீசார் அவரது கதவைத்தட்டி, பெயரை கேட்டு, செல்போனை பறித்து காவல் நிலியத்திற்கு அவரை அழைத்து சென்றதாக கூறப்படுகிறது. இது குறித்து கலையரசன் எழுதியிருக்கும் புகாரிலும் இந்த சம்பவங்கள் குறிப்பிடப்பட்டுள்ளன. இவரை கைது செய்ய சொல்லப்பட்ட காரணம், தவெக எம்.எல்.ஏ ஜெ.காமாட்சி குறித்து இன்ஸ்டாகிராமில் இவர் அவதூறான கருத்தை பதிவிட்டதாக போலீசார் கூறியிருக்கின்றனர்.

புகாரில் குறிப்பிடப்பட்டுள்ளது என்ன?

கலையரசன், இது குறித்து நடவடிக்கை எடுக்க கோரி, டிஜிபிக்கு புகார் கடிதம் கொடுத்திருக்கிறார். அதில் அவர் குறிப்பிட்டிருக்கும் விவரங்கள் பின்வருமாறு:

“எனது பெயர் கலையரசன் ஏ. நான் சென்னை வளர்ச்சி ஆய்வகத்தில் (Madras Institute of Development Studies - MIDS) பொருளாதாரப் பேராசிரியராகப் பணியாற்றுகிறேன். உங்கள் தலையீட்டை நாடி இந்தக் புகாரை எழுதுகிறேன்.
ஒரு பொருளாதார நிபுணராக, நான் உலகளவில் அங்கீகரிக்கப்பட்ட கல்விசார் புத்தகங்களையும் ஆய்வுக் கட்டுரைகளையும் எழுதியுள்ளேன். கேம்பிரிட்ஜ் பல்கலைக்கழகப் பதிப்பகத்தால் வெளியிடப்பட்ட 'தி திராவிடியன் மாடல்' (The Dravidian Model) இதில் அடங்கும். நான் இந்தியத் திட்டக் குழு (தற்போதைய நிதி ஆயோக்), தில்லியில் உள்ள தொழில் மேம்பாட்டு ஆய்வக நிறுவனம் (ISID), கிங்ஸ் கல்லூரி லண்டன், பிரவுன் பல்கலைக்கழகம், ஐஐடி பம்பாய் மற்றும் தேசிய சட்டப் பல்கலைக்கழகம் (NLSIU) ஆகியவற்றில் பல்வேறு பொறுப்புகளில் பணியாற்றியுள்ளேன்.

அதிகாலையில் அழைத்து சென்ற காவல் துறையினர்..

இன்று காலை (அக்டோபர் 28) சுமார் 5 மணியளவில், நான் ஆழ்ந்த உறக்கத்தில் இருந்தபோது, ​​சென்னையில் உள்ள எனது இல்லத்தில் (47, 4-வது தெரு, நேரு நகர், அடையாறு) சிவில் உடையில் வந்த மூன்று காவலர்கள் கதவைத் தட்டினர். நான் கதவைத் திறந்ததும், அவர்கள் எனது பெயரை உறுதிப்படுத்திக் கொண்டனர். உடனே, சமூக ஊடகப் பதிவு ஒன்று தொடர்பாக விசாரணை நடத்த, பம்மலில் உள்ள சங்கர் நகர் காவல் நிலையத்திற்கு (74, சங்கர் நகர் காவல் நிலையம்) என்னை அழைத்துச் செல்ல வந்திருப்பதாகக் கூறி, எனது அலைபேசியைப் பறித்துக்கொண்டனர். இந்த விசாரணைக்கான எந்தவொரு அதிகாரப்பூர்வ ஆவணத்தையோ, புகாரின் நகலையோ அல்லது முதல் தகவல் அறிக்கையையோ (FIR) அவர்கள் என்னிடம் காட்டவில்லை. 

பல்லாவரம் தொகுதி தவெக (TVK) சட்டமன்ற உறுப்பினர் ஜே. காமாட்சிக்கு எதிராக, எனக்குத் தொடர்பே இல்லாத ஒரு இன்ஸ்டாகிராம் கணக்கிலிருந்து அவதூறான கருத்துகளைப் பதிவிட்டதாக அவர்கள் குற்றம் சாட்டினர். அந்த சட்டமன்ற உறுப்பினரையோ அல்லது அவரது சமூக ஊடகக் கணக்குகளையோ எனக்குத் தெரியாது; சொல்லப்போனால், அவரைப் பற்றி நான் கேள்விப்பட்டதே இல்லை. எனக்கு இன்ஸ்டாகிராம் கணக்கே இல்லை என்பதை விளக்க முயன்றேன். ஆனால், அதைக் காதுகொடுத்துக் கேட்காமல், எனது வீட்டிற்கு வெளியே நிறுத்தப்பட்டிருந்த ஒரு வாடகை காரில் (காவல்துறை வாகனம் அல்ல) என்னை ஏற்றிக்கொண்டு அழைத்துச் சென்றனர்.

“45 நிமிடங்கள் அலைக்கழித்தனர்..”

எனது குடும்பத்தினருக்குத் தகவல் தெரிவிக்கக்கூட அவர்கள் எனக்கு வாய்ப்பு அளிக்கவில்லை. வாகனம் கிண்டியைத் தாண்டியபோது, ​​எனது குடும்பத்தினரைத் தொடர்புகொள்ள எனது அலைபேசியைத் திருப்பித் தருமாறு அவர்களிடம் கேட்டுக்கொண்டேன். பலமுறை கேட்டுக்கொண்ட பிறகு, அவர்கள் எனக்குச் சில நிமிடங்கள் தொலைபேசியைப் பயன்படுத்த அனுமதித்தனர்; அந்த நேரத்தில், என்ன நடக்கிறது என்பதை என் நண்பர்களிடம் தெரிவித்தேன். அதற்குள், அந்த வாகனம் பல்லாவரத்தை அடைந்தது. அங்கு சாலையோரத்தில் வாகனத்தை நிறுத்திவிட்டு, சுமார் 45 நிமிடங்கள் கழித்தனர்.

அந்த நேரத்தில் அவர்கள் பல தொலைபேசி அழைப்புகளைச் செய்தனர், மேலும் சில அழைப்புகளைப் பெற்றனர். அதன் பிறகு, என்னை மீண்டும் வீட்டிலேயே விட்டுவிடுமாறு தங்களுக்கு உத்தரவு வந்திருப்பதாக என்னிடம் கூறினர். திரும்பி வரும் வழியில், இன்ஸ்டாகிராம் கணக்கு ஒன்றிலிருந்து பதிவிடப்பட்ட அவதூறான கருத்து அடங்கிய ஸ்கிரீன்ஷாட் ஒன்றைக் காட்டினர்.

அந்தக் கணக்கின் சுயவிவரப் படத்தில் (profile picture) எனது புகைப்படம் இருந்தது, ஆனால் பயனர் பெயர் (username) வேறாக இருந்தது—அதாவது '@youvijaşamani' என்று இருந்தது. இதைப் பற்றி எனக்கு எதுவுமே தெரியாது. ஹார்வர்ட் பல்கலைக்கழகத்தின் இணையதளத்தில் நான் ஆராய்ச்சி உதவியாளராக (research affiliate) இருந்தபோது, ​​அங்கிருந்து எனது புகைப்படத்தை அந்த நபர் எடுத்திருக்கலாம் என்று தோன்றுகிறது.

மேலும் படிக்க | தமிழகத்தில் நீதிபதிகள் தேர்வில் அதிரடி மாற்றம்: தேர்ச்சி மதிப்பெண்கள் குறைப்பு – முழு விவரம்

“துன்புறுத்தினர்..”

எனது குடியிருப்பிற்கு வந்தடைந்ததும், அந்த இன்ஸ்டாகிராம் கணக்கிற்கும் எனக்கும் எந்தத் தொடர்பும் இல்லை என்பதை எழுத்துப்பூர்வமாகத் தருமாறு என்னிடம் கேட்டனர். எனவே, காவல் ஆய்வாளர் (T4 சங்கர் நகர்) அவர்களுக்கு ஒரு கடிதம் எழுதினேன்; அதில், அந்தக் கணக்கு என்னுடையது அல்ல என்றும், எனது புகைப்படம் பயன்படுத்தப்பட்ட அந்த இன்ஸ்டாகிராம் கணக்கைப் பற்றி எனக்குத் தெரியாது என்றும் குறிப்பிட்டிருந்தேன். அந்தக் கடிதத்தைப் பெற்றுக்கொண்ட பிறகு, அவர்கள் எனது தொலைபேசியைத் திருப்பித் தந்தனர். காலை 7:45 மணியளவில் நான் வீட்டிற்கு அழைத்து வரப்பட்டேன்.

என்னை நடத்திய விதம் மிகுந்த மன உளைச்சலையும் அவமானத்தையும் ஏற்படுத்தியது; எனக்கு விளக்கம் அளிப்பதற்கான நியாயமான வாய்ப்பு கூட வழங்கப்படவில்லை. உண்மையில், இந்த விவகாரத்தில் நான்தான் பாதிக்கப்பட்டவள்; யாரோ எனது புகைப்படத்தைத் தவறாகப் பயன்படுத்தி, போலியான இன்ஸ்டாகிராம் கணக்கை உருவாக்கி, எனக்குத் தெரியாத ஒரு நபருக்கு எதிராக அவதூறான கருத்துகளைப் பதிவிட்டுள்ளனர். இருப்பினும், என்னைக் குற்றவாளியைப் போல நடத்தினார்கள்; அதிகாலையிலேயே காவலர்கள் என் வீட்டிற்கு வந்து, நான் தூக்க உடையில் இருந்தபோதே என்னை அழைத்துச் சென்றனர். இந்த முழு நிகழ்வும் வெறும் இன்ஸ்டாகிராம் கணக்கு அல்லது போலியான கணக்கை உருவாக்குவதுடன் மட்டும் தொடர்புடையது அல்ல என்று அஞ்சுகிறேன். இது, மக்களைத் துன்புறுத்துவதற்கும், அவர்களின் நற்பெயரைக் கெடுப்பதற்காகவும் திட்டமிட்டு உருவாக்கப்பட்ட ஒரு கணக்காக இருக்கலாம்.

நடவடிக்கை எடுக்குமாறு வேண்டுகோள்..

தமிழ்நாட்டின் பொருளாதார மற்றும் அரசியல் வளர்ச்சியைக் கூர்ந்து கவனிப்பவள் என்ற முறையில், இத்தகைய செயல்கள் பொது விவாதங்களிலும் கல்வி சார்ந்த செயல்பாடுகளிலும் மக்கள் பங்கேற்பதைத் தடுத்துவிடக்கூடும் என்று நான் கவலைப்படுகிறேன். எந்தத் தவறும் செய்யாத ஒருவரின் வீட்டிற்கு அதிகாலையில் காவலர்கள் வந்து, அவரை அழைத்துச் செல்ல முடியும் என்பது மிகுந்த அச்சத்தை அளிக்கிறது. இந்த சட்டவிரோதமான சிறைபிடிப்பு, போலியான அடையாளத்தை உருவாக்குதல், அவதூறான கருத்துகளைப் பதிவிடுதல் மற்றும் பொதுவெளியில் எனது நற்பெயருக்குக் களங்கம் விளைவித்தல் ஆகியவற்றிற்குப் பொறுப்பானவர்கள் மீது தகுந்த நடவடிக்கை எடுக்குமாறு கேட்டுக்கொள்கிறேன்” என அவர் குறிப்பிட்டிருந்தார்.

விலைவாசி உயர்வு குறித்து பேட்டி:

பொருளாதார நிபுணரும் பேராசிருமான கலையரசன், சமீபத்தில் பிரபல ஊடகம் ஒன்றுக்கு தமிழ்நாட்டில் ஏற்பட்டுள்ள விலைவாசி உயர்வு குறித்து பேட்டி கொடுத்திருந்தார். அப்போது, இந்திய அளவில் எப்போதுமே விலைவாசி உயர்வு இருந்தாலும் கூட, தமிழ்நாட்டில் எப்போதும் கொஞ்சம் குறைவாக இருக்கும் என்றும், முதல் முறையாக தேசிய அளவை விட, தமிழ்நாட்டில் விலைவாசி அதிகரித்திருப்பதாக கூறினார். தொடர்ந்து, இது குறித்து கண்டிப்பாக விவாதிக்க வேண்டும் என தெரிவித்த அவர், எப்படி இன்னும் இது விவாத பொருளாக மாறவில்லை என்று தெரியவில்லை என்று கூறினார். அரிசி விலையை தமிழ்நாட்டையும் அகில இந்திய அளவையும் வைத்து ஒப்பிட்டு பேசியிருந்தார். இதையடுத்து, இவருடைய இந்த பேட்டி வைரலாக தொடங்கியது.

அரசியல் தலைவர்கள் கண்டனம்!

கலையரசின் இந்த கைது நடவடிக்கைக்கு, திமுக தலைவர் மு.க.ஸ்டாலின், துணை பொது செயலாளர் கனிமொழி, நாதக தலைமை ஒருங்கிணைப்பாளர் சீமான், சிபிஎம் சன்முகம் உள்ளிட்ட பலர் கடும் கண்டங்களை தெரிவித்துள்ளனர்.

மு.க.ஸ்டாலின்:  “த.வெ.க. ஆட்சியில் வரலாறு காணாத விலைவாசி உயர்வை அம்பலப்படுத்தியதற்காக #DravidianModel ஆசிரியர் கலையரசன் அவர்கள் சட்டவிரோதமாகக் கைது: த.வெ.க. அரசின் உச்சகட்ட பாசிசம். புகழ்பெற்ற பேராசிரியர் மீது பொய்யான குற்றச்சாட்டைப் புனைந்து, அவரை அலைக்கழித்து, துன்புறுத்திய த.வெ.க. அரசின் பாசிச செயல் கடும் கண்டனத்துக்குரியது. தமிழ்நாடு காவல்துறையும், அதற்குப் பொறுப்பு வகிக்கும் முதலமைச்சர் அவர்களும் முனைவர் கலையரசன் அவர்களிடம் பகிரங்கமாக மன்னிப்பு கேட்க வேண்டும்” என்று மு.க.ஸ்டாலின் தெரிவித்துள்ளார்.

த.வெ.க. ஆட்சியில் வரலாறு காணாத விலைவாசி உயர்வை அம்பலப்படுத்தியதற்காக #DravidianModel ஆசிரியர் கலையரசன் அவர்கள் சட்டவிரோதமாகக் கைது: த.வெ.க. அரசின் உச்சகட்ட பாசிசம்! சென்னை வளர்ச்சி ஆராய்ச்சி நிறுவனத்தில் (MIDS) உதவிப் பேராசிரியராக உள்ள முனைவர் கலையரசன் அவர்களை நேற்று அதிகாலை, சீருடை அணியாத காவலர்கள் சட்டவிரோதமாகக் கைது செய்து, வாடகை வாகனத்தில் ஏற்றிச் சென்ற செய்தியைக் கேட்டு மிகுந்த அதிர்ச்சிக்கு உள்ளானேன். கைது செய்யப்பட்டவர் சாதாரண நபரோ, குற்றப் பின்னணி கொண்டவரோ இல்லை. திரு. கலையரசன் அவர்கள் தமிழ்நாட்டின் முதன்மையான ஆராய்ச்சி நிறுவனத்தில் பணிபுரியும் பேராசிரியர். இந்தியாவின் தலைசிறந்த பல்கலைக்கழகமான JNU-வில் பொருளாதாரத்தில் முனைவர் பட்டம் பெற்றவர். உலகின் தலைசிறந்த பல்கலைக்கழகமான கேம்பிரிட்ஜ் பல்கலைக்கழகம் பதிப்பித்த "The Dravidian Model" நூலின் ஆசிரியர்களில் ஒருவர். ஒன்றிய அரசின் திட்டக்குழுவில் பொறுப்பு வகித்தவர். தமிழ்நாடு அரசின் பொருளாதார ஆய்வறிக்கையைத் தயார் செய்வதில் பங்களித்தவர். எல்லாவற்றுக்கும் மேல், தமிழ்நாடு முதலமைச்சர் தலைவராக இருக்கும் தமிழ்நாடு காலநிலை மாற்ற நிர்வாகக் குழுவின் உறுப்பினராக இப்போதும் இருப்பவர். அப்படிப்பட்டவரைத் தெரியாமல் கைது செய்துவிட்டோம் என்று கூறுவது நம்பும்படி இல்லை. செய்யாத குற்றத்திற்காக, அடிப்படை உரிமைகள் அனைத்தையும் மறுத்து, அவரது செல்போனைப் பறித்து, கைது செய்து அலைக்கழித்ததைச் சாதாரணச் செயலாக எவரும் கடந்துபோக முடியாது. குற்றவாளிகளை எல்லாம் கூத்தடிக்க விட்டுவிட்டு, கல்வியாளர்களை அச்சுறுத்திப் பார்ப்பது எவ்வளவு பெரிய அசிங்கம்? திரு. கலையரசன் அவர்கள் ஏன் கைது செய்யப்பட்டார்? Dravidian Model என்ற பதத்தை முன்வைத்து, திராவிட ஆட்சியால் தமிழ்நாடு அடைந்த வளர்ச்சியை உலகம் முழுவதும் பறைசாற்றியதற்காகவா? த.வெ.க. ஆட்சி அமைந்த பிறகுதான், தமிழ்நாடு இதுவரை சந்தித்திராத விலைவாசி உயர்வைச் சந்தித்துள்ளது என்ற உண்மையைச் சொன்னதற்காகவா? முட்டாள்களால் நிறைந்த த.வெ.க.வுக்கும் கல்விக்கும் எந்தத் தொடர்பும் இல்லை என்பது அனைவரும் அறிந்ததுதான். ஆனால், கல்வியாளர்களைக் கைது செய்து மிரட்டும் அளவுக்கு அறிவின் மீது ஒவ்வாமை கொண்டவர்களாக இவர்கள் நடந்துகொள்வார்கள் என நிச்சயமாக நினைக்கவில்லை. பாசிசத்தில் பா.ஜ.க.வையும் மிஞ்சிவிடுவார்கள் என்பதைத்தான் இந்தக் கைது காட்டுகிறது. முதலமைச்சரின் ஒப்புதலோடும் உயரதிகாரிகளின் அனுமதியோடும்தான் இந்த அத்துமீறல் நடக்கிறதா? முனைவர் கலையரசன் அவர்கள் எந்தக் கட்சியையும் சார்ந்தவர் அல்ல. கடந்த ஆட்சிக்காலத்திலும், அவர் சுதந்திரமாகத் தன்னுடைய விமர்சனக் கருத்துகளை முன்வைத்திருக்கிறார். ஆனால், இந்தத் தரங்கெட்ட த.வெ.க. ஆட்சியோ, எங்கள் ஆட்சியைப் பற்றியோ நிர்வாகத் தோல்விகளைப் பற்றியோ ஊடகங்களில் உண்மையைப் பேசினால் விளைவுகள் மோசமாக இருக்கும் என்று மிரட்டும் ரவுடி அரசாகச் செயல்பட்டுள்ளது. இப்படிப்பட்ட அரசிற்கு ஆதரவு அளித்துக் கொண்டு இருக்கும் கட்சிகள், இந்த அநியாயத்தைக் கண்டும் காணாமல் இருப்பது ஏன்? இதுதான் இவர்கள் பாசிசத்தை எதிர்த்துக் கேள்வி கேட்கும் அரசியலா? புகழ்பெற்ற பேராசிரியர் மீது பொய்யான குற்றச்சாட்டைப் புனைந்து, அவரை அலைக்கழித்து, துன்புறுத்திய த.வெ.க. அரசின் பாசிச செயல் கடும் கண்டனத்துக்குரியது. தமிழ்நாடு காவல்துறையும், அதற்குப் பொறுப்பு வகிக்கும் முதலமைச்சர் அவர்களும் முனைவர் கலையரசன் அவர்களிடம் பகிரங்கமாக மன்னிப்பு கேட்க வேண்டும்!

— M.K.Stalin (@mkstalin) October 29, 2026

கனிமொழி எம்.பி:  ”பேராசிரியரும் பொருளாதார அறிஞருமான திரு. கலையரசன் அவர்களை நேற்று அதிகாலையில் பொய்க் குற்றச்சாட்டுகளைக் கூறி அராஜகமான முறையில் கைது செய்து, அலைக்கழித்து, மன உளைச்சலுக்கு ஆளாக்கியுள்ள தவெக அரசுக்கு கடும் கண்டனத்தைத் தெரிவித்துக் கொள்கிறேன்”

சீமான் : “பேராசிரியர் தம்பி கலையரசனை அதிகாலையில் அழைத்துச் சென்று அச்சுறுத்துவதா? காவல்துறை மக்களுக்கானதா? ஆளுங்கட்சிக்கானதா?”

சண்முகம்: “சென்னை வளர்ச்சி மையம் MIDS பேராசிரியர் கலையரசன் அவர்கள் இன்று விடியற்காலை 5 மணிக்கு வீட்டிலிருந்து எவ்வித முகாந்திரமும் இல்லாமல் சீருடை அணியாத காவல்துறையினரால் அழைத்துச் செல்லப்பட்டுள்ளார். இது வன்மையான கண்டனத்திற்குரியது” என்று தெரிவித்துள்ளார்”

மேலும் படிக்க | TNPSC Job : தமிழக இளைஞர்களுக்கு மெகா தீபாவளி பரிசு! விரைவில் மின்வாரியத்தில் 8,000 வேலைவாய்ப்பு