8th Pay Commission: லட்சக்கணக்கான மத்திய அரசு ஊழியர்களும் ஓய்வூதியதாரர்களும் 8வது ஊதியக் குழுவின் அறிவிப்பை ஆவலுடன் எதிர்பார்த்துக் காத்திருக்கின்றனர். தங்கள் சம்பள உயர்வு, ஓய்வூதிய உயர்வு, அலவன்சுகளில் மாற்றம் ஆகியவற்றை பற்றி அறிய அனைவரும் ஆர்வமாக உள்ளனர்.
இருப்பினும், சமீபத்திய தகவல்களின்படி, சம்பள உயர்வு குறித்த தெளிவான விவரங்களைப் பெற ஊழியர்கள் 2027-ஆம் ஆண்டின் இரண்டாம் பாதி வரை, அல்லது அதற்கும் மேலாக காத்திருக்க வேண்டியிருக்கும். ஏன் இந்த காத்திருப்பு? சம்பளம் எவ்வளவு அதிகரிக்கும்? அரியர் கிடைக்குமா? இந்த அனைத்து விவரங்களையும் இந்த பதிவில் காணலாம்.
நவம்பர் 3, 2025-ல் 8வது ஊதியக் குழு அமைப்பு
8வது ஊதியக் குழு நவம்பர் 3, 2025 அன்று அமைக்கப்பட்டது. இக்குழு தனது பரிந்துரைகளைத் தயாரித்து மத்திய அரசிடம் சமர்ப்பிக்க 18 மாத கால அவகாசம் வழங்கப்பட்டுள்ளது. இதன் அடிப்படையில், குழுவின் அறிக்கை 2027-ஆம் ஆண்டு மே அல்லது ஜூன் மாதத்திற்குள் வெளியாக வாய்ப்புள்ளது. இருப்பினும், அறிக்கையைச் சமர்ப்பிப்பதற்கான இறுதி காலக்கெடு குறித்து இதுவரை அதிகாரப்பூர்வ உறுதிப்படுத்தல் எதுவும் இல்லை.
8வது ஊதியக் குழுவின் பணிகள் தற்போது ஒரு முக்கிய கட்டத்தை எட்டியுள்ளன. குழு நாடு முழுவதும் உள்ள ஊழியர் மற்றும் ஓய்வூதியதாரர் சங்க பிரதிநிதிகளுடன் பேச்சுவார்த்தை நடத்தி வருகின்றனர். அந்த வகையில் சமீபத்திய கூட்டங்கள் பெங்களூருவில் நடைபெற்றன.
பெங்களூருவில் 8வது ஊதியக் குழு கூட்டம்
- 8வது ஊதியக் குழுவின் அதிகாரப்பூர்வ இணையதளத்தின்படி, அக்டோபர் 7 மற்றும் 8, 2026 ஆகிய தேதிகளில் பெங்களூருவில் முக்கியக் கூட்டங்கள் நடைபெற்றன. குழுவின் அடுத்த கூட்டம் மும்பையில் அக்டோபர் 22 மற்றும் 23 ஆகிய தேதிகளில் நடைபெறவுள்ளது.
- ஊழியர்கள், ஓய்வூதியதாரர்கள் மற்றும் பிற தொடர்புடைய தரப்பினரின் கோரிக்கைகள் மற்றும் கவலைகளைப் புரிந்துகொள்வதே இக்கூட்டங்களின் நோக்கமாகும்.
குழு அவசியமெனக் கருதினால், இறுதி அறிக்கைக்கு முன்னதாகவே இடைக்கால அறிக்கை அல்லது குறிப்பிட்ட பரிந்துரைகளை அரசிடம் சமர்ப்பிக்கலாம். ஆனால், இது எப்போது நிகழும் என்பது குறித்த உறுதியான தகவல் தற்போது இல்லை.
8வது ஊதியக் குழுவிடம் தொலைத்தொடர்புத் துறை ஓய்வூதியதாரர்கள் சங்கம் முன்வைத்துள்ள பரிந்துரைகள்.
ரூ. 69,000 குறைந்தபட்ச ஊதியம் மற்றும் 3.833 ஃபிட்மென்ட் ஃபாக்டர்
- தேசிய கவுன்சில் – கூட்டு ஆலோசனைக் குழுவின் (ஊழியர் தரப்பு) பரிந்துரையின் அடிப்படையில், கர்நாடக ஓய்வூதியதாரர்கள் சங்கம் அனைத்து மத்திய அரசு ஊழியர்களுக்கும் ரூ. 69,000 குறைந்தபட்ச அடிப்படை ஊதியத்தையும், 3.833 ஃபிட்மென்ட் ஃபாக்டரையும் பரிந்துரைத்துள்ளது.
- 7-வது ஊதியக் குழுவின்படி குறைந்தபட்ச அடிப்படை ஊதியம் ரூ. 18,000 ஆக உள்ளது.
குறைந்தபட்ச ஓய்வூதியம் ரூ. 34,470
- 3.833 ஃபிட்மென்ட் ஃபாக்டரின் அடிப்படையில், கர்நாடக ஓய்வூதியதாரர்கள் சங்கம் 8-வது ஊதியக் குழுவிடம் குறைந்தபட்ச ஓய்வூதியமாக சுமார் ரூ. 34,470-ஐயும் பரிந்துரைத்துள்ளது.
- இந்தப் பரிந்துரைக்கப்பட்ட ஓய்வூதியத் தொகையானது, தற்போதுள்ள ரூ. 9,000 என்ற குறைந்தபட்ச ஓய்வூதியத்தைப் போல 3.83 மடங்கு ஆகும்.
ஊதிய விகிதங்களை ஒன்றிணைத்தல்
- 7-வது ஊதியக் குழுவில் இருந்த 18 ஊழியர் நிலைகளை (employee levels), புதிய ஊதியக் குழுவில் ஏழு நிலைகளாக ஒன்றிணைக்குமாறு ஓய்வூதியதாரர்கள் சங்கம் பரிந்துரைத்துள்ளது.
அறிக்கை வெளியான பிறகு சம்பளம் எப்போது உயரும்?
- ஊதியக் குழுவின் அறிக்கை வெளியான உடனேயே சம்பள உயர்வு கிடைத்துவிடும் என்று கருதக்கூடாது என்பதை ஊழியர்கள் புரிந்துகொள்ள வேண்டும்.
- அதற்கு முன்னதாகப் பல நடைமுறைகள் நிறைவடைய வேண்டும்.
- முதலில், மூன்று உறுப்பினர்களைக் கொண்ட இக்குழு தனது அறிக்கையை மத்திய அரசிடம் சமர்ப்பிக்கும்.
- அதைத் தொடர்ந்து, அரசு அந்தப் பரிந்துரைகளை ஆய்வு செய்து, அவற்றை ஏற்றுக்கொள்வதா என்பது குறித்து முடிவெடுக்கும்.
- சம்பள உயர்வால் அரசுக்கு ஏற்படும் நிதிச் சுமையையும் அரசு மதிப்பீடு செய்யும்.
- அனைத்துத் தேவையான நடைமுறைகளும் முடிந்து, அதிகாரப்பூர்வ அறிவிப்பு வெளியிடப்பட்ட பின்னரே புதிய ஊதிய அமைப்பு நடைமுறைப்படுத்தப்படும்.
- இந்தச் செயல்முறைகளுக்குக் கால அவகாசம் தேவைப்படலாம்.
- எனவே, அறிக்கை சமர்ப்பிக்கப்பட்ட பிறகும் சம்பள உயர்வுக்காக ஊழியர்கள் காத்திருக்க வேண்டிய சூழல் ஏற்படலாம்.
ஃபிட்மென்ட் ஃபேக்டர் எந்த அளவில் நிர்ணயிக்கப்படும்?
ஃபிட்மென்ட் ஃபேக்டர் (Fitment Factor) சம்பள உயர்வுக்கான ஒரு முக்கிய காரணியாக கருதப்படுகின்றது. ஆகையால் இதன் மீதான கவனம் மிக அதிகமாக உள்ளது. 8வது ஊதியக் குழுவிற்கான 'ஃபிட்மென்ட் ஃபேக்டர்' குறித்து பல விதமான விவாதங்கள் நடைபெற்று வருகின்றன.
பழைய அடிப்படை ஊதியத்தை புதிய ஊதியக் கட்டமைப்பிற்கு மாற்றுவதைக் கணக்கிட இந்த காரணி பயன்படுத்தப்படுகிறது. முந்தைய ஊதியக் குழுக்களில் இந்தக் காரணி மாறுபட்டு இருந்துள்ளது.
- 6வது ஊதியக் குழுவின் பரிந்துரைகளின் கீழ் இது 1.86 ஆக இருந்தது
- 7வது ஊதியக் குழுவின் பரிந்துரைகளின் கீழ் இது 2.57 ஆகவும் நிர்ணயிக்கப்பட்டிருந்தது.
இம்முறை, ஊழியர் சங்கங்கள் அதிக ஃபிட்மென்ட் ஃபேக்டரைக் கோரியுள்ளன. பாரதிய பிரதிரக்ஷா மஸ்தூர் சங் (BPMS) 4.0 என்ற அளவையும், நேஷனல் கவுன்சில்-JCM மற்றும் அகில இந்திய பாதுகாப்புத் துறை ஊழியர்கள் கூட்டமைப்பு (AIDEF) ஆகியவை 3.833 என்ற அளவையும் கோரியுள்ளன. இருப்பினும், இவை ஊழியர் சங்கங்களின் கோரிக்கைகளே தவிர, அரசாங்கத்தால் இறுதி செய்யப்பட்ட விகிதங்கள் அல்ல என்பதை நினைவில் கொள்ள வேண்டும்.
ஜனவரி 2026 முதல் அரியர் கிடைக்குமா?
7வது ஊதியக் குழுவின் பதவிக்காலம் டிசம்பர் 31, 2025 அன்று முடிவடைகிறது. எனவே, 8-வது ஊதியக் குழுவின் பரிந்துரைகள் ஜனவரி 1, 2026 முதல் நடைமுறைக்கு வருவதாகக் கருதப்படும் என மத்திய அரசு ஊழியர்களும், ஓய்வூதியதாரர்களும் நம்புகிறார்கள்.
புதிய ஊதியக் கட்டமைப்பை முன்தேதியிட்டுக் (retrospective effect) செயல்படுத்த அரசாங்கம் முடிவெடுத்தால், தகுதியுள்ள ஊழியர்கள் நிலுவைத் தொகையைப் பெறக்கூடும். இருப்பினும், இது தொடர்பான அமலாக்கத் தேதி, விதிகள் மற்றும் ஊதிய விவரங்கள் குறித்த அரசாங்க இறுதி முடிவு இன்னும் அறிவிக்கப்படவில்லை.
 "8வது ஊதியக் குழு: 2027 -இல் ரிப்போர்ட்? சம்பளம், ஓய்வூதியம், அரியர்.... எவ்வளவு கிடைக்கும் தெரியுமா?")
)