EPF Claim Settlement தாமதம்: 'ஓய்வூதியதாரருக்கு 6% வட்டி கட்டுங்க...' EPFO-க்கு நுகர்வோர் ஆணையம் அதிரடி ஆர்டர்
EPFO Latest Update: ரூ. 14.06 லட்சம் மதிப்பிலான வருங்கால வைப்பு நிதி (PF) கோரிக்கையைத் தீர்ப்பதில் ஏற்பட்ட 35 நாள் தாமதத்திற்கு ஈடுசெய்யும் வகையில், ஓய்வுபெற்ற ஊழியர் ஒருவருக்கு ஆண்டுக்கு 6% வட்டி வழங்குமாறு வருங்கால வைப்பு நிதி அமைப்புக்கு (EPFO) நுகர்வோர் ஆணையம் உத்தரவிட்டுள்ளது.
EPFO Latest Update: EPF உறுப்பினர்களுக்கு முக்கிய தகவல். நுகர்வோர் ஆணையம் சமீபத்தில் அளித்த ஒரு தீர்ப்பு பெரிய அளவில் கவனம் பெற்றுள்ளது. கோரிக்கையை தீர்ப்பதில் தாமதம் செய்த EPFO-க்கு நுகர்வோர் ஆணையம் அதிரடி உத்தரவு ஒன்றை பிறப்பித்துள்ளது.
நுகர்வோர் ஆணையம் தீர்ப்பு
ரூ. 14.06 லட்சம் மதிப்பிலான வருங்கால வைப்பு நிதி (PF) கோரிக்கையைத் தீர்ப்பதில் ஏற்பட்ட 35 நாள் தாமதத்திற்கு ஈடுசெய்யும் வகையில், ஓய்வுபெற்ற ஊழியர் ஒருவருக்கு ஆண்டுக்கு 6% வட்டி வழங்குமாறு வருங்கால வைப்பு நிதி அமைப்புக்கு (EPFO) நுகர்வோர் ஆணையம் உத்தரவிட்டுள்ளது.
EPF திட்டம், 1952-ன் கீழ் நிர்ணயிக்கப்பட்ட 20 நாள் காலக்கெடுவுக்குள் கோரிக்கையைத் தீர்க்கத் தவறியதால், EPFO 'சேவையில் குறைபாடு' (deficiency in service) இழைத்ததாக மும்பை புறநகர் மாவட்ட நுகர்வோர் குறைதீர்ப்பாய ஆணையம் திட்டவட்டமாகத் தீர்ப்பளித்ததாக பிடிஐ (PTI) செய்தி நிறுவனம் தெரிவித்துள்ளது.
EPFO-வை நுகர்வோர் நீதிமன்றம் ஏன் பொறுப்பாக்கியது?
- 'ஃப்ளீட் மேரிடைம் சர்வீசஸ் (இந்தியா) பிரைவேட் லிமிடெட்' நிறுவனத்தின் முன்னாள் ஊழியரான மனுதாரர், அக்டோபர் 19, 2016 அன்று முழுமையான PF கோரிக்கையைச் சமர்ப்பித்ததாகக் கூறினார்.
- ஆனால், தேவையான கூட்டு அறிவிப்பு (joint declaration) விடுபட்டிருந்ததாகவும், அதே காரணத்திற்காக நவம்பர் 7 அன்று கோரிக்கை திருப்பி அனுப்பப்பட்டதாகவும் EPFO வாதிட்டது.
- EPFO-வின் கூற்றுப்படி, டிசம்பர் 2 அன்று முழுமையான ஆவணங்களைப் பெற்ற அமைப்பு, இறுதியாக டிசம்பர் 14, 2016 அன்று கோரிக்கையைத் தீர்த்து வைத்தது.
- அசல் கோரிக்கை முழுமையற்றதாக இருந்தது என்பதை உறுதிப்படுத்தும் வகையிலான எழுத்துப்பூர்வமான நிராகரிப்பு கடிதம், விளக்கம் அல்லது குறைபாடு குறித்த தகவல் எதையும் EPFO சமர்ப்பிக்கத் தவறியதைக் சுட்டிக்காட்டி, இந்த வாதத்தை ஆணையம் திட்டவட்டமாக நிராகரித்தது.
மேலும் படிக்க | PPF திட்டம்: மாதம் ரூ.12,500 சேமித்து கோடீஸ்வரராவது எப்படி? கணக்கீடு இதோ
EPFO அளித்த தீர்ப்பு
"பதிவில் உள்ள ஆதாரங்களின்படி, 19.10.2016 அன்று கோரிக்கை முழுமையற்றதாக இருந்தது என்பதை எதிர் தரப்பு திருப்திகரமாக நிரூபிக்கத் தவறிவிட்டது," என்று ஆணையம் கூறியது. மேலும், நிர்ணயிக்கப்பட்ட காலக்கெடுவுக்குள் EPFO கோரிக்கையைச் செயல்படுத்தியிருக்க வேண்டும் என்றும், அவ்வாறு செய்யத் தவறியது தெளிவான 'சேவை குறைபாடு' என்றும் அது தீர்ப்பளித்தது.
நுகர்வோர் ஆணையம் போட்ட உத்தரவு என்ன?
நவம்பர் 9 முதல் டிசம்பர் 13, 2016 வரையிலான 35 நாள் தாமதத்திற்கு, ரூ. 14,06,272 தொகைக்கு ஆண்டுக்கு 6% வட்டி வழங்குமாறு EPFO-க்கு ஆணையம் உத்தரவிட்டது. இந்த உத்தரவைச் செயல்படுத்த EPFO-க்கு 45 நாட்கள் அவகாசம் அளிக்கப்பட்டுள்ளது.
தங்கள் சேமிக்கப்பட்ட PF நிதியைச் சார்ந்திருக்கும் ஓய்வூதியதாரர்களுக்கு இந்த முடிவு முக்கியமானது. சில வாரங்கள் தாமதமானால் கூட, ஒரு தனிநபரின் வாழ்க்கை பாதிக்கப்படலாம் மற்றும் தவிர்க்கக்கூடிய நிதி நெருக்கடிகள் ஏற்படலாம்.
கோரிக்கை படிவங்கள் மற்றும் அதற்கான துணை ஆவணங்களின் நகல்களை அசல் வடிவிலேயே வைத்திருப்பதன் முக்கியத்துவத்தையும், EPFO அதிகாரிகளுடன் வெளிப்படையான தொடர்பைப் பேணுவதன் அவசியத்தையும் இந்த உத்தரவு வலியுறுத்துகிறது. முழுமையான கோரிக்கை (claim) எப்போது முதலில் சமர்ப்பிக்கப்பட்டது என்பது குறித்து ஏதேனும் சர்ச்சை எழுந்தால், இத்தகைய பதிவுகள் மிகவும் முக்கியமானதாக அமையலாம்.
PF உறுப்பினர்கள் கவனத்தில் கொள்ள வேண்டிய முக்கிய விஷயங்கள்
PF உறுப்பினர்கள் பின்வரும் குறிப்புகளை கவனத்தில் கொள்ள வேண்டும்:
- முறையான பதிவுகளைப் பராமரிக்க வேண்டும்.
- கோரிக்கை தொடர்பான காலவரிசையைக் கண்காணிக்க வெண்டும்.
- கோரிக்கை செயல்முறை குறித்த தெளிவான புரிதலைப் பெற்றிருக்க வேண்டும்.
- உங்கள் சட்டப்பூர்வ உரிமைகள் மற்றும் பொறுப்புகளைப் படித்துப் புரிந்துகொள்ள வேண்டும்.
- குறிப்பிட்ட காலக்கெடுவுக்குள் முழுமையான கோரிக்கை தீர்க்கப்படாவிட்டால், அது குறித்த விவரங்களைப் பதிவு செய்து வைத்துக்கொள்ள வேண்டும்.
கிளெய்ம் தீர்வு நிலையில் எந்த முன்னேற்றமும் இல்லையெனில், சம்பந்தப்பட்ட EPFO அதிகாரிகளுடன் விவாதித்து, நிர்ணயிக்கப்பட்ட விதிகள் மற்றும் நடைமுறைகளின்படி விவகாரத்தை உயர் அதிகாரிகளின் கவனத்திற்குக் கொண்டு செல்லலாம்.