செப்டம்பர் மாதம் ஒரு கிராம் தங்கம் கொடுக்கும் தமிழ்நாடு அரசு! யாருக்கெல்லாம் கிடைக்கும்

thaimaman thanga mothiram scheme : தமிழ்நாடு அரசு, புதிதாகப் பிறக்கும் குழந்தைகளுக்காகச் செயல்படுத்தவுள்ள 'தாய்மாமன் தங்க மோதிர சீர் திட்டம்' குறித்த அதிகாரப்பூர்வ தகவல்களையும், நிதி ஒதுக்கீட்டிற்கான அரசாணையையும் வெளியிட்டுள்ளது. தமிழ்நாடு முதலமைச்சர் பேரறிஞர் அண்ணா அவர்களின் பிறந்தநாளான வரும் செப்டம்பர் 15, 2026 முதல் இத்திட்டத்தை அதிகாரப்பூர்வமாகத் தொடங்கி வைக்கவுள்ளார். இத்திட்டத்தின் முழுமையான விவரங்கள், தகுதிகள் மற்றும் நிபந்தனைகள் கீழே தொகுத்து வழங்கப்பட்டுள்ளன.

எப்போது முதல், யாருக்குக் கிடைக்கும்?

இத்திட்டம் செப்டம்பர் 15, 2026 முதல் களத்தில் செயல்பாட்டுக்கு வரவுள்ள போதிலும், ஜூன் 22, 2026 அன்றோ அல்லது அதற்குப் பிறகோ பிறந்த தகுதியுள்ள அனைத்துக் குழந்தைகளுக்கும் இந்த 1 கிராம் தங்க மோதிரம் வழங்கப்படும்.

மருத்துவமனை நிபந்தனை: அரசு மருத்துவமனைகள் மற்றும் அரசு ஆரம்ப சுகாதார நிலையங்களில் பிரசவம் நடந்திருக்க வேண்டும்.

குழந்தைகளின் எண்ணிக்கைக்குக் கட்டுப்பாடில்லை: ஒரு குடும்பத்தில் முதலாம் குழந்தை, இரண்டாம் குழந்தை அல்லது அதற்கு மேல் எத்தனை குழந்தைகள் பிறந்திருந்தாலும், எவ்விதக் கட்டுப்பாடும் இன்றி அனைத்துக் குழந்தைகளுக்கும் 1 கிராம் தங்க மோதிரம் வழங்கப்படும்.

பாலின பாகுபாடில்லை: ஆண், பெண் என எந்தக் குழந்தையாக இருந்தாலும் இத்திட்டம் சமமாகப் பொருந்தும்.

தமிழ்நாடு இருப்பிடம்: தாய் தமிழ்நாட்டைச் சேர்ந்தவராக இருக்க வேண்டும்.

முக்கியமான தகுதிகள் மற்றும் முன்பதிவு:

இத்திட்டத்தில் பயன்பெறத் தாய்மார்கள் கருத்தரித்த பிறகு ஆரம்ப சுகாதார நிலையங்களில் தங்களது பெயரைக் கட்டாயமாகப் பதிவு செய்திருக்க வேண்டும்.

PICME, RCH ID: தாய்மார்கள் RCH ID உடன் PICME (Pregnancy and Infant Cohort Monitoring and Evaluation) அமைப்பில் பதிவு செய்திருப்பது அவசியமாகும்.

தாயின் RCH ID மற்றும் அடையாளச் சான்றுகளை இணைத்துத் தகுதி உறுதி செய்யப்படும்.

தேவையான ஆவணங்கள் :

மருத்துவமனையிலிருந்து டிஸ்சார்ஜ் ஆகும்போது சமர்ப்பிக்க வேண்டிய ஆவணமாக ரேஷன் கார்டு, ஆதார் அட்டை, வாக்காளர் அடையாள அட்டை, தொழிலாளர் நல வாரிய அட்டை, இருப்பிடச் சான்றிதழ் ஆகியவற்றில் ஏதேனும் ஒன்றை சமர்ப்பிக்கலாம்

தங்க மோதிரத்தின் சிறப்பம்சங்கள் மற்றும் அரசு நிதி:

நிதி ஒதுக்கீடு: இத்திட்டத்திற்காக தமிழ்நாடு அரசு 560 கோடி ரூபாய் நிதி ஒதுக்கீடு செய்துள்ளது. இந்த அறிவிப்பை பட்ஜெட் தாக்கலின்போது நிதியமைச்சர் மரிய வில்சன் தெரிவித்தார். ஒரு மோதிரத்தின் கொள்முதல் மதிப்பீடாக ரூ.17,000 நிர்ணயிக்கப்பட்டுள்ளது.

தரக்கட்டுப்பாடு: வழங்கப்படும் 1 கிராம் தங்க மோதிரத்தில் BIS ஹால்மார்க் முத்திரை மற்றும் தமிழ்நாடு அரசின் இலச்சினை பொறிக்கப்பட்டிருக்கும்.

பாதுகாப்பு எண்: முறைகேடுகளைத் தடுக்க ஒவ்வொரு மோதிரத்திலும் தனித்துவமான வரிசை எண் மற்றும் பாதுகாப்பு முத்திரைகள் இடம்பெறும்.

விநியோக முறை மற்றும் பாதுகாப்பு ஏற்பாடுகள்:

பாதுகாப்பான சேமிப்பு: மாநிலத்தில் உள்ள 94 முதன்மை பிரசவ மையங்கள் முதன்மைச் சேமிப்பு மண்டலங்களாகச் செயல்படும். அங்கு 24 மணி நேர CCTV கண்காணிப்பு, மின்சாரக் காப்பு மற்றும் பிரத்யேக லாக்கர்கள் மூலம் மோதிரங்கள் பாதுகாக்கப்பட்டு, ஏனைய சிறிய அரசு மருத்துவமனைகளுக்கும் விநியோகிக்கப்படும்.

நவீன சரிபார்ப்பு: ஆள்மாறாட்டம் மற்றும் முறைகேடுகளைத் தவிர்க்கத் தாய்மார்களுக்கு முக அங்கீகார அமைப்பு மற்றும் விழித்திரை ஸ்கேன் மூலம் சரிபார்ப்பு நடத்தப்படும்.

உடனுக்குடன் ஒப்படைப்பு: குழந்தை பிறந்து மருத்துவமனையிலிருந்து டிஸ்சார்ஜ் செய்யப்படும்போதே மோதிரம் வழங்கப்பட்டு, PICME போர்ட்டலில் பயோமெட்ரிக் ஒப்புகை பெறப்பட்டுப் பதிவேற்றம் செய்யப்படும்.