தூத்துக்குடி வேலைவாய்ப்பு : டிகிரி முடித்த பெண்களே விண்ணப்பிக்கலாம்! மாத சம்பளம் ரூ.12000

Tamil Nadu Government Jobs 2026: தூத்துக்குடி மாவட்டத்தில் தமிழ்நாடு மாநில ஊரக வாழ்வாதார இயக்கத்தின் மாவட்ட இயக்க மேலாண்மை அலகில் காலியாக உள்ள வட்டார ஒருங்கிணைப்பாளர் பணியிடங்களை ஒப்பந்த அடிப்படையில் நேரடி நியமனம் மூலம் நிரப்ப மாவட்ட நிர்வாகம் அதிகாரப்பூர்வ அறிவிப்பை வெளியிட்டுள்ளது. தூத்துக்குடி மாவட்ட ஆட்சித்தலைவர் வெளியிட்டுள்ள இந்த அறிவிப்பின்படி, இப்பணிகள் முற்றிலும் தகுதியான பெண் விண்ணப்பதாரர்களைக் கொண்டு மட்டுமே நிரப்பப்பட உள்ளன. தேர்ந்தெடுக்கப்படும் தகுதியான நபர்களுக்கு மாதத் தொகுப்பூதியமாக ரூ. 12,000 மற்றும் மாதப் பயணப்படியாக ரூ. 750 சேர்த்து, மாதம் மொத்தம் ரூ. 12,750 ஊதியமாக வழங்கப்படும்.

காலிப் பணியிட விவரம்

இத்திட்டத்தின் கீழ் தூத்துக்குடி மாவட்டத்தில் உள்ள 10 வட்டாரங்களில் மொத்தம் 22 காலிப்பணியிடங்கள் நிரப்பப்படவுள்ளன. இதில் அதிகபட்சமாக ஆழ்வார்திருநகரி, கயத்தார், கோவில்பட்டி மற்றும் புதூர் ஆகிய வட்டாரங்களுக்கு தலா 3 காலிப்பணியிடங்கள் ஒதுக்கப்பட்டுள்ளன. அதனைத் தொடர்ந்து திருவைகுண்டம், சாத்தான்குளம், ஓட்டப்பிடாரம் மற்றும் விளாத்திகுளம் ஆகிய வட்டாரங்களுக்கு தலா 2 இடங்களும், உடன்குடி மற்றும் கருங்குளம் வட்டாரங்களுக்கு தலா 1 காலிப்பணியிடமும் நிர்ணயிக்கப்பட்டுள்ளது. விண்ணப்பதாரர்கள் தூத்துக்குடி மாவட்டத்தில் காலிப்பணியிடம் அறிவிக்கப்பட்டுள்ள குறிப்பிட்ட வட்டாரத்தில் நிரந்தரமாக வசிப்பவராக இருக்க வேண்டும் என்பது முக்கியமான நிபந்தனையாகும். 

தேவையான தகுதிகள் மற்றும் ஆவணங்கள்

இப்பணிக்கு விண்ணப்பிக்க விரும்பும் பெண் விண்ணப்பதாரர்கள் 01.07.2026 அன்றைய தேதியின்படி குறைந்தபட்சம் 18 வயது பூர்த்தியடைந்தவராகவும், அதிகபட்சமாக 35 வயதிற்கு மிகாமல் இருக்க வேண்டும். கல்வித்தகுதியைப் பொறுத்தவரை, ஏதேனும் ஒரு துறையில் இளங்கலை பட்டம் பெற்று தேர்ச்சியடைந்திருக்க வேண்டும். அத்துடன் எம்.எஸ். ஆபிஸ் கணினிப் பயிற்சியில் குறைந்தபட்சம் 3 மாத சான்றிதழ் படிப்பு முடித்திருக்க வேண்டும் அல்லது கணினி அறிவியல் (Computer Science) அல்லது கம்ப்யூட்டர் அப்ளிகேஷன்ஸ் (BCA / B.Sc Computer Science) பிரிவில் இளங்கலை பட்டம் பெற்றிருக்க வேண்டும்.

கணினி மென்பொருள் சார்ந்த கூடுதல் கல்வித்தகுதி பெற்றவர்களுக்கு முன்னுரிமை அளிக்கப்படும். மேலும், மக்கள் அமைப்பு சார்ந்த திட்டங்களில் பணிபுரிந்து குறைந்தபட்சம் 5 ஆண்டுகள் முன் அனுபவம் பெற்றிருப்பதோடு, செல்லுபடியாகும் இருசக்கர வாகன ஓட்டுநர் உரிமம் பெற்றிருப்பது கட்டாயமாகும்.  

தகுதியும் ஆர்வமும் உள்ள விண்ணப்பதாரர்கள் www.thoothukudi.nic.in என்ற தூத்துக்குடி மாவட்ட அதிகாரப்பூர்வ இணையதளத்தில் இருந்து விண்ணப்பப் படிவத்தைப் பதிவிறக்கம் செய்து கொள்ளலாம். முழுமையாகப் பூர்த்தி செய்யப்பட்ட விண்ணப்பத்துடன் கல்வித்தகுதி, இருப்பிடச் சான்று, சாதிச் சான்று, நன்னடத்தைச் சான்று, கணினி பயிற்சி சான்றிதழ், பணி அனுபவச் சான்று மற்றும் ஓட்டுநர் உரிமம் ஆகியவற்றின் நகல்களை இணைக்க வேண்டும்.

விண்ணப்பிக்க வேண்டிய முகவரி

அரசு வேலை நாட்களில் காலை 10.00 மணி முதல் மாலை 5.45 மணி வரை நேரிலோ அல்லது பதிவுத் தபால் மூலமாகவோ "இணை இயக்குநர் / திட்ட இயக்குநர், மாவட்ட இயக்க மேலாண்மை அலகு, மாவட்ட ஆட்சியரகம் (இரண்டாம் தளம்), கோரம்பள்ளம் - 628101, தூத்துக்குடி மாவட்டம்" என்ற முகவரிக்கு அனுப்பி வைக்க வேண்டும். விண்ணப்பங்கள் வந்து சேர வேண்டிய கடைசி நாள் 16.10.2026 மாலை 5.45 மணி ஆகும்; தகுதியான நபர்களுக்கு தேர்வு அல்லது நேர்காணல் நடைபெறும் தேதி பின்னர் தனியே தெரிவிக்கப்படும்