சுதந்திர தினம் 2026: செங்கோட்டையில் முதல் முறையாக ஒலித்த வந்தே மாதரம் பாடல்
Independence day 2026: இந்த ஆண்டு தேசியப் பாடலான வந்தே மாதரம் பாடலின் 150-வது ஆண்டாகும். செங்கோட்டையில் பிரதமர் மோடி தேசியக் கொடியை ஏற்றியபோது, உள்நாட்டில் தயாரிக்கப்பட்ட 105 மிமீ 'லைட் ஃபீல்ட் கன்' பீரங்கிகளைக் கொண்டு 1721 ஃபீல்ட் பேட்டரி (சடங்குப் பிரிவு) மூலம் 21 குண்டுகள் முழங்க மரியாதை செலுத்தப்பட்டது.
Independence day 2026: இன்று நாம் அனைவரும் நமது நாட்டின் 80-வது சுதந்திர தினத்தை இன்று கொண்டாடிக்கொண்டிருக்கிறோம். செங்கோட்டையில் பிரதமர் நரேந்திர மோடி தலைமையில் நடைபெற்ற 80-வது சுதந்திர தின விழாவில், முதன்முறையாகத் தேசியப் பாடலான 'வந்தே மாதரம்' முழுமையாக இசைக்கப்பட்டது. அதனைத் தொடர்ந்து, வழக்கமான தேசிய கீதமான 'ஜன கண மன' இசைக்கப்பட்டது.
வந்தே மாதரம் பாடலின் 150-வது ஆண்டு
இந்த ஆண்டு தேசியப் பாடலின் 150-வது ஆண்டாகும். செங்கோட்டையில் பிரதமர் மோடி தேசியக் கொடியை ஏற்றியபோது, உள்நாட்டில் தயாரிக்கப்பட்ட 105 மிமீ 'லைட் ஃபீல்ட் கன்' (Light Field Guns) பீரங்கிகளைக் கொண்டு 1721 ஃபீல்ட் பேட்டரி (சடங்குப் பிரிவு) மூலம் 21 குண்டுகள் முழங்க மரியாதை செலுத்தப்பட்டது.
அதன்பின்னர் ராணுவ இசைக்குழு 'வந்தே மாதரம்' பாடலை இசைத்தது. இந்திய விமானப்படையின் இரண்டு Mi-17 ஹெலிகாப்டர்கள் விழா நடைபெறும் இடத்தில் மலர் தூவின. ஒரு ஹெலிகாப்டர் தேசியக் கொடியையும், மற்றொன்று 'வந்தே மாதரம்' பொறிக்கப்பட்ட கொடியையும் ஏந்திச் சென்றன.
"சுதந்திரத்திற்குப் பிறகு முதன்முறையாகச் செங்கோட்டையில் 'வந்தே மாதரம்' பாடல் இசைக்கப்பட்டுள்ளது," என்று பிரதமர் மோடி நாட்டு மக்களிடையே உரையாற்றுகையில் குறிப்பிட்டார்.
வரலாற்றுச் சிறப்புமிக்க தருணம்
'வந்தே மாதரம்' பாடலின் முழு வடிவத்திற்கும் சமீபத்தில் தேசிய கீதத்திற்கு இணையான சட்டப் பாதுகாப்பு வழங்கப்பட்டது. வெள்ளிக்கிழமையன்று, அதாவது 80-வது சுதந்திர தினத்திற்கு முந்தைய நாள், குடியரசுத் தலைவர் திரௌபதி முர்மு நாட்டு மக்களிடையே ஆற்றிய உரைக்கு முன்னதாகவும் பின்னரும் இப்பாடல் இசைக்கப்பட்டது.
இப்பாடல் இசைக்கப்பட்டதைத் தொடர்ந்து தேசிய கீதம் இசைக்கப்பட்டது; இது அதிகாரப்பூர்வ கொண்டாட்டங்களில் ஒரு வரலாற்றுச் சிறப்புமிக்க தருணமாக அமைந்தது.
தேசிய கீதத்திற்கு இணையான சட்டப் பாதுகாப்பை 'வந்தே மாதரம்' பாடலுக்கு வழங்கும் 'தேசிய கௌரவ அவமதிப்புத் தடுப்பு (திருத்த) மசோதா, 2026'-க்குக் குடியரசுத் தலைவர் ஒப்புதல் அளித்த சில நாட்களிலேயே இந்த நிகழ்வு நடைபெற்றுள்ளது. திருத்தப்பட்ட சட்டத்தின்படி, தேசியப் பாடலைப் பாடுவதை வேண்டுமென்றே இடையூறு செய்தாலோ அல்லது தடுத்தாலோ, சிறைத்தண்டனை, அபராதம் அல்லது இவை இரண்டும் உள்ளிட்ட தண்டனைகள் விதிக்கப்படும்.
"சுதேசி இயக்கத்தின் போது, 'வந்தே மாதரம்' பாடல் மக்களின் பாடலாக மாறியது," என்று குடியரசுத் தலைவர் தனது உரையில் குறிப்பிட்டார்.
நாட்டு மக்களிடையே உரையாற்றிய பிரதமர் நரேந்திர மோடி
இந்தியாவின் 80-வது சுதந்திர தினத்தை முன்னிட்டு செங்கோட்டையிலிருந்து நாட்டு மக்களிடையே உரையாற்றிய பிரதமர் நரேந்திர மோடி, நாட்டின் மன உறுதி, தொலைநோக்குடனான திட்டமிடல் மற்றும் எதிர்கால வளர்ச்சி இலக்குகள் ஆகியவற்றை வலியுறுத்தினார்.
கோவிட்-19 பெருந்தொற்று மற்றும் மேற்கு ஆசியாவில் நிலவும் புவிசார் அரசியல் மோதல்கள் போன்ற உலகளாவிய நெருக்கடிகளிலிருந்து குடிமக்களையும் விவசாயிகளையும் அரசு எவ்வாறு பாதுகாத்தது என்பதை அவர் விளக்கினார். கடந்த 10-12 ஆண்டுகளாக மேற்கொள்ளப்பட்ட முன்னெச்சரிக்கை நடவடிக்கைகள், எரிசக்தி, எரிபொருள் மற்றும் உரங்களின் தட்டுப்பாட்டைத் தவிர்க்க உதவியதாக பிரதமர் மோடி குறிப்பிட்டார்.
"கொரோனா பாதிப்பிலிருந்து நாம் மீண்டு வந்த நிலையில், உலகம் முழுவதும் பல்வேறு மோதல்களைக் கண்டோம். எதிர்காலம் குறித்துப் பலரும் வதந்திகளைப் பரப்பினர்; சிலர் மக்களை அச்சத்திலும் கவலையிலும் வைத்திருக்க விரும்பினர். மேற்கு ஆசியாவில் நெருக்கடி ஏற்பட்டபோது, பெட்ரோல் நிலையங்களில் பெட்ரோல் அல்லது டீசல் கிடைக்காது என்றும், மக்களுக்கு டீசல் கிடைக்காது என்றும் கூறப்பட்டது," என்று அவர் கூறினார்.
மூலோபாய இருப்பு மற்றும் கவனமான திட்டமிடல் காரணமாகவே இந்தியாவால் தடையற்ற விநியோகத்தை உறுதி செய்ய முடிந்ததாக அவர் குறிப்பிட்டார். மேலும், நிதிச் சுமைகளை மக்கள் மீது சுமத்தாமல் அரசே அவற்றை ஏற்றுக்கொண்ட முடிவை விளக்குவதற்கு "நாகரிக் தேவோ பவ" (குடிமக்களே தெய்வம்) என்ற தாரக மந்திரத்தை அவர் சுட்டிக்காட்டினார்.
சர்வதேச சந்தையில் யூரியாவின் விலை சுமார் ₹3,000-ஐ எட்டிய போதிலும், விவசாயிகளின் வாழ்வாதாரத்தைப் பாதுகாக்கும் நோக்கில், DAP போன்ற விவசாய இடுபொருட்களுக்கு மானியம் வழங்கி, யூரியாவை இந்திய விவசாயிகளுக்கு வெறும் ₹300-க்கு அரசு தொடர்ந்து வழங்கி வருகிறது. "₹3,000 மதிப்புள்ள யூரியா விவசாயிகளுக்கு ₹300-க்கு வழங்கப்படுகிறது; DAP உரமும் விவசாயிகளுக்குக் குறைந்த விலையிலேயே வழங்கப்படுகிறது," என்று பிரதமர் கூறினார்.
கடந்த 12 ஆண்டுகளில் பல்வேறு துறைகளில் ஏற்பட்டுள்ள கணிசமான உற்பத்தி வளர்ச்சியையும் பிரதமர் மோடி சுட்டிக்காட்டினார்: பாதுகாப்புத் துறை உற்பத்தி கிட்டத்தட்ட நான்கு மடங்கும், கதர் மற்றும் கிராமப்புறத் தொழில் உற்பத்தி கிட்டத்தட்ட ஐந்து மடங்கும், மின்னணு சாதன உற்பத்தி கிட்டத்தட்ட ஏழு மடங்கும், ரயில் பெட்டி உற்பத்தி 21 மடங்கும், மற்றும் மொபைல் போன் உற்பத்தி 33 மடங்கும் அதிகரித்துள்ளன. டிஜிட்டல் தொழில்நுட்பம் மற்றும் புத்தாக்கத் துறைகளில் இந்தியா குறிப்பிடத்தக்க முன்னேற்றம் கண்டுள்ளது என்றும் அவர் குறிப்பிட்டார்.
மேலும் படிக்க | இந்தியாவில் இருந்தாலும் ஆகஸ்ட் 16 அன்று சுதந்திர தினம் கொண்டாடும் வினோத
